Zaburi 106 - KITABU KITAKATIFU

Uvulahi vwa Nyasaye ku avandu veve

¹ Mwizominye Yahova! Musandizi Yahova kigira aveeye mulahi; uvuyanzi vwivwe vuhindiraa mihiga ni mihiga.

² Nivwaha unyala kovora vikolwa viosi vinene viamali kokora? Anoho nivwaha unyala kumwizominya kuli gaduukanaa?

³ Vaveeye nuvugasu avahulira amalago geege; kandi avakolaa agaveeye malungi kazozo.

⁴ Unzizulizi O, Yahova, lwa okonyaa avandu vovo; lwa ohonyia avandu vovo, umbalizi harara navo.

⁵ Leka ndore ligasizwa lia vandu vovo vatovole, kandi nduuki kusanga mu vusangali vwi ihiiri yooyo; mu vusangali harara na yavo avaveeye vovo.

⁶ Kunyi kumali kokora uvwoni kuli avaguuga viitu vaakora; kokoli uvudamanu kandi uvuchamu.

⁷ Avaguuga viitu sivamanyiriza vikolwa viokogenya via Nyasaye mu kivala cha Egebeti mba. Vivilira zing'inga zinyingi lwa yavamanyia uvuyanzi vwivwe; kandi vibaara ku Wuvunyali ha Inyanza Nzakanyu.

⁸ Navuzwa yavahonyia kuli yaali niyavasuuviriza. Kunangwa vaduuki kumanyia zinguru zizie zinene.

⁹ Yahaana lilago ku nyanza Nzakanyu nayo yuuma; yimilira avandu veve kuvitira hagati hayo ku lirova liumu.

¹⁰ Yavahonyia kutura ku yavo avavadunyiraa; yavahonyia kutura ku vasigu vaavo.

¹¹ Navuzwa amazi gaahira avasigu vaavo; sihali ho kali na mulala uwatigala mba.

¹² Maku avandu veve vaasuuvira lisuuvirizwa lilie, kandi vaamwimbira zinyumba ziu kumwizominya.

¹³ Navuzwa vivilira vwangu cha Yahova yaali naakori; na sivalindilira konyoora zing'anagani kutura kuye mba.

¹⁴ Navuzwa vizura likayirwa linene lie chukulia mu changalangwe, ma nivageriza Nyasaye.

¹⁵ Kunangwa Yahova yavaha cha vamuteeva, kandi yatuma uvulwaye vudamanu hagati haavo.

¹⁶ Vakendekera Musa mu changalangwe, kandi nivakendekera Haruni mutumikiri mutakatifu wa Yahova.

¹⁷ Hene yaho lirova liakunuka ma nilimira Dazani, kandi nilikunika Abiramu harara na avinyumba yeeye.

¹⁸ Muliru gwiika ku valondi vaavo, kandi nigusamba avandu vadamanu.

¹⁹ Valomba kemoli kigiriki chi zahabu ha Sinai, kandi nivasigamira kifananyi yicho.

²⁰ Vaagirung'anyia uvukumi vwa Nyasaye, kugwa kifananyi chi inyama yaya vunyasi.

²¹ Vivilira Nyasaye waali navahonyi, uwaali naakori vikolwa vivie vinene mu Egebeti.

²² Nyasaye yakola vindu viokogenyia vinyingi mu Egebeti. Yakola vindu viukuhuga ha Inyanza Nzakanyu.

²³ Lwa Nyasaye yavoola ndi aladiviza avandu veve, mutumikiri weve mutovole Musa yasingira kuhing'ana naye, kandi niyigalira uvutima vwa Nyasaye vuvuli kuviita.

²⁴ Maku vasuura kivala kilahi, kigira sivasuuvira mu lisuuvirizwa lia Nyasaye mba.

²⁵ Vamenya mu mahema gaavo nokomonya, kandi sivali vanyara kuhuliriza Yahova mba.

²⁶ Kunangwa Yahova yavaha lieganihiza liukwisuhiza ndi, alavakola vakuziri mu changalangwe,

²⁷ nukusalanyia visukululwi viavo hagati ha vandu vatamanyi Nyasaye, nukuvaleka vakuziri muvivala vigeni.

²⁸ Avandu va Nyasaye viiyunga mu lisigamira Baali ha Peori; kandi nivalia visiuviliru viahaanwa ku vanyasaye vaakuza.

²⁹ Vavuukiza uvutima vwa Yahova ni vikolwa viavo, na uvulwaye vudamanu vwaduuka hagati haavo.

³⁰ Navuzwa Finiasi yasingira kandi nahaana mageri ku avahioli, nuvulwaye vudamanu yivwo vwalekera.

³¹ Likuva yili liizulizwa kuhaana luyali ku Finiasi kutura lwene yilwo, kandi lilakave ndio ku zing'inga ziosi izizaa.

³² Avandu yava vaavihiliriza Nyasaye ha visinukiru via mazi via Meriba, kandi Musa yaali mu vudinyi kigira makuva gaavo.

³³ Vaakora Musa kuva nuvuzunu ligali, kandi namoloma vugira kuganangana.

³⁴ Siviita avandu vatamanyi Nyasaye, kuli Yahova yaali naavalagi vakole mba.

³⁵ Navuzwa valetana, kandi niviyigiza kokora miima jaavo.

³⁶ Avandu va Nyasaye vaasigamira vifananyi via vanyasaye vaavo, navio viagwa mitego jukuvadiviza.

³⁷ Vaahana vayaayi na vakana vaavo, kuva kuli visiuviliru ku vifananyi via Kanaani.

³⁸ Vita avana avataveeye nimbala, kandi ni vavahaana kuli visiuviliru ku vifananyi via vanyasaye va Kanaani; kandi kivala chizula uvudamanu vwu kwita.

³⁹ Vekola aveene avadamanu ku vikolwa viavo, kandi vasigamira vifananyi viavo.

⁴⁰ Kunangwa Yahova yaali nu vutima vonene ku vandu veve, kandi yavihilirizwa ligali navo.

⁴¹ Yavaleka mu zinguru zia vandu vatamanyi Nyasaye, na avasigu vaavo vamiiha kuvo.

⁴² Vadambizwa ligali navasigu vaavo, na vaali hasi huvwamiihi vwavo mbitilira.

⁴³ Yahova yahonyia avandu veve haali kanyingi, navuzwa vatovora kwibaala kuye, kandi vazizagilira kwiyingiriza mu vwoni vunyingi ligali.

⁴⁴ Navuzwa Yahova yahulira lwa vanira kuye, kandi yalora lidambizwa liavo.

⁴⁵ Yahova yizuliza lilagana lilie lia yalomba navo. Yaavaverera kigira uvunyingi vwu vuyanzi vwivwe vutaveeye ne keheri.

⁴⁶ Yahova yakola avasigu vadambiza avandu veve, kuva ni livererera kuvo.

⁴⁷ Okohonyie, O, Yahova Nyasaye wiitu, kandi okoleete harara kutura mu zihiiri, kunangwa kuduuki kukusandiza nu kwizominya lieta liilio litakatifu.

⁴⁸ Mwizominye Yahova, Nyasaye wa avandu va Isiraeli, mumwizominye kalunu kandi mihiga ni mihiga! Ma avandu vosi vavoole “Amini!” Yahova yizominywe!