Yakobo 4 - KITABU KITAKATIFU

¹ Uvulwani ni lirembana vituraa haliha hagati hinyu? Siliveeye likayirwa lienyu lidamanu liletaa uvulwani mu vivero vie miviri jinyu?

² Mukayirwa ivindu, navuzwa simunyoolaa mba, mwetegeki kwita; Mwegombaa ivindu nu umwoyo gwosi, navuzwa simunyoolaa mba, kulwayago, mulembanaa nimulwaana. Simuveeye ni ivindu via mwenya, kigira simutevaa kutura ku Nyasaye mba.

³ Lwa muteeva, simunyoolaa mba kigira musaala ni zing'anagani zindamanu muduuki kuvitumikira mu lieyaanziza lienyu.

⁴ Munyi avandu avataveeye vasuuvirifu! Simumanyi ndi kuva umulina wi lirova, gaveeye kovora kuva musigu wa Nyasaye? Woosi owenyaa kuva umulina wi lirova yekolaa umusigu wa Nyasaye.

⁵ Muganaganaa agiligali sigaveeye mu Mang'oda Matakatifu gavoora ndi, “Roho wa Nyasaye yavika amenye mu kunyi, yizuuyi likayirwa lilulu.”

⁶ Navuzwa zimbavasi zia Nyasaye akohezaa ziveeye ni zinguru ligali kuli Mang'oda Matakatifu gavoora, “Nyasaye ahingiraa avigingiri, navuzwa ahaanaa, zimbavasi ku vegehiza.”

⁷ Kunangwa, mwegehizi ku Nyasaye; Muhingiri Setani, naye alamwiruka.

⁸ Mwisuundi ahimbi ku Nyasaye naye alisuunda ahimbi ku munyi. Mwiganili munyi avoni; mutakase mioyo jinyu, munyi avagadaa.

⁹ Muve no vovereri, muliri kandi musiome! Liseka lienyu ligirung'anywi kuva lilira, lisangala lienyu live liverera.

¹⁰ Mwegehizi munyi aveene imbiri wu Mwami, naye alamunenehiza.

Lieganihiza ku likalagira Mukristayo

¹¹ Avaamitu vange, mutamonyana aveene na vene mba. Niiva ulamonya Mukristayo wache anoho umukalagiri omonyaa Lilaga kandi ulikalagira. Niiva ulakalagira Lilaga, sioveeye mulala ku yavo avaliloondaa mba, navuzwa oveeye mulala ku avalikalagira.

¹² Nyasaye yenyine niyie oveeye umuhaani wamalago kandi umukalagi, oyo yenyine niyie unyala kohonyia kandi kudiviza. Ivi uganaganaa oveeye vwaha kukalagira uwacho woovo?

Lieganihiza ku liekonya

¹³ Kalunu mumbulirizi, munyi avamuvolaa, “Kalunu anoho mugamba kulazia mu lidaala navoleve, lwa na komenye umuhiga mulala, ni kukiranyia konyoole mabese manyingi.”

¹⁴ Simumanyi livamwoyo lienyu mugamba nalive ki? Muveeye vuzwa kuli umwoki ogololekaa vuzwa ku ing'inga ngekeeke, ma gogota.

¹⁵ Ngano muvooraa: “Mwami nayanza nakove mwoyo ma nakokole yaga anoho gala.”

¹⁶ Navuzwa kalunu mwigingiraa kandi molekonya. Liekonya kuli yili liveeye lidamanu.

¹⁷ Kunangwa yavo vatakola vulahi vwa vaduukana vakole, vaveeye na mahiolo gu vwoni.