Vakolosai 3 - KITABU KITAKATIFU

¹ Kunangwa ni muva ni mwasimugukizwa na Kristo, muviiki zing'anagani zienyu ku ivindu viveeye mwigulu, aha Kristo yikaye ha mukono mulungi gwa Nyasaye.

² Muviiki zing'anagani zienyu ligali ku vindu viveeye igulu, mutaganagana vindu via hasi mba.

³ Munyi mwamala kukuza na livamwoyo lienyu liaviswa na Kristo mu Nyasaye.

⁴ Kristo aveeye livamwoyo lienyu liagiligali, kandi lwa liloleka, ahene yaho munyi mulakaloleke harara naye, mu uvukumi vwivwe.

Limenya likulu ni lihia mu Kristo

⁵ Kunangwa gamuduukira mutuliziho liegomba liosi livivero vienyu iviveeye mumunyi kuli ovoheyi, kifavwi, liegomba lio muviri, kandi iliaduka mu muviri ni likayirwa lidamanu, kandi kusigamira vifananyi.

⁶ Vandu vegomba vindu kuli yivi, uvutima vwa Nyasaye vulaza kuvo.

⁷ Munyi kandi mwamenya kolondekana ni likayirwa lie vindu yivi zing'inga ziavita, lwa mwamenya mu vindu via mwali ni mwamiifwa navio.

⁸ Navuzwa kalunu gamuduukira mutuliziho vindu yivi viosi; uvutima, likayirwa lidamanu, livihirirwa, amanyego na makuva madamanu gatatula mu minwa jinyu mba.

⁹ Mutaveherana aveene na aveene mba, kigira mumali kutulizaho liiva lia kale harara ni milima jinyu.

¹⁰ Mumali kwivika kandi liiva lihia. Yili ni liiva lia Nyasaye, alikola vuli ing'inga kuva ni liiva kuli lilie mwene kuduuka mu limanya liduukiru lilie.

¹¹ Kulwa yaga sihaveeyeho niliavukanyia hagati hu Muguriki nu Muyuda, anoho likevwa nilivula kukevwa, anoho wamanya nutamanyi miima, anoho musiru nu mugeri anoho mutugwa, anoho muvoholore; navuzwa Kristo aveeye viosi, kandi aveeye mu viosi.

¹² Kunangwa kuli avandu vatovole va Nyasaye, avaveeye avatakatifu na vayaanzwa, muve nu mwoyo gwi zimbavasi, vogoosi liegehiza, vohoma kandi, vwikuziri.

¹³ Mwikuzirane aveene naveene, na niiva mulala aveeye ni likuva liu kwililira ku uwache, vasamiihane, kuli Mwami yamusamiiha.

¹⁴ Kuvita vindu yivi viosi, muve nu uvuyanzi uvuhambanyia ivindu viosi harara vulahimu vulala vuduukiru.

¹⁵ Muleke mirembe ja Kristo ahaanaa jamiihi mu mioyo jinyu, kigira mirembe yiji, Nyasaye yamulanga muuzi mwosi harara mumuviri mulala, muve kandi nilisandiza.

¹⁶ Muleke likuva lia Kristo limenye mu mioyo jinyu ligali. Mwigizane nokogerihizana aveene naveene mu vogeri vwosi. Mwimbi kandi zizaburi ni zinyimbu zindakatifu. Musandiza Nyasaye mu mioyo jinyu.

¹⁷ Ku viosi via mukoraa anoho mulivoola, mukore viosi mu lieta liu Mwami Yeso, musandizi Nyasaye Baba kuvitira mu uyu.

Malago gi limenya liu Vukristayo

¹⁸ Munyi avakali, mwegehizi ku vasaza vinyu, kigira yaga nigo gamudukira mukore kuli Vakrisitayo mu Mwami.

¹⁹ Munyi avasaza, muyanze avakali vinyu, mutava valulu kuvo mba.

²⁰ Munyi avana, muhuliri aviivuli vinyu mu vindu viosi, kigira yaga nigo gayaanziza Nyasaye.

²¹ Munyi viivuli, mutagondokela avana vinyu mba, kigira valakuza mioyo.

²² Avatugwa, muhuliri avami vinyu vu mu lirova mu vindu viosi, sigaveeye lwa vamulola kigira mwenya vamuyaanze, navuzwa mukore vutugwa yivwo numwoyo mulahi kigira mwatia Mwami.

²³ Ku viosi via mukora, muyinziri numwoyo gwosi kuli avatumikiraa Mwami, gatava kuli avatumikiraa vandu mba.

²⁴ Mwizurizi ndi Nyasaye alakamuhe madanyi gayaviikila vandu veve, kigira Kristo niyie Mwami wiligali wamutumikiraa.

²⁵ Uyu okolaa uvudamanu alanyoola uvuchamu vwivwe vwa yakola, kigira sihaveeyeho niliverera kutura ku Nyasaye mba.