Vakalagi 16 - KITABU KITAKATIFU

Samusoni ha Gaza

¹ Lidiku lilala Samusoni yazia mu lidaala lia Vafilisitia lia Gaza, wa yanyoora ililaya ma nivagona harara naye.

² Avandu va Gaza vahulira ndi Samusoni aveeye mu lidaala, na vaakumbuliza havundu zana, nivamulindilira uvudiku vwosi ha kilivwa chi lidaala. Vachiring'ana uvudiku vwosi nivaganagana aveene na vene, “Kulaliinda kuduuka vuchi, ma kumwiti.”

³ Navuzwa Samusoni yaagunza mu kidali kuduuka sasita ziu vudiku. Yamanya navuuka nagumira ikilivwa chi lidaala, naaking'usa ni yiiha imiliango, ivivia, amakafuri harara ni vindi viosi. Yavivugula kuli viali ndio viosi naaviviika ku mavega geege, navigiinga kuduuka kondongozi kwi kiguru ikikagatani na Heburoni.

Samusoni na Delila

⁴ Yaga nigaavita, Samusoni yaayanzana nu mukali wundi walangwa Delila, uwamenyaa mulivoona lia Soreku.

⁵ Wamihi vatano va Vafilisitia vaza ku Delila nivamuvoolera “Lola kuli unyala kumugonya akumanyie ahizingulu zizie zitulaa, ma kandi kuli kunyi kunyala kumuguuta, kuduuki kumugumira nukumukola adake zinguru. Vuli mulala wiitu alakuha izisilingi elefu indala ni imia indala.”

⁶ Kunangwa Delila yavolera Samusoni namuvolera, “Mbolera ahizingulu zizio ziveeye. Niiva umundu yenya kokovoha nokokolomba udake uvunyali, anyala kokora ndi?”

⁷ Samusoni yamuvolera, “Niiva umundu anyala komboha ni migoye saba ming'erere juvuta ijikikiri imivisi, ndageha izingulu nukuva kuli avandu vandi.”

⁸ Kunangwa vimiliri va vandu va Filisitia valetera Delila imigoye saba ja makambi amavisi. Naye yamanya navooha Samusoni ni migoye zana.

⁹ Delila yaali naavisi avandu vasaza mu keng'oze chinyumba yeyo. Yahanzuka, “Samusoni, vandu va Filisitia vamali kuduuka!” Navuzwa Samusoni yaagadulanyia imigoye ju vuta na jagaduka kuli ekedonye chu luvusi lugadukaa lwa kiviikwa ku muliru. Kunangwa vandu va Filisitia sivamaya ahizingulu zia Samusoni ziaviswa mba.

¹⁰ Delila yamanya navolera Samusoni, “Ivi ongoli umusiru ligali; ombeheye. Kalunu mbolera kuli unyala kovofa.”

¹¹ Samusoni yavolera Delila, “Niiva nyara kovofwa ni migoye imihia, ijikikiri kutumikilwa ku, Inzi ndava mudedekere kuli avandi vandu vosi.”

¹² Kunangwa Delila yavugula imigoye imihia nukumuvoha. Maku yahanzuka, “Samusoni! Avandu va Filisitia vazaa!” Avandu zana vaali nivalindilira mu keng'oze. Navuzwa yagadula imigoye yijo kuli umundu agadulaa uluvusi.

¹³ Delila yavolera Samusoni, “Ivi ungadaa no kongola musiru nuvula kombolera agiligali. Mbolera kuli mundu anyala kokovoha.” Samusoni yamuvolera, “Niiva unyala kuvugura ivisutuka saba vie liisu liange ma uvivohe nu vuvusi vudinyu, zizingulu ziange zilageha, na Inzi ndava vuzwa kuli avandu vandi vosi.”

¹⁴ Delila yakola Samusoni naagona, manaavugura ivisutuka saba vie liisu lilie, ma naalivoha vudinyu. Yahanzuka, “Samusoni! Avandu va Filisitia vazaa!” Navuzwa Samusoni yavuka vwangu naang'usa visutuka nivilekana.

¹⁵ Delila yamuvolera, “Unyala kovora ndi wainyaanza, lwa ombehelaa. Ongoli umusiru haali kavaga, na kuduuka kalunu ukikiri kombolera ikindu kekolombaa nuuva ni zinguru ligali.”

¹⁶ Delila yamenya namuteeva vuli lidiku. Samusoni yamanya naaluhilira mang'ana gu mukali uyu, kali umwoyo gwigwe nigulwala kuduuka navolera Delila agiligali.

¹⁷ Samusoni yavolera Delila, “Inzi kutura ninzivulwa, sindaavegwa ku no logembe mba. Ndaagwa Munaziriti ku Nyasaye kutura ninzivulwa. Niiva iliisu liange linyala kovegwa, izingulu ziange zilava nizifeeye ligali, na Inzi ndava vuzwa kuli avandu vandi vosi.”

¹⁸ Lwa Delila yamanya ndi Samusoni umali kumuvolera agiligali, yatuma ling'ana ku vami va Filisitia navoora, “Yirani kandi; umali kombolera agiligali goosi.” Maku vami va Filisitia viirana na mabese.

¹⁹ Delila yaahomberiza Samusoni kuduuka lwi zindolo ziamuhilira ku maguru geege. Delila, lwa yalora Samusoni niyakagona, yalanga umundu mulala namuvolera avege Samusoni ivisutuka saba vie liisu lilie. Maku umundu waavega Samusoni yaatanga ilimukubiza ikivi kigira Samusoni yaali ni yakageha izingulu.

²⁰ Maku Delila yahanzuka, “Samusoni! Vandu va Filisitia vazaa!” Samusoni yavuka nasuuvira alavuuka mazie chova kuli kazozo. Siyamanya Yahova yaali naamuleki mba.

²¹ Vandu va Filisitia vamugumira nivatuliza zimoni zizie ma nivasulunguta naye mu lidaala lia Gaza nukumuvoha ni minyororo jumugasa. Vamuniga kusia ku lugina muvuhambe.

²² Navuzwa iliisu ku mutwi gwigwe liatanga kuviruka kandi.

Likuza lia Samusoni

²³ Avami va Filisitia vaagana harara kuhaana ikihaanwa ekenene ku munyasaye wavo gwalangwa Dagoni. Viimba, “Nyasaye wiitu okoheeye iliguuta ku musigu wiitu Samusoni!”

²⁴ Lwa vandu valora Samusoni, vizominya munyasaye gwaavo nivavoora, “Munyasaye wiitu ukuguutiyi umusigu wiitu, Uyu uwononyia ikivala chiitu kandi naakwita kuvita ekegero.”

²⁵ Lwa vaali ni vakasangala ligali mu mioyo jaavo, vavoola, “Leeti Samusoni akokole kusangale.” Maku valanga Samusoni kutura muvuhambe, navavinira mulivayaanziza vaduuki kusangara. Maku vamuhira nasingira hagati hi zitiru ziviri.

²⁶ Samusoni yavolera umuyaayi wamuleeta mulivugana zana, “Ngonya nzisundi ahimbi ni zitiru zigumira litembeli yili, kunangwa nduuki kudiira kuzio.”

²⁷ Litembeli zana yili liveeye mu na avandu du, avakali na vasaza. Aviimiliri va vandu va Filisitia vaali mu vosi; kandi avakli na vasaza ahimbi 3,000 vaali nivikaye igulu nivaloraa kuli Samusoni yavasangalizaa.

²⁸ Maku Samusoni yasaala navoora, “Yahova Wuvunyali, mwaza nzizuliza; mwaza, Nyasaye, mbe zinguru ziange ing'inga yiyi yenyine vuzwa, oleke mbanze ikisalia ku vandu va Filisitia kigira zimoni ziange ziviri yizi.”

²⁹ Kunangwa Samusoni yagumira izitiiru ziviri zia hagati hi litembeli. Yagumira amakono geege ku vuli itiiru ma nazilumba.

³⁰ Samusoni yahanzuka navoora, “Leka nguzi na vandu va Filisitia!” Maku yalumba izitiiru ni zinguru zizie ziosi. Maku litembeli liagwa ku vimiliri vosi, harara na vandu vaali mu vosi. Samusoni yita avandu avanyingi mulikuza lilie kuvita vayaali niyiita lwa yaali mwoyo.

³¹ Avamwavo veve na vandu vinyumba ya baba weve vasulunguta ni vazia kuvugura umuviri gwigwe. Vamuleeta nivamuyavira hagati ha Zora na Eshitaoli mu kilindwa cha Manoa baba weve. Yamiha Isiraeli ku mihiga sirini.