Vagalatia 2 - KITABU KITAKATIFU

¹ Inyima wi mihiga likomi najine, ndirana Jerusalemi harara na Baranaba kandi Tito.

² Ndaazia kigira Nyasaye yambolera nzie yo. Mu livugana lia aviimiliri veng'ine, ndaavivaalira makuva gi Ivangeri ya ndilwaza ku vandu vizihiiri. Ndakora ndio kigira ndeenya miyinzi jange ja ndaali nindakola kale ni ja ngolaa kalunu jivuli kwoneka.

³ Navuzwa uwache wange Tito, kali naveeye Muguriki, siyaanigwa kokevwa mba,

⁴ kali niiva valala venya akevwe. Amakuva yaga gaatulira kigira avalala ku avaamitu vingira mu kiduma chiitu machiriri kuli vatunyirizi vaduuki kutunyiriza ovovonolore vwitu vwa koveeye navwo kuvitira mu Kristo Yeso. Venya kokokola kove avatugwa.

⁵ Sikwavugilira ku lienya liavo kali hakuzu mba. Kunangwa, kwenya agiligali gi Ivangeri gaduuki komenya mumirembe kigira munyi, vugira kwononywa.

⁶ Navuzwa ku yavo avaloleka kuva vaveeye aviimiliri vanene hagati ha vandu avasuuviraa, mboraa yaga kigira ovonene vwavo sivoveeye ni kivuni ku inzi mba. Nyasaye siakalagaa ku lihenza ligondo lie chova liu mundu mba. Aviimiliri yavo, si vaali ni kindu chokomeda ku Ivangeri ya nzilwazaa yiyi mba.

⁷ Navuzwa mu vogono vwo komeeda zing'anagani zimbia ku inzi, valora ndi Nyasaye yaali namali kuhaana ku inzi uvutumwa vwu muyinzi gwu kwilwaza Ivangeri ku vandu vizihiiri, kuli Petero naye yatumwa kwilwaza Ivangeri ku Avayuda.

⁸ Kuzinguru zia Nyasaye, ndaakorwa mutumwa ku vandu vizihiiri, kuli Petero naye yakolwa mutumwa ku Avayuda.

⁹ Yakobo, Petero na Yohana avaloleka kuva nivo aviimiliri vanene, vamanya ndi Nyasaye umali kuhaana ku inzi muyinzi muduukiru, kunangwa vavugilira Baranaba ninzi kuli avasangi muvutumwa. Kunangwa vaakucheliza. Kwavugilizana ndi Baranaba ninzi kokole miyinzi hagati ha vandu vizihiiri, navo vakole miyinzi hagati ha Avayuda.

¹⁰ Icha vateva vuzwa chaali ndi, kwizulizi avasuuviri vadaka mu Jerusalemi, yiki nicho kindu cha mbeeye ni lienya kukekola.

Paolo agondokeraa Petero ha Andiokia

¹¹ Navuzwa lwa Petero yaduuka Andiokia, ndaahing'ana naye ligali imbiri wa avandu vosi kigira yaali naagoli vudamanu.

¹² Lwa avandu valala ava Yakobo yaali natumi vaali ni vakikiri kuduuka, Petero yaali nalizaa viukulia harara na vandu vi vizihiiri avasuuvira. Navuzwa lwa avandu yava vaduuka, yagirung'ana naleka lilia harara na vandu vizihiiri, kigira yatia yavo avenyaa Avizihiiri vakevwe.

¹³ Kali avaamitu Avayuda vandi navo kandi vahambana naye mu kekolwa chavo chu vuti na chu vugadi yiki; kali Baranaba naye yaagotizwa kandi ne kekolwa chavo chu vugadi.

¹⁴ Lwa ndaalora ndi ligenda liavo ku lovega lwa agiligali gi Ivangeri si liali lirungi, ndagondokera Petero imbiri wavo vosi, “Ivi oveeye Muyuda, na wamenyangi kuli vandu vizihiiri, si gaali kuli Muyuda mba! Ivi unyala ndi kogeriza kuniga vandu vizihiiri vamenye kuli Avayuda?”

Avayuda na vandu vizihiiri vahonywa kuvitira mu lisuuvira

¹⁵ Agiligali kunyi aveene koveeye Avayuda mu liivulwa lietu na sikoveeye “Avandu vizihiiri voni” kuli yavo valangwa mba.

¹⁶ Navuzwa kunyi kumanyi ndi mundu akolwaa mulungi na Nyasaye kuvitira mu lisuuvira mu Yeso Kristo, na sigaveeye ku likora agi Lilaga lienyaa mba. Kunyi kandi, kumali kusuuvira mu Kristo Yeso kuduuki kokolwa avalungi imbiri wa Nyasaye ku lisuuvira lietu mu Kristo, kigira mu miyinzi ji Lilaga mundu sianyala kokolwa mulungi mba.

¹⁷ Niiva kogerizaa kwenya kokolwa avalungi imbiri wa Nyasaye mu Kristo, kunyi kololeka kuva avoni kuli vandu vizihiiri vaveeye; yaga gaveeye kovora ndi Kristo adinyirizaa likora uvwoni? Awa! Sigaveeye ndio kali hakuzu!

¹⁸ Navuzwa niiva ndirana kwumbaka vuhia mwima gwi lilaga gwa ndaasambura, kunangwa ndolekaa mwene ligali kuva muhioli wukuvunaga lilaga.

¹⁹ Kuvitira mu Lilaga inzi ndaakuza kigira Lilaga, kunangwa nduuki kuva mwoyo mu Nyasaye.

²⁰ Ndaavambwa harara na Kristo ku musalaba, na kalunu mbeeye mwoyo. Siaveeye ni inzi oveeye mwoyo navuzwa ni Kristo oveeye mwoyo mu inzi. Livamwoyo lia mbeeye nalio kalunu yili, mbeeye nalio mu lisuuvira; lisuuvira mu Mwana wa Nyasaye, uwanyaanza kuduuka nahaana livamwoyo lilie kigira inzi.

²¹ Sisulaa zimbavasi zia Nyasaye mba. Mundu naava naakolwa mulungi imbiri wa Nyasaye ku Lilaga, gaveeye kovora ndi, Kristo yakuza vugira kivuni!