Ruth 1 - KITABU KITAKATIFU

Avandu Vinyumba ya Elimeleki vazia Moabu

¹ Mu madiku yago lwa vakalagi vaali nivamihaa, inzara yaali ho mu kivala cha Isiraeli. Mundu mulala wa Bezelehemu yi Vuyuda yazia komenya mu Kivala cha Moabu, harara nu mukali weve na vayaayi veve vaviri.

² Lieta lilie liali Elimeleki, mukali weve yalangwa Naomi, kandi vayaayi veve vaali Mahaloni na Kilioni. Vaali avihiiri ya Efurazi. Vazia mu kivala cha Moabu, nivamenya yo.

³ Navuzwa Elimeleki, musaza wa Naomi, yakuza namuleka harara navayayi veve vaviri.

⁴ Navo valeta avakali va Moabu, Oropa, na Ruzi. Inyima wi mihiga likomi,

⁵ vombi, Mahaloni na Kilioni vaakuza, kunangwa Naomi yalekwa yeng'ine vugira musaza noho avayaayi.

Naomi na Ruzi Viirana Bezelehemu

⁶ Lwa Naomi yahulira naveeye mu Moabu ndi, Yahova yaali nagasizi avandu veve kulwu kuvaha ligesa lilahi, yetegeka kutura mu Moabu harara na avanavizara veve.

⁷ Vatanga logendo lwavo kwirana mu kivala chi Vuyuda.

⁸ Navuzwa Naomi yavolera avanavizara veve vombi, “Mwirane yengo winyu, mumenye na avamama vinyu. Yahova amukolere vulahi, kuli mwakolera vulahi avakuzaa harara na inzi.

⁹ Yahova amuhe ovososi; samulala ku munyi anyoore musaza wundi kandi ave na hango.” Kunangwa Naomi yavavuusa naavasiivula. Navuzwa vatanga kulira vudinyu

¹⁰ nivamuvoolera, “Awa! Kulirana harara nivi ku avandu vovo.”

¹¹ Navuzwa Naomi yavavolera, “Kuduuka mwirane yengo winyu vakana vange. Kigira ki mwenya munonde? Muganaganaa nyara kwivura avayaayi vandi avaazaa vave avasaza vinyu?

¹² Yirani yengo vakana vange. Inzi mbeeye mukeere ligali utanyala kuva nu musaza wundi kandi. Kali nimba ndakavooye mbeeye nilisuuvirizwa, manyoole musaza vudiku vwa lero, kandi nyoore avayaayi vandi,

¹³ mwakalindi kuduuka lwa vaviruka? Mwakigayi koleetwa na vasaza vandi? Awa! Vakana vange, yago siganyalika mba. Muvererera ligali, kigira Yahova wayingirung'ana.”

¹⁴ Ma vatanga lilira vudinyu kandi. Kunangwa Oropa yavusa navizara weve namusiivula, navuzwa Ruzi yahaanda kuye.

¹⁵ Ma Naomi yavolera Ruzi, “Henza uyu muhalikwa woovo yirana ku vandu veve nuku vanyasaye veve. Ivi wirane olonde muhalikwa woovo.”

¹⁶ Navuzwa Ruzi yativura, “Utaaniga ngoleke mba! Leka nzie harara nivi. Hoosi ha uzia inzi kandi ndazia ho; hoosi ha omenya, inzi ndamenya ho. Avandu vovo valava avandu vange, na Nyasaye woovo alava Nyasaye wange.

¹⁷ Hoosi hukuzira, inzi ndakuzira ho, kandi niho ha ndiyavilwa. Yahova ambe amaduywa manene kuvita goosi, niiva ndaavukanywa niivi, nitali likuza lieng'ine.”

¹⁸ Lwa Naomi yalora Ruzi usaaviyi kuzia harara naye, yaleka kovolerana naye.

¹⁹ Na vombi vazia harara kuduuka lwa vaduuka Bezelehemu. Lwa vaduuka Bezelehemu, lidaala liosi lialangilira kigira yava, kandi avakali vilidaala vavoola, “Uyu ni Naomi!”

²⁰ Naye yavavolera, “Mutanangi, Naomi mba. Muunange, ‘Mara’ kigira Nyasaye Wanyala Viosi okoli livamwoyo liange kuva lilulu.

²¹ Ndaatula hano nimbeeye mutugi, navuzwa Yahova unziranyi umwere. Kigira ki muunange Naomi, lwa Yahova Wuvunyali amali kuundambiza, na Yahova Wuvunyali oleeti ikivi ku inzi?”

²² Kunangwa Naomi yirana kutura Moabu harara na Ruzi navizara weve. Vaduuka Bezelehemu mu litanga lie ligesa ingano.