Lwimbu lwa Solomoni 7 - KITABU KITAKATIFU

Musaza

¹ Ivi oveeye mukaana mulahi ligali! Zinduvatiru zizio ziveeye zindahi ligali mu vilato. O, Mukaana wu vwami! Vilenge vivio viveeye kuli amagina guvuguli, viveeye kuli miyinzi ju mulongi.

² Ibakuli eveeye hagati havio, yizula iwaini yu mudarasini. Oloseese lulwo loveeye kuli kitumi chingano; chakumberizwa ni kimuli.

³ Zimbeere zizio ziveeye kuli visusu viamalongo; kuli zimbongo ziviri.

⁴ Ligoti liilio liveeye kuli munara gwu lwiga lwenzogu. Zimoni zizio ziveeye kuli visima via madavalia ga mazi, mulidaala lia Heshiboni, ahimbi ni kilivwa chi lidaala linene lia Bazirabimu, amuru googo gayaanziza kuli munara gwa Lebanoni kolovega lwa Damasiko.

⁵ Mutwi gugwo gwa singira vulungi kuli kiguru cha Karimeli. Liisu liilio lia sitwa ling'ereng'anaa kuli inguvu indahi, vulahi vwalio vunyala kuviika mwami muvuhambe.

⁶ Ivi oveeye mulahi ligali, Oveeye uyanziza; vuyanzi vwuvwo vwosi voveeye vuduukiru.

⁷ Ivi oveeye ni zimbavasi kuli musaala gwu munazi, kandi zimbeere zizio ziveeye kuli kisaga cha makuyu.

⁸ Ndanina ku musaala gwu munazi, na nzaguli makuyu gagwo. Zimbeere zizio ziveeye kuli visaga via makuyu ku inzi, mwika gugwo goveeye kuli muhomo gwa makuyu,

⁹ munwa gugwo guveeye kuli iwaini indahi. Maku oleke iwaini yitululuki kuduuka ku muyanze wange, yitululuki ku munwa gwigwe kandi kuminu geege.

Mukali

¹⁰ Inzi mbeeye wu muyanze wange, kandi lienya lilie liveeye kuinzi.

¹¹ Muyanze wange hamba kuzie mumilimi, kandi kogone mu madaala.

¹² Kuzie mu vizabibu vuli mugambazuri, na kolole niiva mizabibu jitulizi kimuli, kandi niiva kimuli cha makuyu kisiahi. Kandi kolole niiva makuyu gatulizi kimuli. Ahene yaho, ndakuha vuyanzi vwange.

¹³ Unyala kufunyiriza muhomo gwi misaala mihia, kandi makuyu malahi goosi gaveeye ahimbi nu muliango gwitu. Muyanze wange inzi mali kukuvikila makuyu malahi zing'ano ziosi, amakuyu kandi amahia.