Lwimbu lwa Solomoni 5 - KITABU KITAKATIFU

Musaza

¹ Inzi mali kwingira mu mulimi gwange, muyanze wange, kandi muselerwa wange, mbungizaa mudalasini gwange kandi vifunya mwayu, ndiza vwuki na mana gene; Nwezaa iwaini yange kandi maveere gange. Vayanze vange, mulie kandi munwi kuduuka lwa muhaambika vuyanzi!

Mukali Lwimbu lwa Kane

² Lwa ndagona, mwoyo gwange gwahenzaa. Ndalota ndi muyanze wange yigulihiza kumuliango. Muyanze wange, leka nzingili munyumba. Muyanze wu mwoyo gwange, likuulu liange. Lime lizuuyi ku mutwi gwange, kandi mazi ge lilumbi gizuyi mulisu liange.

Musaza Mukali

³ Inzi mali kutuliza zinguvu ziange; kigira ki nzirane kuzievika? Mali kwisaava vilenge viange, kigira ki nzirane kuvimwaminya?

⁴ Muyanze wange yavika mukono gwigwe ku mukono gwu muliango; kandi ndasangara ligali kigira yaali himbi ninzi.

⁵ Ndaali ninzitegeki kumwingiriza, makono gange gaali ni gizuyi vifunya mwayu. Videte viange viveeye ni vifunya mwayu via mazi. Lwa ndamamira mukono gwu muliango;

⁶ Ndigulila muyanze wange muliango, navuzwa yaali namali kuzia. Ndaali nuvuha vonene kuhulira mwoyo gwigwe! Ndamwenya, navuzwa sindamunyoora mba; ndamulanga, navuzwa siyahugila mba.

⁷ Avasikari vagendagenda mu lidaala linene vanyoola; vangubaga kandi nivasaliriza; avalindi valinda lidigi lie lidaala linene vatandula isuuka yange

⁸ Munyi vakali va Jerusalemi, musuuvirizii; niiva mulanyola muyanze wange, mumuvolere ndi mbeeye mudedekere kigira vuyanzi.

Avalina

⁹ Ivi oveeye mukali mulahi kuvita vosi, muyanze woovo aveeye lugano kutura ku vandi vosi? Aveeye naki kiveeye cho kogenyia kidukanaa kunyi kokohe lisuuviriza lietu?

Mukali

¹⁰ Muyanze wange aveeye wi ligondo lilahi kandi wi zinguru; aveeye mulala yeng'ine kutura mu vakali zielefu likomi.

¹¹ Uvweni vwivwe voveeye vusweyeku kuli izahabu. Liisu lilie liveeye litambi ligali, liveeye limwamu kuli lijikolo.

¹² Zimoni zizie ziveeye zindahi kuli zia makuulu ku zinduru zie migera ja mazi. Makuulu gisinga mumaveele, kandi gasingiraa himbi numugera.

¹³ Zisaya zizie ziyaanzizaa kuli mulimi gwizura zinyasi kandi mudalasini. Minwa jije giveeye kuli vimuli, giveeye miziliru harara ni vifunya mwayu via mazi.

¹⁴ Makono geege galombwa vulahi, kandi yiviika zibede zialombwa ku magina guvuguli Muviri gwigwe goveeye musweyeku kuli miinu geenzogu gavikwamu magina guvuguli.

¹⁵ Vilenge vivie viveeye vilungi kuli zitiru zialombwa ku muse gwa magina gi zahabu. Aveeye nu vukumi kuli vigulu via Lebanoni harara ni midaragwa mitambi.

¹⁶ Limoloma lilie liveeye lilahi ligali, vindu viosi kuye viyanziza. Avakali va Jerusalemi, uyu nu muyanze wange kandi nu mulina wange.