Lwimbu lwa Solomoni 1 - KITABU KITAKATIFU

Lwimbu lwu Kutanga

¹ Yizi ni zinyimbu zindahi ligali zia Solomoni.

Mukali

² Ivi wambusa nu munwa gugwo; vuyanzi vuvwo voveeye vulahi kuvita iwaini.

³ Wivaki maguta gu muhomo; lieta liilio liveeye kuli amaguta gidorokaa, kunangwa avakali vakuyaanzaa.

⁴ Umbuguli nzie nivi, kandi kwiluki mwami wange nivi, kandi kwiluki ove mwami wange na imbiri winyumba yooyo. Kulayaanza nukusangara harara, kulanwa iwaini, kandi kulayaanzana. Nicho kigira avakali vosi nivakuyaanza!

⁵ O, avakali va Jerusalemi, inzi mbeeye ni ligondo limwamu, navuzwa mulahi ligali, mbeeye mumwamu kuli lihema lia Kedari, navuzwa mbeeye mulahi ligali kuli zisuka munyumba ya Solomoni yu vwami.

⁶ Utanjaya kigira ligodo liange mba, mbeeye mumwamu kigira liuva liasamba ligodo liu muviri gwange. Avavozo vange vaali nu vutima ninzi kandi nivangola kuyinzira mu milimi ji mizabibu. Sindaali mu vwiyangu vwu kuyinzira mu kizabibu change mba.

⁷ Muyanze wange, mbolera, ivi ulazia kwaya haliha chayo cha magondi googo? Galazia kososa haliha ing'inga yu mbasu mululu? Kigira ki inzi ngohenze hagati hi chayo cha magondi ga vayi vandi?

Musaza

⁸ Niiva si wamanya havundu, O, mukali mulahi ligali? Zia olonde munzira yi chayo cha magondi zia waye vimeme vie zimburi zizio ahimbi na mahema ga vayi.

⁹ Muyanze wange, uyanzizi avasaza, Kuli ibarasi ingali iyaanzizaa zibarasi zisaza zia magare gu vulwani gu mwami wa Egebeti.

¹⁰ Zisaya zizio ziveeye zindahi ligali ni midindi ji liisu liilio; jayelera ku ligoti liilio kuli magina guvuguli.

¹¹ Navuzwa kulakolombera munyororo gwi zahabu, nigusihiywi ni ifeza.

Mukali

¹² Lwu mwami yaali naveeye mundeve yeeye, maguta gange gu muhomo gekolera lifunya mwayu.

¹³ Muyanze wange aveeye kuli livoho liu muhomo gwa manemane, liveeye hagati hi zimbere ziange.

¹⁴ Muyanze wange aveeye kuli kimuli chu m'mbulimu kilavizaa mu vizabibu via Engedi.

Musaza

¹⁵ Muyanze wange, oveeye mulahi ligali; zimoni zizio zing'ereng'ana kuli zielikulu!

Mukali

¹⁶ O, muyanze wange, ivi oveeye mulahi ligali; kandi unyaanzizaa ligali. Vunyasi vuvisi vulava kidali chiitu.

¹⁷ Misaala ji midaragwa jilava mialiru jinyumba yitu; kandi mwigulu mwinyumba yitu mulalombwa ni misaala ja makaratasi.