Luka 1 - KITABU KITAKATIFU

¹ Avandu vanyingi vamali kokora kuli vanyara kong'oda amakuva gi ivindu viekoleka hagati hiitu.

² Vang'oda ivindu via kwavolerwa na yavo avaari avaloli va moni na moni vi vindu yivio kutura mulitanga, kandi avilwaazi vi likuva yilio.

³ Inzi kandi O, Wuluyali Zeofilo, mali mulihenzeriza ligali nokolohiza vindu yivi viosi kutura mulitanga, na galoleki ndi, ni vulahi ku inzi ngong'odere vindu viosi kuli viveeye.

⁴ Ngoli ndio kunangwa uduuki kumanya agiligali gi ivindu viosi via wigizwa.

Lilaandizwa lie liivulwa lia Yohana Mubatizi

⁵ Mu madiku ga Herodi yaali Mwami Munene wi Vuyuda, yaali ho musaalisi mulala walangwa Zakaria, kutura ku avinyumba yu musaalisi Abija. Mukali weve yalangwa Sabeti; yaali mulala ku avakaana vi kisukururwi chu Musaalisi Haruni.

⁶ Vosi vaali avalungi imbiri wa Nyasaye, kandi vaatia ligali nokolonda malago na makuva gu Mwami vugira imbara.

⁷ Navuzwa sivali numwana mba, Sabeti yaali umugumba, kandi vosi vaali vahindira ligali.

⁸ Lidiku lilala Zakaria yaali naakoraa miyinzi ju vusaalisi imbiri wa Nyasaye mu Litembeli kuli lilohiza lia vuli lidiku lialange.

⁹ Yatovolwa nikura kuli mwima gwu vusaalisi, kwingira mu Litembeli liu Mwami, asambe kimuli ku vwali.

¹⁰ Kiduma kenene chavandu vaali ni vasaala ichova ing'inga yukusaamba kimuli.

¹¹ Engelosi wu Mwami yaloleka kuye nasingiyi ku mukono mulungi gwu vwali, olovega lwi kimuli chasambirwa.

¹² Lwa Zakaria yamulola, yahenda mwoyo kandi naatia ligali.

¹³ Navuzwa engelosi yamuvolera, “Utatia mba, Zakaria, kigira Nyasaye ahuliyi lisaala liilio. Mukali woovo Sabeti alakwivulira mwana muyaayi, na ulamugulika Yohana.

¹⁴ Ulakave nuvusangali kandi nuvuyanzi, na avandu vanyingi valakasangala ku liivulwa lilie.

¹⁵ Alakave munene imbiri wu Mwami. Si alinwa iwaini anoho amalwa mba, naye aliizula Roho Mutakatifu kutura munda mwa mama weve.

¹⁶ Aliranyia avanyingi ku avandu va Isiraeli ku Mwami Nyasaye wavo.

¹⁷ Alimiira imbiri wu Mwami weve nu mwoyo kandi ni zinguru kuli ziu muporofeti Elija. Alakahambanyie avababa na avana vaavo kandi; alalomba avibaali na avatatiizaa Nyasaye vaganagane kuli avalungi vaganagana; alaketegekiziri Mwami avandu veve.”

¹⁸ Zakaria yateeva Engelosi, “Inzi ndamanya ndi amakuva yaga? Inzi mbeeye musakulu na mukali wange yakeera.”

¹⁹ Engelosi yamutivulira, “Inzi mbeeye Gabirieli usingiraa imbiri wa Nyasaye; na ndumiywi komoloma na ivi, kandi ngoletere makuva malahi yaga.

²⁰ Hulira, ulava idimbidi, kandi siulamoloma mba, kuduuka lwayaga galakekoleke, kigira siwasuuvira makuva gange ivi siulamoloma mba kuduuka lwa malago gaange gali twekizwa.”

²¹ Avandu valindilira Zakaria, nivagenya ku lilindagilira lilie mu Litembeli.

²² Lwa yatura ichova, siyaali anyala komoloma navo mba. Vamanya ndi aloli malola mu Litembeli. Navuzwa yagelagela vuzwa makono ma namenya naveeye idimbidi.

²³ Lwa yamala madiku geege guvutumiki mu Litembeli yirana yengo weve.

²⁴ Inyima wa madiku yago, mukali weve, Sabeti yavereka. Yivisa munyumba ku mieli jitano navoora;

²⁵ “Kalunu Mwami amali kumanyia zimbavasi zizie ku inzi. Anduliziyi zisoni ziambezaa nazio imbiri wa vandu.”

Lilaandizwa lie liivulwa lia Yeso

²⁶ Mu mweli gwa sita Sabeti naveeye ninda, engelosi Gabirieli yatumwa na Nyasaye kuzia Nazareti, lidaala lia Galilaya.

²⁷ Yaali na makuva ku mukaana mugima, uwalangwa Maria, uwaali niyateevwa koleetwa nu mundu mulala uwalangwa Josefu, wi kisukululwi cha Daudi.

²⁸ Engelosi yazia kuye namuvolera, “Mirembe Maria! Ivi ugasiziywi ni zimbavasi zinyingi! Mwami aveeye harara na ivi.”

²⁹ Navuzwa lwa Maria yahulira amakuva yaga, yaahenda mwoyo ligali ku makuva geege, naganagana mumwoyo ichi licheliza yili livoora!

³⁰ Engelosi yamuvolera, “Utatia mba, Maria, kigira Nyasaye akovereye zimbavasi.

³¹ Henza! Ivi ulavereka na ulivuula mwana muyaayi na ulamugulika, Yeso.

³² Alakave Munene kandi alakalangwe, Muyaayi wa Nyasaye Oveeye igulu Ligali. Mwami Nyasaye alakamukole alave Mwami kuli guuga weve Daudi.

³³ Alakamiihi ku avandu va Isiraeli mihiga ni mihiga, Uvwami vwivwe sivulakave nekeheri mba.”

³⁴ Maria yateeva engelosi, “Yaga galanyalika ndi, kigira inzi mbeeye mugima?”

³⁵ Engelosi yamutivulira, “Roho Mutakatifu alaza ku ivi, kandi zinguru zia Nyasaye oveeye igulu Ligali zilakukinga kuli kiriri. Kulwayago mwana wa ulivuula alakalangwe Mutakatifu, Mwana wa Nyasaye.

³⁶ Umanye kali Sabeti mwiko woovo, umali kovereka mwana muyaayi mu vokeere vwivwe. Yigu nu mweli gwigwe gwa sita, wa vandu valanga mugumba.

³⁷ Kigira ku Nyasaye, si keveeye ho kindu ikitanyalikaa mba.”

³⁸ Maria yavoola, “Henza inzi mbeeye mutumikiri wu Mwami. Gave ku inzi kuli aga ovooye.” Kunangwa engelosi yatura kuye.

Maria Yageniha Sabeti

³⁹ Ku ing'inga yeyo, Maria yetegeka, nalomba logendo kuzia vwangu mu lidaala lilala liveeye muvigulu vie Vuyuda.

⁴⁰ Yingira munyumba ya Zakaria, nacheliza Sabeti.

⁴¹ Lwa Sabeti yahulira licheliza lia Maria, mwana yakina nuvuyanzi munda mwimwe. Sabeti yizula Roho Mutakatifu,

⁴² na yahanzuka numwoyo munene, “ Ivi ugasiziywi ligali hagati ha vakali vosi, kandi agasizwi umwana wa ivi ulivuula!

⁴³ Inzi nivwaha kali mama wu Mwami wange yaaze ku inzi?

⁴⁴ Kigira lwa mbuliyi mwoyo gwi licheliza liilio, mwana akini munda mwange nuvuyanzi.

⁴⁵ Oveeye nuvugasu ivi uwa suuvira ndi, agu Mwami yakuvoolera galadukizwa!”

Lwimbu lwi lizominya lia Maria

⁴⁶ Maria yavoola, “Mwoyo gwange gwizominyaa Mwami.

⁴⁷ Kandi mwoyo gwange gusangali kigira nu Nyasaye, Muhonyi wange.

⁴⁸ Kigira wizulizi Iiiva liu vwegehizi vwange. Mukaana Mutumikiri weve! Kigira kutura kalunu amakura ga avandu vosi galananga, vuyanzi.

⁴⁹ Kigira Nyasaye Wizingulu angoleeye vindu vinene; lieta lilie liveeye litakatifu.

⁵⁰ Zimbavasi zizie ziveeye ku makura namakura, ku avandu vahaana luyali kuye.

⁵¹ Akoli vindu vie zinguru nu mukono gwigwe: Usalanyi avigingiri mu zing'anagani zie mioyo jaavo.

⁵² Waguluyi avami vizingulu kutura ku zindeve ziavo ziu vwami; navuzwa onenehizi avakeekeke.

⁵³ Wigutizi avinzara ni vindu vilahi, O, uvukungi avatugi amakono vugira kindu.

⁵⁴ Vaduukiza lilagana lia yalagana na vaguuga; kandi umali kuza kokonya mutumikiri weve Isiraeli.

⁵⁵ Umali kwizuliza kumanyia zimbavasi, ku Aburahamu ni visukululwi vivie mihiga ni mihiga!”

⁵⁶ Maria yamenya na Sabeti ku ing'inga iduuka imieli jivaga, ma ni yirana yengo wavo.

Liivulwa lia Yohana Mubatizi

⁵⁷ Ing'inga ya Sabeti yu kwivura yaduuka; ni yivula mwana muyaayi.

⁵⁸ Lwa avatende na aviiko veve vahulira ndi Mwami umukoleye zimbavasi zinene, vasangala harara naye.

⁵⁹ Maku lidiku lia munane, vaza kokeva mwana, ni venya ku mugulika Zakaria; lieta lia baba weve.

⁶⁰ Navuzwa mama weve yavoola, “Awa! Alalaangwa Yohana.”

⁶¹ Vamutivulira, “Simuveeye nu mwiko ulangwa lieta yili mba?”

⁶² Kunangwa vagelera baba weve amakono ni vamuteeva lieta liagulika mwana weve.

⁶³ Naye yateeva kibao cho kong'oda ku, yang'oda: “Lieta lilie ni Yohana.” Vosi vagenya.

⁶⁴ Ahene yaho munwa gwa Zakaria gwigulika nululimi lwilwe lwanguha manaamolomaa nakuminya Nyasaye.

⁶⁵ Uvuti vwali ku avatende vosi, na makuva yaga galandizwa mu kivala choosi chu muvigulu Ivuyuda.

⁶⁶ Vosi avahulira yaga, vaganagana mu mioyo jaavo ni vavoola, “Mwana uyu aliva mundu wa lugano ki?” Kigira agiligali gaveeye havulavu ndi zinguru ziu Mwami ziali kuye.

Ovoporofeti vwa Zakaria

⁶⁷ Zakaria, baba wu mwana, yizula Roho Mutakatifu na yaporofeta, navoora:

⁶⁸ “Agasizwi Mwami Nyasaye wa Isiraeli, kigira umali kogeniha kandi ohonyi avandu veve.

⁶⁹ Okoheeye muhonyi wi zinguru kutura mukisukululwi cha Daudi mutumikiri weve.

⁷⁰ Kuli yalaga kale kuvitira mu vaporofeti veve vatakatifu

⁷¹ ndi alakohonyia kutura ku avasigu viitu, kandi kutura kuzinguru zia yavo vosi avadunyira kunyi.

⁷² Yavoola alaveera avaguuga viitu zimbavasi nukwizuliza lilagana lilie litakatifu.

⁷³ Liesuuha lia yisuhira Aburahamu guuga wiitu, liveeye ndi alakuha kuduuki kohonywa,

⁷⁴ kokosola kutura ku avasigu viitu, kuduuki kumutumikira vugira vuti,

⁷⁵ kunangwa kuduuki kuva avatakatifu kandi avalungi imbiri weve, mu madiku goosi gi livamwoyo lietu.

⁷⁶ “Ivi, mwana wange, ulalangwa muporofeti wa Nyasaye Oveeye igulu Ligali. Ulazia imbiri wu Mwami kumulombera zinzira zizie.

⁷⁷ Kulandizira avandu veve ndi, valahonywa kandi valasamifwa vwoni vwavo.

⁷⁸ Nyasaye wiitu aveeye wi zimbavasi kandi umulahi. Alalomba vulavu vwovohonyi vwake ku kunyi kutura mwigulu.

⁷⁹ Vong'ereng'ane ku yavo vosi avamenyaa mu kisundi kenene chi chiriri chilikuza; kwimilira virenge vietu munzira yi mirembe.”

⁸⁰ Mwana yaviruka, nanyoora zinguru mu Roho. Yamenya mwigendanyama kuduuka ing'inga ya yaloleka ku avandu va Isiraeli.