Livalidza 34 - KITABU KITAKATIFU

Zinzako zie Kivala cha Kanaani

¹ Yahova yavolera Musa ahaane

² malago yaga ku vandu va Isiraeli: “Lwa mwingila mu kivala cha Kanaani, kivala cha inzi mbana ku munyi, zinzako zie kivala chiinyu zilava kulindi:

³ Lwako lwi isavaalu lulisunda kutura muchangalangwe cha Zini kuvitira ku lwako lwa Edomu. Lulatangila Ivugwi ma lutwekele Isavaalu winyanza yi Jumbi.”

⁴ Maku lulazia Isavaalu kuduuka Akirabimu na lulazizagilira kuvitira Zini kuzia Isavaalu wa Kadeshi Barinea. Maku lulazia Imadioli wi Ivaale kuzia Hazari Adari kuduuka Luzi Azimoni,

⁵ lulagirung'ana kuzia ku lovega lwi livona ku lwako lwa Egebeti na lulamalilikila kunyanza ya Meditareniani.

⁶ “Lwako lwimadioli lulava inyanza ya Meditareniani.

⁷ “Lwako lwi Ivaale lulatula kunyanza ya Meditareniani kuduuka ku kiguru cha Hori;

⁸ kutura hene yaho luladuuka Hamazi. Lulazizagilira kuzia Zedadi

⁹ kuduuka Zifuroni, ma luduuki ha Hazari Enani.

¹⁰ “Lwako lwi Ivugwi lulava kutura Hazari Enani kuzia Shefami.

¹¹ Maku lulazia Isavaalu kuduuka Habeli Ivugwi wa Aini, kandi kuduuka ku vigulu vie Ivugwi wi kivala keveeye ahimbi ninyanza ya Galilaya

¹² kandi lulazia Isavaalu ku mugera gwa Jorodani kuduuka kunyanza yi Ijumbi. “Yizi zilava zinzako zine zie kivala chiinyu.”

¹³ Kunangwa Musa yavolera vandu va Isiraeli, yiki nicho kivala cha mulinyoola mulikuba zikula kivala cha Yahova amali kuhaana ku zihiiri tisa ni inusu.

¹⁴ Zihiiri zia Rubeni na Gadi kandi inusu yi Ivugwi wa Manase, vamali konyoora miandu jaavo,

¹⁵ kolovega lwi Ivugwi wu mugera gwa Jorodani engeleka wa Jeriko.

Miyinzi ja Vimiliri Kugavura Kivala

¹⁶ Yahova yavolera Musa,

¹⁷ “Yaga na mita ga vasaza valigavula ku munyi kivala kuli miandu jinyu: Elieza musaalisi harara na Joshua muyaayi wa Nuni valagavulanyia kivala ku vandu.

¹⁸ Uvuguli mwimiliri mulala kutura mu vuli hiiri avakonyane kugavura kivala.”

¹⁹ Yaga nigo amita ga vandu vi ihiiri ya Yuda, Kalebu muyaayi wa Jefune,

²⁰ Wihiiri yu muyaayi wa Simioni, Shemueli muyaayi wa Amihudi.

²¹ Ihiiri ya Benjamini Elidadi, muyaayi wa Kisiloni

²² Ihiiri ya vayaayi va Dani, mwimiliri ni Buki muyaayi wa Jogili.

²³ Kuvayaayi va Josefu ihiiri ya Manase mwimiliri yaali Hanieli muyaayi wa Efodi.

²⁴ Ihiiri ya vayaayi va Efuraimu mwimiliri ni Kemueli muyaayi wa Shifutani.

²⁵ Ihiiri ya vayaayi va Zabuloni mwimiliri ni Elisafani muyaayi wa Parinaki.

²⁶ Ihiiri ya Isakari mwimiliri ni Palitieli muyaayi wa Azani.

²⁷ Ihiiri ya Asheri mwimiliri ni Ahihudi muyaayi wa Shelomi.

²⁸ Ihiiri ya Nafutali mwimiliri ni Fedaheli muyaayi wa Amihudi.

²⁹ Yava nivo avasaza va Yahova yalaga kugavura kivala kuli miandu ku vandu va Isiraeli mukivala cha Kanaani.