Livalidza 13 - KITABU KITAKATIFU

Avasaza 12 Vatumwa Kanaani Kuli Vatunyirizi

¹ Yahova yavolera Musa,

² “Tovola mwimiliri mulala kutura ku vuli vimiliri vi zihiiri 12 zia Isiraeli; uvatumi vatunyirizi kivala cha Kanaani cha mbana ku vandu va Isiraeli.”

³ Kunangwa Musa yavatuma kutura mu changalangwi cha Parani kolondekana kuli Yahova yalaga Musa. Vosi vaali aviimiliri va vandu va Isiraeli.

⁴ Amita gaavo gaali kuli ndi: Kutura muhiiri ya Rubeni yatovola Shamua muyaayi wa Zakuri

⁵ Kutura mu ihiiri ya Simioni yatovola Shafati muyaayi wa Hori.

⁶ Kutura muhiiri ya Yuda yatovola Kalebu muyaayi wa Jefune,

⁷ kutura muhiiri ya Isakari, yatovola Igali muyaayi wa Josefu.

⁸ Kutura muhiiri ya Efuraimu yatovola Hoshea muyaayi wa Nuni,

⁹ Kutura mu ihiiri ya Benjamini yatovola Paliti muyaayi wa Rafu

¹⁰ kutura muhiiri ya Zabuloni, yatovola Gadieli muyaayi wa Sodi.

¹¹ Kutura muhiiri ya Josefu, anoho ihiiri ya Manase, yatovola Gadi muyaayi wa Susi.

¹² Kutura muhiiri ya Dani, yatovola Amieli muyaayi wa Gemalili

¹³ Kutura muhiiri ya Asheri yatovola Suzu muyaayi wa Mikaeli.

¹⁴ Kutura muhiiri ya Nafutali, yatovola Nahibi muyaayi wa Vofisi.

¹⁵ Kutura muhiiri ya Gadi, yatovola Geyeli muyaayi wa Maki.

¹⁶ Yaga nigo mita gavandu va Musa yatuma kuzia kutunyiriza mu kivala cha kanani. Musa yagirung'anyia lieta lia Hoshea muyaayi wa Nuni namugulika Joshua.

¹⁷ Lwa Musa yavatuma, yavavolera, “Muzie ivaale kali kuduuka Isavaalu wi kivala cha Kanaani, kandi kuduuka mu vigulu.

¹⁸ Mwenyelerizi kuli kivala yiki keveeye, niiva vandu vamenyi mucho vaveeye vizingulu noho avadedekere, kandi vaveeye avanyingi noho vakekeeke.

¹⁹ Mulole niiva kivala yiki keveeye kilahi noho kidamanu, kandi niiva vandu vamenyi mu madaala magalamu noho amadara gaveeye ni zimbinga.

²⁰ Mulole niiva kivala yiki keveeye na malova manolu noho madamanu, kandi niiva keveeye kivala chi misaala noho kivala kitaveeye ni misaala. Muve avaluviriri kandi muleete ku makuyu malala agaveeye mu kivala yiki.” Yiki yaali ing'inga ya makuyu gaali nigatangi kwenga.

²¹ Kunangwa avasaza yava vazia kutunyiriza kolovega lwi ivaale wi kivala kutura mwigendanyama lia Zini kolovega lwisavalu kuduuka Rehobu, himbi nu vwingiliru vwa Hamazi ko lovega lwa Ivaale.

²² Vazia kutanga kolovega lwisavalu wi kivala, nivaduuka Heburoni, havundu ha Ahimani, Sheshai na Talimai visukululwi vie mindu minene valangwa Anakimu vamenya. Heburoni humbakwa mihiga 7 imbiri wa Zoani mu Egebeti.

²³ Vaduuka mu livona lia Eshikoli. Hene yaho, vatema ulusia kutura ku muzabibu lwali ni kisaganyi kilala cha mazabibu, nivakigingila ku musaala hagati ha vandu vaviri. Kandi valeta makomamanga harara na makuyu.

²⁴ Havundu yaaha halangwa livona lia Eshikoli kigira ulusia lwa mazabibu lwa vandu va Isiraeli vatema kutura ahene yaaha.

²⁵ Lwa vaali ni vakatunyiriza kivala ku madiku 40, viirana

²⁶ ku Musa, Haruni harara na vandu vosi va Isiraeli ha Kadeshi mwigendanyama lia Parani. Vahaana makuva ga vanyoola wene yeyo, kandi vavamanyia makuyu gavaleeta kutura mu kivala yicho.

²⁷ Vavoolera Musa, “Kumali kuduuka mu kivala cha wakutuma. Kutunyirizi konyooye ndi, keveeye kivala kigunamu kandi kenoru ligali; yaga na makuyu gakoleeti kutura mucho.

²⁸ Navuzwa avandu vamenyi mu kivala yiki vaveeye vi zinguru ligali, kandi madaala gaavo gaveeye manene kandi gi zimbinga. Komeeda kogene yago, kwalola visukululwi via Anakimu mu kivala yiki.

²⁹ Avandu vihiiri ya Maleki vamenyi kolovega lwi isavaalu. Avandu vizihiiri zia Hiti, Jebusi na Amori vamenyi mu kivala chi kiguru. Ihiiri ya vandu va Kanaani vamenyi himbi ninyanza ya Meditareniani, kandi himbi nu mugera gwa Jorodani.”

³⁰ Kalebu yakiring'anyia vandu vaali ni vililira imbiri wa Musa, yavoola, “Gendi kuzie kuvingilira kalunu na kuvuguli kivala yiki. Kunyi koveeye ni zinguru kandi kulakiguuta.”

³¹ Navuzwa avandu vaali nivaziiyi harara na Kalebu vavoola, “Kunyi si kunyala kwingilira vandu yava mba; kigira vaveeye nizinguru kuvita kunyi.”

³² Kunangwa valandiza makuva govovehi ku vandu va Isiraeli kigira kivala cha vazia kutunyiriza. Vavoola, “Kivala yicho sikeveeye ni viamo viu kulihiza kali vandu vamenyi mu mba. Vandu vosi vakwalola mu vaali vatambi ligali!

³³ Kali kwalola mu kivala yiki mindu minene ligali, vaali visukululwi via Anakimu. Kwaloleka kuva vakekeeke kuli amadagalala kuvo, kunangwa nindio kwaloleka imbiri wavo.”