Litanga 1 - KITABU KITAKATIFU

Lilombwa lie Ligulu ni Lirova

¹ Mu litanga, Nyasaye yalomba ligulu ni lirova.

² Lirova liali vugira lifana liosi kandi vugira kindu. Kisundi chakunika lirova liosi, kandi Roho wa Nyasaye yaali ku mazi.

³ Maku Nyasaye yalaga, “Uvulavu voveho,” na uvulavu vwaliho.

⁴ Nyasaye yalora uvulavu vwali uvulahi, maku yavukanyia uvulavu kutura ku kisundi.

⁵ Yagulika uvulavu “Mbasu” na kisundi yakigulika “Vudiku.” Mugolova gwa duuka kandi mugamba gwa duuka. Yili liali lidiku liu kutanga.

⁶ Nyasaye yalaga, “Voveho uvwerefu hagati ha mazi kwavukanyia mazi ku mazi.”

⁷ Nyasaye yalomba uvwerefu, kwavukanya mazi agaali isi wu vwerefu kutura ku mazi gaali igulu wuvwerefu na gaali ndio.

⁸ Yagulika uvwerefu, “Ligulu.” Mugolova gwaduuka kandi mugamba gwaduuka. Yili liali lidiku lia kaviri.

⁹ Maku Nyasaye yalaga, “Amazi agaveeye isi wi ligulu gavuungi havundu harara, kunangwa lirova liumu liloleke.” Gakolekaa ndio.

¹⁰ Yaagulika lirova “Kivala” na mazi gaali nigavungi harara yaagagulika “Inyanza.” Nyasaye yalora ndi voveeye vulahi.

¹¹ Maku Nyasaye yalaga, “Lirova limere vitagwa zing'ano ziosi. Iviama uvuguza kandi amakuyu.” Kandi geekoleka ndio.

¹² Kunangwa lirova liamera vitagwa zing'ano ziosi. Nyasaye yayanzizwa navio viosi.

¹³ Na mugolova gwavita na mugamba niguduuka. Yili liali lidiku lia kavaga.

¹⁴ Nyasaye yaalaga, “Uvulavu vololeke, uvwerefu wavukanya mbasu nu vudiku, kandi kumanyia ing'inga ya madiku kandi ing'inga yi mihiga;

¹⁵ kandi ving'ereng'ane muvwerefu vwi ligulu kandi koleta uvulavu ku lirova.” Na geekoleka ndio.

¹⁶ Kunangwa Nyasaye yalomba liuva nu mweli kuhaana uvulavu ovonene, liuva kwaka mbasu na mweli kwaka uvudiku; kandi yalomba zing'ereng'ani.

¹⁷ Nyasaye yavivika uvulavu muvwerefu, kuhaana uvulavu ku lirova.

¹⁸ Nyasaye yalora ndi vwali vulahi liuva kwaka muvasu kandi mweli kwaka uvudiku, kandi kwavukanya uvulavu ni kisundi.

¹⁹ Mugolova gwavita kandi mugamba gwaduuka. Yili liali lidiku lia kane.

²⁰ Maku Nyasaye yalaga, “Leka vilombe zing'ano zinyingi, viveeye mwoyo vizuri mu mazi. Manyonyi zing'ano zinyingi gizuri muvwerefu vwi ligulu.”

²¹ Kunangwa Nyasaye yalomba miyoka minene jwu munyanza, kandi virombe vindi zing'ano ziosi vimenye mu mazi; kandi amanyonyi zing'ano ziosi gamenye mu ligulu. Nyasaye yalora ndi vwali vulahi.

²² Yavigasiza viosi kandi yavivoolera vive nu lwivulu, kandi vimedeeke mu mazi gi inyanza, kandi amanyonyi gameedeke ku lirova.

²³ Mugolova gwavita kandi mugamba niguduuka. Yili liali lidiku lia katano.

²⁴ Maku Nyasaye yalaga, “Vilombe viveeye mwoyo vie zing'ano ziosi vivulane ku lirova: mitugu, vimolaa, kandi zinyama ziu muvulimu, kolondekana nu lugano lwazio.” Kandi gaali ndio.

²⁵ Nyasaye yalomba zinyama kolondekana nu lugano lwazio: Mitugu kolondekana nu lugano lwajio, kandi vimolaa ku lirova viosi kolondekana nu lugano lwavio. Nyasaye yalora ndi vwali vulahi.

²⁶ Maku Nyasaye yavoola, “Gendi kolombe mundu mu lifana lietu naalava kuli kuinyi. Maku valamiha vilombe viosi viveeye mu mazi, amanyonyi goosi gu mu ligulu kandi ku lirova, mitugu kandi zinyama ziosi ziu muvulimu, kandi vimolaa ku lirova viosi.”

²⁷ Kunangwa Nyasaye yalomba mundu mu lifana lilie mwene. Yalomba musaza nu mukali.

²⁸ Yavagasiza kandi navavoolera, “Mwivulane kandi mumedeke na mwizuli lirova kandi mu liamihi kandi mwamihi zisuzi kandi vilombe viosi viu mu mazi; manyonyi goosi gu mu ligulu kandi ku lirova, vimolaa ku lirova, mitugu kandi zinyama ziosi ziu muvulimu.

²⁹ Inzi mali kumuha vitagwa viosi viamaa uvuguza kandi vuli musaala gwosi gwamaa makuyu. Yivi viosi vilava viukulia vienyu.

³⁰ Mali kuhaana uvunyasi kandi amatu amavisi gi misaala vive viukulia vie zinyama ziosi ziu ku lirova, manyonyi goosi gu mu ligulu, kandi viosi vimolaa ku lirova.” Kandi gaali ndio.

³¹ Nyasaye yahenza ku vindu viosi via yaali nalombi, na yalora viali vilahi ligali. Na mugolova gwavita nu mugamba nigwaduuka. Yili liali lidiku lia sita.