Lisyoma lya Jeremia 2 - KITABU KITAKATIFU

Amageri ga Yahova ku Jerusalemi

¹ Yahova amali yakunika avandu va Jerusalemi ni kisundi mu vutima vwivwe. Yaagirung'anyi uvukumi vwa Jerusalemi kugwa mang'anye kulirova. Si yizuliza Litembeli lilie lidiku liu vutima vwivwe mba.

² Yahova amali kudiviza visukululwi via Yakobo viosi vugira livererera. Mu vutima vwivwe, amali kuvunanyia zimbinga zie lidaala lie Ivuyuda; yikiza uluyali lwu vwami harara na vamiihi vavwo nukuvaviika mu zisoni.

³ Yatulizaho zinguru zia vandu va Isiraeli mu vutima vwivwe uvululu. Yaatuliza vokonyi vwivwe kuvo imbiri wa vasigu vaavo. Yasamba visukululwi va Yakobo nolomemo lwu muliru, nukudiviza ivindu viosi.

⁴ Yanyira uvuta vwivwe kukuinyi kuli avasigu: Yayita vandu viitu vosi avaari vusangali nu vuyanzi vwitu. Hano mu Jerusalemi kwahulira vutima vwivwe uvululu uvusambaa.

⁵ Yahova amali kudiviza Isiraeli kuli umusigu. Yadiviza kali zinyumba ziu uvwami vwavo kandi zimbinga zie lidaala linene ziatigala mang'anye. Yameda ku vandu vi Ivuyuda lisioma kandi liverera linyingi.

⁶ Yasambula havundu haavo hokomenya hatigala kuli mulimi, kandi yakola havundu haavo havatovola hukuvuganira kuva amang'anye. Yamali koheriza lidiku liavo lie lisavo kandi lisabato mu Ziyoni; yamali kuviika vutima vwivwe vululu ku avami kandi avasaalisi.

⁷ Yahova amali kusura uvwali vwivwe kandi yamala koleka Litembeli lilie Litakatifu; yaleka avasigu kusambula madigi gi zinyumba ziavo ziu vwami. Vahaanzuka nokokola liyoga mu Litembeli kuli lidiku lie lisavo.

⁸ Yahova amali kusaavira kusambula madigi gi lidaala lia Ziyoni. Yavika kimanyiru kolola ndi amadigi goosi gadiviziywi. Minaara harara na madigi, kalunu vitigaye mang'anye.

⁹ Virivwa vie lidaala linene lia Ziyoni via sikira hasi mumarova, kandi miluguyu javio jaavunika mu vidonye. Umwami kandi avandu vwi inyumba yu vwami kalunu vaveeye hagati hi zihiiri mu kivala chi lihaminywa, wi lilaga litaveeye. Avaporofeti si vaveeye na malola kutura ku Yahova kandi mba.

¹⁰ Avakulundu va Ziyoni viikara hasi ni vachiring'ani machiriri, niviiyuhiyi uluguchi ku mitwi jaavo kandi viviki zinguvu zia magunia. Avakaana va Jerusalemi vinaminyi mitwi jaavo hasi.

¹¹ Zimoni zietu ziiluhi kigira lisioma, mioyo jiitu jizuuyi ovovereri; koveeye novovereri vunyingi kigira lidivizwa lia vandu viitu. Avana kandi zindanya vakuziraa kuzinzira zie lidaala linene.

¹² Vateva avamama vaavo ndi, “Viukulia ni iwaini viveeye haliha?” Vakuza kuli avandu vatozeywi muzinzira zie lidaala linene. Vakuza galaha ku magulu ga vamama vaavo.

¹³ O, munyi avandu va Jerusalemi, inzi nyara kovora ki ku munyi? Nyara kumufananyia na kindiki? O, munyi avandu va Ziyoni, inzi nyara kumuleng'anyia na kindiki kunangwa nduuki kumuleminya mwoyo? Lidivizwa lienyu liveeye linene ligali kuli inyanza nene. Nivwaha unyala kumuhonyia?

¹⁴ Avaporofeti vinyu vaamugada na malola gataali gagiligali; mu voporofeti vwavo, si vavoola havulavu uvwoni vwinyu kunangwa muduuki kwiranya miandu jinyu mba, navuzwa vaamuvolera malola gataali gagiligali kandi gu kuvachaminya.

¹⁵ Avandu vosi avavitaa ahimbi ni lidaala linene vamuhenza nu kumukolera kehenyahenye. Vasung'usa mitwi jaavo no kosekaa amang'anye ga Jerusalemi ni vavoola, “Yili ni nilo lidaala linene ilialangwa uvudukiru vwu vulahi kandi uvusangari vwi lirova liosi?”

¹⁶ Avasigu vinyu vosi vamunyega; vamusekerizaa nokodedeyiza amiinu gaavo nivalira nivavoora, “Kumali kulidiviza! Aha, yili ni lidiku lia kwalindilira, kalunu liduuki kandi kuliloli!”

¹⁷ Yahova amali kokora aga yatihiza, kuduukiza. Amali kudiviza vugira kokovererera kuli yaakwiganihiza zing'inga zia kale. Yaaha avasigu viitu liguuta kandi yavakoli kusangalira liigwa lietu.

¹⁸ O, munyi avandu va jerusalemi, mwaniri vudinyu ku Yahova! Muleke maliga ginyu gituruki kuli mugera vudiku nu mbasu! Muzizagiliri kwanira ku Yahova, kandi maliga gazizagiliri kwituruka!

¹⁹ Muvuki mwaniri ku Yahova vudiku vwosi kandi mugambazuri! Muviiki mioyo jinyu imbiri wa Yahova kuli amazi gaviikwa mu kiju. Mugiingi makono ginyu igulu na musaale ku Yahova kigira livamwoyo lia vana vinyu, avakuzaa kigira inzara mu zinzira zie lidaala linene.

²⁰ Muporofeti avoora: O, Yahova, henza na uganagane! Nivwaha wa ivi wakolera ku yaga? Avakali vanyara kulia lwivulu lwi zinda ziavo, avana va valinda aveene? Musaalisi kandi muporofeti vanyara kwitirwa mu Litembeli lia Yahova?

²¹ Avasoleri kandi avasaakulu vaagoni avakuzu mu luguchi lwa madaala manene. Avayaayi kandi avakaana vamali kwitwa ni vivavi via vasigu. Ivi wavita mulidiku liilio liu vutima; umali kuvasinza vugira kuvavererera.

²² Kuli ulaga ku lidiku lie lisavo, nindio umali kulagila kunyi avasigu ku zimbega ziosi. Si yaliho nu mundu kali mulala uwahononoka anoho uwahona mulidiku liilio liu vutima mba. Avasigu viitu vaadiviza avana va kwayaanza kandi ni kuvirukiza.