Kyavalevi 26 - KITABU KITAKATIFU

Uvugasu kigira lihulira Nyasaye

¹ Yahova yavoola, “Mutelomberi ivifanayi, anoho kusingiliza vifananyi vialongwa, anoho zitiru ziamagina anoho magina gavazwa kuvisigamira mba. Inzi mbeeye Yahova Nyasaye winyu.

² Mulindi masavo gidiini kandi muhaane luyali havundu ha Inzi sigamirwa. Inzi mbeeye Yahova.

³ “Niiva mulamenya kolondekana na malago gange kandi muhuliri gamulagaa,

⁴ ndamutumira imbura mu ing'inga idukanaa, kunangwa kivala chaame viamo ni misaala jaame makuyu.

⁵ Vitagwa vienyu vilava vinyingi ligali kali mulava nimukegesa vuswage, lweveeye ing'inga yukwagula mizabibu, kandi mulava nimuchaagula amazabibu lwing'inga iduuka yukutaga vuswage. Mulava navio viosi via mwenya kulia, kandi mulamenya mu mirembe mu kivala chienyu.

⁶ “Ndahana mirembe mu kivala chienyu kandi mulagona vugira kutia umundu woosi. Ndatulizaho zinyama ziuvuhimwa mukivala zana, kandi si halava ho nuvulwani kandi mba.

⁷ Mulava nuvuguuti ku avasigu vinyu;

⁸ vatano ku munyi valaguuta vasigu mia moja; kandi mia moja ku munyi valaguuta avasigu zielefu likomi, kandi avasigu vinyu valaguutwa ni kivavi.

⁹ Ndamugasiza kandi ndamuha avana avanyingi. Ndasingiliza nokudinyiliza lilagana liange lia ndalomba nimunyi.

¹⁰ Ligesa lienyu lilava linyingi ligali, vilamala muhiga, na kali ndio, mulatuliza nokusiuva viatigala ku vikulu muduuki konyoora vwiyangu vwu kuviika mu vihia.

¹¹ Ndamenya hagati hinyu mu Lihema liange litakatifu, kandi sindagirung'ana kutura ku munyi mba.

¹² Ndava ni munyi; Ndava Nyasaye winyu, na munyi mulava avandu vange.

¹³ Inzi, Yahova Nyasaye winyu, ndamuleeta kutura Egebeti kunangwa muvuli kuzizagilira kuva vatugwa vaavo mba. Ndaavunanyia zinguru zia avasigu vienyu kandi nimuleka mugende no vovoholore.”

Amageri kigira livula kuhulira Nyasaye

¹⁴ Yahova yavoola, “Nimuvula kumbulira nokolonda amalago gange, mulahevwa mageri.

¹⁵ Niiva mulasuura kuhulira malago gange ni lilagana liange lia ndalomba nimunyi,

¹⁶ Inzi ndamuha mageri. Ndaleta kivi kinene ku munyi kuli vulwaye vutahonaa mba kandi luhuuza lunyala kumukola muvakuli nokolomba livamwoyo lienyu kuva liavuzwa. Mulataga vitagwa vienyu, navuzwa sivilava novokonyi ku munyi mba, kigira avasigu vinyu valalia via mwatanga.

¹⁷ Ndamugirung'ana kunangwa muguutwi kandi yavo vamudunyira valamwamiiha. Mulatihizwa ligali na muliruka lwa hataveeye ho nu umundu umukunga.

¹⁸ “Kali niiva inyima wa yaga goosi nimuva simulaambulira mba ndaameeda mageri ginyu haali saba kigira uvwoni vwinyu.

¹⁹ Ndatuliza ho luyaayi lwi zinguru zienyu; imbura silavaho kandi mba kivala chiinyu kilava chuumu kandi kidinyu kuli kivia.

²⁰ Liyinzira vudinyu lienyu lilava liavuzwa, kigira kivala chienyu sikilaama viukulia kandi mba misaala sijilaama makuyu mba.

²¹ “Niiva mulazizagilira kuhing'ana ninzi kandi nimusuula kumbulira, ndaameeda kandi mageri ginyu haali saba.

²² Ndatuma zinyama zinduru hagati hinyu na zilita avana vinyu kandi ziladiviza mitugu jinyu. Zilamukola mutigale avakeekeke ligali kali zinzira zienyu zilatigala zinzere.

²³ “Niiva kali inyima wa mageri yaga goosi muvura kumbulira navuzwa muzizagiliraa komeeda lihing'ana ninzi,

²⁴ maku ndagirung'ana mbing'aane ni munyi kandi ndamuha mageri haali saba kigira uvwoni vwinyu.

²⁵ Ndaleta vulwani kumuha mageri kuvanza kisaalia kigira livunaganyia lilagana lietu, kandi kali nimuvunga mu madaala manene ginyu kwirukira mirembe, ndatuma zinguzu hagati hinyu zitahonaa mba na galamuniga mwihaane munyi aveene ku avasigu vinyu.

²⁶ Ndatulizaho chukulia chiinyu kunangwa vakali likomi valatumikira lihiga lilala kolomberaku migadi josi javaveeye najo lwa muva nimwakagilia josi, mulava nimukikiri inzara.

²⁷ “Niiva kali inyima wa yaga goosi mulazizagilira kuhing'ana ninzi nukusuula kumbulira,

²⁸ maku, mu vutima vwange, ndamugirung'ana kandi ndakora amageri ginyu kuva amadamanu ligali haali saba kuvita maziambiri.

²⁹ Inzara yinyu ilava enene ligali, kuduuka lwa mulia avana vinyu.

³⁰ Ndononyia havundu hinyu hukusigamira ku vigulu, ndasambura uvwali vwinyu vwi kimuli kandi ndasiuva miviri jinyu mikuzu ku vifananyi vienyu viagwa. Mulivihilirwa liange linene.

³¹ Ndakora madaala ginyu manene kugwa mang'anye, ndononyia havundu ahatakatifu hinyu hukusigamira vifananyi kandi ndasuura kuvugilira visiuviliru vienyu.

³² Ndadiviza kivala chienyu ligali kali avasigu vinyu vamenyamu valagenya kigira lidiviza yilio.

³³ Ndaleta vulwani ku munyi nokumusalanyia muvivala vigeni. Kivala chienyu kilang'anywa na madaala manene ginyu galatigala mang'anye.

³⁴ Maku kivala kilasangalira masabato gacho ing'inga yoosi ya keveeye vuzwa, na munyi nimuveeye mu kivala cha vasigu vinyu. Maku kivala kilasoosa, kandi kilasangalira masabato gacho.

³⁵ Kulohoono lwa kemenya king'anye, kilava nilisoosa lia chavula kuva nalio mu masabato ginyu lwa mwali nimumenyi mu.

³⁶ “Ndakora yavo ku munyi avaveeye mu kivala chovogeni, vizuri vuti vonene ligali kali liyoga lie liitu lihuuzwa ni imbuza lilamukola mwiruki zimbiru. Mulanyagula kuli vakungwa mu vulwani; kandi mulagwa lwu musigu ataveeye himbi ni munyi.

³⁷ Mulikigitala aveene naveene kuli avirukaa kutura mu vulwani, lwa ataveeye ho nu umundu umukunga; kandi si mulava nizinguru kulwaana avasigu mba.

³⁸ Mulakuzira mu kivala chovogeni, na mulayavilwa mu kivala cha avasigu vinyu.

³⁹ Avakeekeke ku munyi vatigara mwoyo, mu kivala cha avasigu vinyu valadedekera kigira uvwoni vwinyu vene kandi kigira uvwoni vwa vaguuga vinyu.

⁴⁰ “Navuzwa aviisukulu vienyu viliganira uvwoni vwavo nu uvwoni vwa vaguuga vaavo vahing'ana inzi kandi nibaala ku Inzi.

⁴¹ Kandi nivangola kuvagirung'ana kandi kuvahila vazie mu kivala cha avasigu vaavo. Mu limalirika, lwi visukululwi vienyu viagehizwa kandi ni vamali kukindukizwa kigira uvwoni vwavo, kandi liebaala.

⁴² Ndizuliza lilagana liange na Yakobo na Isaka kandi na Aburahamu, kandi ndalomba vuhia lisuuvirizwa liange kuha avandu vange kivala.

⁴³ Navuzwa avandu valaleka kivala zana, kandi kesoose nokusangalira masabato lwa chaali king'anye, vugira yavo. Ing'inga yeyo vahevwa mageri kigira vwoni uvwavo, kigira vasuura malago kandi vachaya miigizu gange.

⁴⁴ Navuzwa kali ndio, lwa vaala nivakikiri mu kivala cha avasigu vaavo, sindavaleka ligali anoho kuvadiviza mba. Yago gagaherizi lilagana liange lia ndalomba navo. Kigira Inzi mbeeye Yahova Nyasaye wavo.

⁴⁵ Ndalomba vuhia lilagana liange lia ndali ndalomba na vaguuga vaavo, lwa ndamanyia zihiiri ziosi zinguru ziange lwa ndaleta avandu vange vatuli Egebeti, kunangwa Inzi Yahova nduuki kuva Nyasaye wavo.”

⁴⁶ Yaga goosi gaveeye amalago gi miima ja Yahova yaaha Musa ku Kiguru cha Sinai kigira avandu va Isiraeli.