Kyavalevi 19 - KITABU KITAKATIFU

Amalago Matakatifu Kandi Likaala Lirungi

¹ Yahova yavolera Musa

² avolere avandu vosi va Isiraeli, “Muve avatakatifu kigira Inzi, Yahova Nyasaye winyu, mbeeye Mutakatifu.

³ Vuli mulala ku munyi kuduuka ahuliri mama weve na baba weve, na kandi kuduuka alindi lisabato liange kuli ngulaga. Inzi mbeeye Yahova Nyasaye winyu.

⁴ “Mutagirung'ana kuzia kusigamira vifananyi mba, kandi mutelomberi avanyasaye ku vivia nukuvisigamira mba. Inzi mbeeye Yahova, Nyasaye winyu.

⁵ “Lwa musinza mutugu kuva kihanwa chi mirembe ku inzi Yahova, mulonde malago gandaamuha kunangwa mbugiliri kihanwa zana kulwa munyi.

⁶ Kilaliivwa ku lidiku lia muva nimukihaani anoho ku lidiku lilonda ku. Inyama yoosi iva nitigaye ku lidiku lia kavaga kuduuka isambwe,

⁷ kigira eveeye indamanu; na niiva kedonye choosi chinyama kilaliivwa ku lidiku lia kavaga, sindavugilira kihanwa yicho mba.

⁸ Mundu woosi ulia ku, alava muhioli na alahevwa mageri kigira wononyi chaviikwa halovega kigira Inzi, Yahova. Mundu oyo sialavalizwa kuva mulala ku avandu vange mba.

⁹ “Lwa mugesa milimi jinyu, mutavuna maduma ligali kuduuka ku zinzako zie milimi jinyu mba; kandi mutavungiza vialekwa vieligesa lienyu mba.

¹⁰ Mutiranira kuvitira mu vizabibu vienyu kuvungiza makuyu galekwa anoho kodoola makuyu gamali kwaguluka mba; mugalekere vadaka na vageni. Inzi mbeeye Yahova, Nyasaye winyu.

¹¹ “Mutiiva mba, Mutagaadi mba, Mutaveherani mba.

¹² Mutisuuhi liesuuha liuvugadi ku lieta liange nokwononyia lieta liange mba. Inzi mbeeye Yahova, Nyasaye winyu.

¹³ “Mutadambizi avatende vinyu anoho kuvanyaga ivindu viavo mba. Mutahaanda ku mitungu ja vatumikiri vinyu kali lidiku lilala mba.

¹⁴ Mutalaama mundu wahana matu kandi mutaviika kindu chu kwikagitiliza imbiri wu muvoku mba navuzwa mutie Inzi. Inzi mbeeye Yahova Nyasaye winyu.

¹⁵ “Muve vasuuvirifu kandi avalungi lwa muva nimuhaanaa likalaga mu viyaalo mutamanyia lieriza anoho liyaanzilira vadaka kandi mutatia vatugi mba.

¹⁶ Mutavoyavoya yiyi ni yiyi nimuvoora vovehi kwononyia lieta liu mundu wundi hagati ha avandu vinyu mba. Mutasingira kovora ikindu kinyala kogotiza livamwoyo liumutende lwaveeye mukiyaro mba, vooli lilolekiza linyala kumukonya. Inzi mbeeye Yahova.

¹⁷ “Mutadunyiri avamwavo vinyu mumwoyo mba, navuzwa mugaye havulavu kunangwa muvuli kokora uvwoni kigira oyo.

¹⁸ Mutavanza kisaalia ku mundu vosi mba anoho uzizagiliri kumudunyira mba, navuzwa uyaanze mutende vovo kuli wiyanza yivi mwene. Inzi mbeeye Yahova.

¹⁹ “Mugumiri malago gange mutaleki mitugu jinyu kwivulana nizinyama ziu lugano lundi mba. Mutataaga zing'ano ziviri ziuvuguza mu mulimi mulala mwere mba. Mutiviiki zinguvu zianavwa kutura ku zing'ano ziviri zieviraka mba.

²⁰ “Niiva musaza agona nu mukali mutugwa kwatevwa kuhilwa nu musaza wundi, naye akikiri kokwevwa kandi kulakulwa, kuli mutugwa, kuduuka vombi vahevwe mageri, navuzwa vavuli kwitwa mba, kigira mukali oyo akikiri kovoholorwa.

²¹ Musaza oyo alaleeta ligondi limigu havwingiliru vwi Lihema lia Yahova live kuli kihanwa chu mutungu vwoni.

²² Musaalisi alatumikira ligondi yili kokora muruka gwu kutakasa uvwoni vwu musaza oyo, na Nyasaye alamusamiiha.

²³ “Lwa muduuka mu kivala cha Kanaani ma mutage misaala jamakuyu, mutage misaala milahi kolondekana ni miruka jidiini kulwimihiga givaga jukutanga. Mu ing'inga yiyi, sigamuduukira mulie amakuyu goosi mba.

²⁴ Mu muhiga gwakane, makuyu goosi galahaanwa kuli kihanwa chi lisandiza ku inzi, Yahova winyu.

²⁵ Navuzwa ku muhiga gwa katano, munyala kulia makuyu goosi. Niiva mulakola yaga goosi, misaala jinyu jilakame makuyu manyingi. Inzi mbeeye Yahova Nyasaye winyu.

²⁶ “Mutalia inyama nikikirimu na masahi mba. Mutagerizi kokora vukumu vwu lugano lwosi mba.

²⁷ Mutavega liisu liu kundulu ku mitwi jinyu mba, anoho mutavegi zinderu zienyu mba,

²⁸ anoho mutasalagi anoho kukalaga ku miviri jinyu lwa musiomeraa vakuzu mba. Inzi mbeeye Yahova vinyu.

²⁹ “Mutaviiki vakana vinyu mu zisoni kuvakola vave avaheye vu mulitembeli mba. Nimukora ndio mulagirung'ana kusigamira vanyasaye vandi na kivala kilizula voheyi.

³⁰ Mulindi Lisabato, kandi muhaane luyali havundu ha inzi sigamirwa. Inzi mbeeye Yahova.

³¹ “Mutateevi zing'anagani kutura ku avandu vaveeye nilihambana na roho midamanu ja vakuzu mba. Niiva mulakola ndio, mulava vadamanu kolondekana ni miima. Inzi mbeeye Yahova winyu.

³² “Mutie vasakulu kandi muhaane luyali kuvo. Mutie inzi, Inzi mbeeye Yahova winyu.

³³ “Mutadambizi avageni vamenyi mu kivala chiinyu mba.

³⁴ Muvakolere kulia vandu va Isiraeli vache vinyu, muvayaanze kuli mwiyaanzaa vene. Mwizurizi ndi munyi kandi mwaali avageni mu kivala cha Egebeti. Inzi mbeeye Yahova Nyasaye winyu.

³⁵ “Mutagaadi omundu woosi kulitumikira kegero chu vugadi anoho vibimu anoho ivindu vindi viosi viu vugadi mba.

³⁶ Mutumikiri vigero viagiligali, zikilo ziagiligali kandi vibimu viagiligali. Inzi mbeeye Yahova Nyasaye winyu, wamutuliza mu kivala cha Egebeti.

³⁷ Mulonde malago gange goosi kandi miigizu gange. Inzi mbeeye Yahova.”