Kyavalevi 11 - KITABU KITAKATIFU

Zinyama Ziduukanaa Kuliivwa

¹ Yahova yahaana ku Musa na Haruni amalago yaga,

² vavoolere avandu va Isiraeli ndi vanyara kulia ku zinyama ziosi ziveeye ku lirova,

³ ziveeye ni zimbagayu ziviri ku kerenge na zive ziliizaa igamuura. Yizio nizio zinyama zia munyala kulia.

⁴ Navuzwa ku yizio ziliizaa igamuura anoho zie zimbagayu ziviri ziamutanyala kulia ni yizi; ing'amia, kigira iliiza igamuura, navuzwa sieveeye nizimbagayu ziviri mba. Eveeye indamanu ku munyi.

⁵ Mutalia likinieli mba kigira kali nililizaa igamuura, navuzwa siliveeye nizimbagayu ziviri mba, liveeye lidamanu ku munyi.

⁶ Mutalia kifoyo mba, kigira kali ni kiliiza igamuura, navuzwa sikeveeye nizimbagayu ziviri mba.

⁷ Mutalia zinguruvi mba. Kuduuka zivugulwi kuva zindamanu; ziveeye nizimbagayu ziavukanywa, navuzwa siziliizaa igamuura mba.

⁸ Mutalia zinyama yizi anoho kali kudiira ku muviri mikuzu jazio mba, jiveeye midamanu ku munyi.

⁹ Munyala kulia lugano lwosi lwi isuzi ni vivehe kandi na makambaya

¹⁰ navuzwa ikindu choosi ikemenyi mumazi ikitaveeye nivivehe na makambaya muta tia mba.

¹¹ Vilombe kuli yivi viveeye vidamanu ku munyi. Mutavilia mba kandi mutadiiraku miviri mikuzu javio kali hakuzu mba.

¹² Ivindu viosi vimenyi mu mazi na siviveeye ni vivehe kandi makambaya, vindu yivi viveeye viukuvihiliriza ku munyi.

¹³ Yaga nigo manyonyi ga muduukana muvihilirwi kandi mutagalia mba, kigira gaveeye madamanu: Zindizu, Zisoti, Kihungu,

¹⁴ Liive, imbada,

¹⁵ Majikoro,

¹⁶ Livuudu, imbugavuga, kiliiza.

¹⁷ Likuuli, liluvi, likuuli linene, engoonye.

¹⁸ Likuuli lilavu, likuuli liu muvulimu, esooti indavu

¹⁹ ling'oani, likuuli liliizaa zisuzi, kandi linyinya.

²⁰ Viguguli vibulukaa viosi kandi vimolaa ku virenge vine viveeye viukuvihiliriza munyi.

²¹ Navuzwa ku viguguli via mavaha ivimolaa ku virenge vine, munyala kulia yivio iviveeye nivirenge vihambanyie igulu kuzinduvatiru viukutumatumira kumalova.

²² Munyala kulia izisigi, amadagal'la anoho amadede.

²³ Navuzwa viguguli viosi viamavaha kandi vimolaa ku virenge vine vivalizwa kuva vidamanu ku munyi.

²⁴ “Mulava avadamanu nivamudiira ku miviri mikuzu javio. Mulava avadamanu kuduuka ha mugolova.

²⁵ Mundu woosi ugingaa kedonye chu muviri mukuzu gwavio, alafuyaa zinguvu zizie mwene, kandi alava mudamanu kuduuka hamugorova.

²⁶ “Ku zinyama ziosi, yeyo eveeye nuluhagayu lwavukani haali kaviri, navuzwa italiizaa igamuura eveeye indamanu. Mundu woosi udiira ku miviri gwayo mikuzu alava mudamanu.

²⁷ “Ku zinyama ziosi zie virenge vine, zigenda ku makumbu, ziveeye zindamanu. Mundu woosi udiira ku miviri mikuzu jazio alava mudamanu kuduuka hamugorova.

²⁸ Mundu woosi ugingaa miviri mikuzu ji zinyama yizio, alafuuya zinguvu zizie mwene, kandi alava mudamanu kuduuka hamugorova; kigira ziveeye zidamanu ku munyi.

²⁹ “Ku zinyama zigendagenda vuzwa nizimola kumalova, yizi ziveeye zindamanu ku munyi: (Imbuku, lijuungu, lisiagali

³⁰ lisiamugoma, imbulu, ingwina, uluhuyu, ni inyambu.)

³¹ Ku viosi vimolaa kumalova, yizi nizio zivalizwa kuva zindamanu. Mundu woosi udiira kuzio alava mudamanu kuduuka hamugorova.

³² Niiva miviri jazio mikuzu jiladiira ku kindu choosi, kilava kidamanu kuduuka hamugorova, nikiva kiju choosi chavazwa ku musaala, inguvu, liseero, anoho ligunia, kali keve kiju chi miyinzi josi, kilava kidamanu. Kuduuka kiinwi mu mazi, navuzwa kilava kidamanu kuduuka hamugorova.

³³ Niiva miviri mikuzu jazio gilagwa mu inyingu, kindu choosi chaali keveeye mu kilava kidamanu, na kuduuka watanyie inyingu zana yeyo.

³⁴ Chukulia choosi kinyala kuliivwa kazozo, navuzwa cha mazi kutura mu inyingu yu lugano yilu gasunduki ku, anoho gakatonyi ku, kilava kidamanu; kandi kindu choosi, kinwevwa kutura munyingu kuli yiyi kilava kidamanu.

³⁵ Kindu choosi sia kilala ku miviri mikuzu jivindu yivi vidiira ku, kilava kidamanu. Niliva ni lihiga liukwuminyiraku chukulia, anoho lijiiko liokodekera ku vilatanywa kigira viveeye vidamanu ku ivi.

³⁶ Navuzwa kidaho anoho kisima cha mazi gaveeye mu kilatigala vuzwa kilahi kali niiva kindu kidiira ku miviri mikuzu javio keveeye kidamanu.

³⁷ Niiva muviri mukuzu guladiira ku vuguza vwu kumiizwa, vuguza yivwo vulava vuzwa vulahi,

³⁸ navuzwa niiva muviri mukuzu yigwo gulagwa ku vuguza vwinikiyi mu mazi; vuguza yivwo vulava vudamanu.

³⁹ “Niiva ndala ku zinyama zia mwavugilirwa kulia ilakuza, mundu woosi udiira ku muviri mukuzu gwayo alava mudamanu kuduuka hamugorova.

⁴⁰ Mundu woosi uva nalia ku inyama yu muviri mukuzu zana, kuduuka afuuyi zinguvu zizie, na alava mudamanu kuduuka hamugorova. Na uyu kandi ugingaa muviri yigu, alafuuya zinguvu zizie, navuzwa alava mudamanu kuduuka hamugorova.

⁴¹ “Utalia ku kuzinyama zinguzuzu zimolaa kumalova mba. Ziveeye zindamanu.

⁴² Utalia ku kilala ku vilombe vimolaa mba; kali nikiva kemolaa ku inda yacho, anoho kegendaa ku virenge vine, anoho ku virenge vinyingi, viveeye vidamanu.

⁴³ Mutekoli avadamanu ku lilia zinyama zimolaa mba, anoho zigenda ku virenge vine kumalova, anoho muteyonogonyi nazio mba, gase mulava avadamanu.

⁴⁴ Inzi mbeeye Yahova Nyasaye winyu. Mwitakase munyi vene, muve avatakatifu kigira inze mbeeye mutakatifu. Muteyononyia vene na kilala ku ivindu vimolaa kumalova mba.

⁴⁵ Inzi mbeeye Yahova, uwamuleta kutura mu kivala cha Egebeti kunangwa inzi nduki kuva Nyasaye winyu. Kunangwa kuduuka muve avatakatifu kigira inzi mbeeye mutakatifu.”

⁴⁶ Yili nilio lilaga ku zinyama, na manyonyi kandi viosi viveeye mwoyo mu mazi, na viosi vigenda kumalova.

⁴⁷ Kuduuka mwavukanyie hagati hi ivindu vidamanu kandi vilahi; hagati hi zinyama zinyala kuliivwa kandi zitanyala kuliivwa.