Kwidzulitsa 1 - KITABU KITAKATIFU

Litangilira

¹ Kitabu yiki keveeye mu na makuva ga Musa yavolera avandu va Isiraeli lwa vaali mwigendanyama ivugwi wu mugera gwa Jorodani. Vaali mu kereremo cha Jorodani ahimbi ni lidaala lia sufi, hagati hi lidaala lia Parani, kolovega lulala kandi madaala ga Tofeli, Labani, Hazerozi na Dizahabu kolovega lundi.

² Loveeye logendo lwa madiku likomi na lilala kutura mu Kiguru cha Sinai kuduuka Kadeshi Barinea kunzira yi vigulu mu kivala cha Edomu

³ Ku lidiku liu kutanga liu mweli gwi likomi na mulala gwu muhiga gwa arubaini inyima wa vaali nivakatula Egebeti, Musa yavolera avandu va Isiraeli vindu viosi via Yahova yamulaga avavoolere.

⁴ Yakola ndio inyima wa Yahova yaali niyakaguuta Sihoni Mwami munene wa vandu va Amori, uwamihaa mu lidaala lia Heshiboni, kandi Ogu Mwami munene wa Bashani, uwamihaa mu madaala ga Ashitarozi na Edirei.

⁵ Lwa avandu va Isiraeli vaali ivugwi wu Mugera gwa Jorodani, mu kivala cha Moabu, Musa yaatanga kuvivaalira amalago na amigizu ga Nyasaye. Yavavolera,

⁶ “Lwa kwaali ha Kiguru cha Sinai, Yahova Nyasaye wiitu yakovolera ndi, ‘Mumali komenya ha Kiguru yiki ku ing'inga iduuki.

⁷ Kalunu musambuli hokososa hinyu kandi muzizagiliri nologendo lwinyu. Muzie mu kivala chi vigulu cha vandu va Amori kandi hoosi muvivala vio votende vwacho mu Arebia, mu kereremo cha Jorodani, mu kivala chi vigulu namavoona, mu kivala chisavaalu wa Kanaani kandi kuduuka ku lujinga lwinyanza enene ya Meditareniani. Muzie kali kuduuka mu kivala cha Kanaani kandi kuduuka engereka wi vigulu via Lebanoni, kandi kali kuduuka ku Mugera munene gwa Efurate.

⁸ Kivala yiki choosi nicho kivala cha Inzi, Yahova, ndasuuviriza kuhaana ku avaguuga vinyiu, Aburahamu, Isaka na Yakobo, kandi ku visukululwi viavo. Muzie mukivuguli.’ ”

Musa Yatovola Vakalagi

⁹ Musa yavolera avandu va Isiraeli ndi “Lwa kwali nikukikiri ha kiguru cha Sinai ndamuvolera ndi, ‘Miyinzi ju kumwimilira jimbiti (jiveeye militu). Sinyala kujikola nzieng'ine mba.

¹⁰ Yahova Nyasaye winyu umali kokora munyi kuva avanyingi. Kalunu mumali kuva avanyingi ligali kuli zing'ereng'ani ziu mwigulu.

¹¹ Yahova, Nyasaye wavaguuga vinyu, amukole mumedeke haali elefu kuvita kuli muveeye, kandi amugasizi kuli yamusuuviriza.

¹² Navuzwa Inzi nzieng'ine nyara ndi kuginga miyinzi militu yiji ju kuhuliriza nokokonya munyi mu lisolana lienyu?

¹³ Tovoli kutura mu vuli ihiiri avandu vo vogeri uvwere, avilimanyiriza linduukiru, kandi avilimanya linene, kunangwa nduuki kuvaviika vave aviimiliri vinyu.’

¹⁴ Na munyi mwavugilira ndi yiki keveeye kindu kilahi chokokola.

¹⁵ Kunangwa ndaavugura aviimiliri vovogeri, avilimanya linene na avizinganagani yavo avamwatovola kutura mu zihiiri zienyu, nimbaviika kuva avalindi vinyu. Ndaviika avalala vave avalindi va avandu elefu, avalala kuva aviimiliri va avandu imia ndala, avalala kuva vimiliri va avandu amusini na valala vimiliri ku avandu likomi. Ndaatovora kandi vimiliri vaavo vandi kutura mu zihiiri ziombi.

¹⁶ “Ing'inga yene yeyo ndaavolera aviimiliri vinyu ndi, ‘Muhulirizi ovosooro voveeye hagati ha avandu vinyu muhelane likalaga liuvulungi ku vuli vosoolo, kali niiva vaveeye ku vandu vinyu anoho avageni vamenyi hagati hinyu.

¹⁷ Mutamanyia liyaanzilira lovega lulala mu likalaga lienyu mba. Mukalagiri mundu sa mulala keleng'ani; kali ave nivwaha, munene anoho mukekeeke. Mutatia mundu kali mulala mba, kigira likalaga lia muhaanaa litulaa ku Nyasaye. Niiva likuva liosi liveeye lidinyu kumunyi mulileete kuinzi, na ndalikalaga.’

¹⁸ Ku ing'inga ndala nzere ndaamuha amakuva goosi agadukanaa munyi mukore.

Avatunyirizi kutura Kadeshi Barinea

¹⁹ “Kwakora aga Yahova Nyasaye wiitu yakulaga kokole. Kwatula ku kiguru cha Sinai nikuzia kuvitira mu changalangwe kenene chukutiihiza nokolonda kunzira izizaa mu kivala chi vigulu cha vandu va Amori. Lwa kwaduka Kadeshi Barinea,

²⁰ ndamuvolera; ‘Kalunu mumali kuduuka mu kivala chi vigulu cha Avaamori, icha Yahova Nyasaye wiitu, Nyasaye wavaguuga wiitu ahaanaa ku kunyi.

²¹ Heenzi, Yahova Nyasaye winyu umali kuhaana ku munyi kivala zana. Muzie mwingiri mu kandi mukivuguli kuli Yahova Nyasaye wavaguuga vinyu yamuvolera. Mutatia anoho kukuza mioyo mba.’

²² “Navuzwa munyi mwaza ku inzi nimuvoora, ‘Leki kutumi avandu imbiri wiitu vazie kutunyiriza kivala zana kunangwa vaduuki kukovolera inzira indahi yo kolonda ku kandi ni madaala manene ga lugano ki agaveeye yo.’

²³ “Yiki chaloreka kuli keveeye kindu kilahi cho kokora. Ndaatovora avasaza likomi na vaviri, mulala kutura mu vuli ihiiri.

²⁴ Vazia mu kivala chi vigulu yicho nivaduuka mu livona lia Eshikoli nivakitunyiriza.

²⁵ Lwa virana vakoletera ku makuyu ga vanyoola yo ma nivakovoolera ndi kivala cha Yahova, Nyasaye wiitu ahaanaa ku kunyi yicho keveeye kenoru ligali.

²⁶ “Navuzwa munyi mwibaara ku lilaga lia Yahova Nyasaye winyu, kandi mwasuura kwingira mu kivala yicho.

²⁷ Mwiganaa aveene naveene mu mahema ginyu nimuvoora, Yahova yakusula, yakutuliza Egebeti aduuki kukuhaana ku vandu va Mori vakwiti.

²⁸ Kigira ki kuzie yo? Kutiiyi. Avasaza va kwatuma vamali kokovoolera ndi avandu vaveeye yo vaveeye ni zinguru ligali kandi avataambi kuvita kunyi, ma kandi vamenyi mu madaala manene agaveeye na madigi matambi ligali. Valora visukululwi via Anaki.”

²⁹ Navuzwa inzi ndavavolera, “Mutatia anoho kukuza mioyo kigira avandu yavo mba.

³⁰ Yahova Nyasaye winyu alimilira munyi kandi alamulwaanira, kuli mwalora vuzwa nakora mu Egebeti

³¹ kandi muchangalangwe. Mwalora kuli yamuleta vulahi mumirembe kologendo yilwo lwosi kuduuka havundu hano; kuli baba anyala kuginga muyaayi weve.

³² Navuzwa kali niiva ndavoora yaga goosi, simwali munyala kusuuvira Yahova mba,

³³ kali naava niyimilaa imbiri winyu kazozo kuzia kumwenyera havundu hamusosera. Kumumanyia inzira, yaazizaa imbiri winyu mu munara gwi lilesi mbasu gwosi na mumunaara gwu muliru uvudiku vwosi.

Yahova yahaana mageri ku avandu va Isiraeli

³⁴ “Yahova yahulira lielilira lienyu ma nasinyika; kandi yisuha navoora,

³⁵ ‘Sihaveeye ho numulala ku likula lidamanu yili ulingira mu kivala kenoru yicho ichandasuuviriza ndahaana ku avaguuga vinyu mba.

³⁶ Kalebu muyaayi wa Jefune yeng'ine vuzwa niyie ulingira mu. Yaali musuuvirifu ku inzi yeng'ine. Kandi ndamuha harara ni visukululwi vivie kivala yicho cha oyo amali kutunyiriza.’

³⁷ Kigira munyi, Yahova yavihilirwa ninzi kandi navoora, ‘Kali ivi, Musa, si ulingira mu kivala zana yicho mba.

³⁸ Navuzwa dinyirizaa uvuluviliri vwu mukonyeleri woovo, Joshua muyaayi wa Nuni, kigira oyo alingira. Alimilira avandu va Isiraeli kuzia kuvugura kivala yicho keve ichaavo.’

³⁹ “Maku Yahova yavolera kunyi kwosi, ‘Avana vinyu, avakikiri vasoleri ligali kumanya uvulungi nu vudamanu, valingira mu kivala zana yicho - avana va ivi wavoola ndi valagumirwa na vasigu vinyu. Ndahaana kivala zana kuvo kandi navo valakivugula.

⁴⁰ Navuzwa avandu munyi, girung'ani mwirane mu changalangwe kunzira inzizaa kunyanza Inzakanyu.’

⁴¹ “Munyi mwativula, ‘Musa, kumali kwona nukuvihiliriza Yahova. Navuzwa kalunu kulavingilira vuzwa, kuli Yahova Nyasaye wiitu yakulaga.’ Maku sa mulala ku munyi yetegeka kulwaana naganagana vulava vodoto kwingilira kivala chi vigulu.

⁴² “Navuzwa Yahova yambolera, ‘Uviganihize vatingilira kivala yicho mba, kigira sindava harara navo mba; na avasigu vaavo valavaguuta.’

⁴³ Inzi ndaamuvolera aga Yahova yaali navooye; navuzwa munyi simwagahulira mba. Mwibaara ku Yahova, kandi mu lielora lienyu mwazia mu kivala chi vigulu.

⁴⁴ Maku avandu va Amori, avamenyaa mu vigulu yivio, vaza nivamwingilira kuli muganda gwi zinzuki. Vamukunga kali kuduuka Horima kandi nivamuguutira yo mu kivala chi Vigulu cha Edomu.

⁴⁵ Kunangwa mwanira ku Yahova amukonye, navuzwa si yaali anyala kumuhulira anoho kuvaganagana mba.

Kogendagenda mwigendanyama

⁴⁶ “Kunangwa yiki nicho chagira nikomenya ha Kadeshi ku ing'inga indambi.