Jeremia 38 - KITABU KITAKATIFU

Jeremia mu Kidaho Chumu

¹ Shefatia mwana wa Matani, Gedalia mwana wa Pashuri, Jehukali mwana wa Shelemia na Pashuri mwana wa Malikia vahulira ndi mbolera avandu

² aga Yahova yaali navooye, “Oyo amenyaa mu lidaala yili, aliitwa ni liihi, inzara anoho vulwaye. Navuzwa yavo avaazia kwihana ku avandu va Babiloni si valitwa mba. Valahononoka mu likuza na valava mwoyo.”

³ Kandi ndavavolera ndi Yahova yaali navooye, “Ndahaana lidaala yili kuzinguru zie liihi lia Babiloni, na valaligumira.”

⁴ Maku vatumikiri vazia ku mwami ni vamuvolera, “Mundu uyu gaduukanaa yiitwi. Limoloma makuva kuli yaga liloomba avasikari mu lidaala kohenda mwoyo, kandi avoora makuva malala mere ku avandu vosi avatigara mu lidaala yili. Siagelizaa kokonya avandu mba, navuzwa agelizanga kuvasaliriza.”

⁵ Mwami Zedekia yativura, “Gaveeye amalahi ligali, maku munyala kokora choosi cha muganaganaa kuye. Inzi sinyala kumugaya mba.”

⁶ Kunangwa vambugura ni vamboha ku migoye ma nivanzikiza mu vogo vwa Malikia mwana wu mwami, uvwali mu mugizi gwi inyumba yu vwami. Amazi sigali mu vogo yivu mba, navuzwa ovodohi uvwere, na ndiyina musi mu vodohi.

⁷ Lwa Ebedimeleki kutura Ezopia, uwakola miyinzi munyumba yu vwami, yahulira ndi vamali kumbika mu vogo, ing'inga yu mwami yaali ni yikaye ha kirivwa cha Benjamini,

⁸ kunangwa Ebedimeleki yazia ha Kirivwa navolera mwami,

⁹ “O, mwami wange wu Luyali, aga avandu yava vamali kokora gaveeye amadamanu. Vamali kuviika muporofeti Jeremia muvogo, na gaveeye giligali inzara ilamwitira mu, kigira chukulia sikeveeye mu lidaala mba.”

¹⁰ Maku mwami yalaga Ebedimeleki avuguli vasaza vavaga vandulizi mu vogo imbiri wa ngikiri kukuzira mu.

¹¹ Maku Ebedimeleki yavugula avasaza yava, nazia navo munyumba yu vwami, nivingira mu keng'oze cha mavikiru, nivavugura zinguvu ziamadari nivavoha ku migoye ma nivikiza mu vogo.

¹² Ebedimeleki yambolera mbuguli zinguvu yizi mbiki mu zikwaha ziange manzevohe migoye kunangwa lwa vang'usa migoye jivuli kusaliriza, na ndaakola ndio.

¹³ Maku vang'usa ni migoye kutura mu vogo ma nivambiika mu muguzi gwu mulindi wi inyumba yu vwami.

Zedekia Yateeva Zing'anagani kutura ku Jeremia

¹⁴ Mwami Zedekia yatumana nzie kuye ha vwingiliru vwa kavaga vwi Litembeli lia Yahova. Mwami yambolera, “Ndakoteeva liteeva, na nyenya ombolere agiligali.”

¹⁵ Maku ndavolera mwami, “Niiva ndakovolera agiligali ivi ulanzita? Niiva ndahaana zing'anagani ziange ku ivi si ulambuliriza mba.”

¹⁶ Maku mwami Zedekia yanzisuhira mu vwivisu navoora, “Inzi nzisuha ku lieta lia Nyasaye oveeye mwoyo, Nyasaye uwahaana kukunyi livamwoyo ndi, si ndakwita kinga si ndakuviika mu zinguru zia avandu vakwiti mba.”

¹⁷ Maku ndaavolera mwami Zedekia ndi, Yahova Wuvunyali, Nyasaye wa avandu va Isiraeli, yavoola, “Niiva ulihaana mu zinguru zia avanene vu mwami wa Babiloni, hene yaho, ulava mwoyo, kandi lidaala linene yili si lilasambwa mba. Ivi harara na avandu vi inyumba yooyo mulava mwoyo.

¹⁸ Navuzwa niiva si ulihaana mu zinguru zia vatumikiri vu mwami wa Babiloni, na yaho, lidaala linene yili lilahaanwa ku avandu va Babiloni, avaazaa valisambe nu kulidiviza, na ivi si ulahononoka kutura kuvo mba.”

¹⁹ Navuzwa mwami yativura, “Inzi mbeeye nu vuti na avandu vi kivala chietu avamali kung'anya nu kuzia ku avandu va Babiloni. Inzi nyara kuvikwa hasi hi zinguru zia avandu va Babiloni na valambika mu kivi.”

²⁰ Inzi ndaavoora, “Ivi siulavikwa mu zinguru zia avandu va Babiloni mba. Ngogonya utie likuva lia Yahova; hene yaho, goosi galava amalahi ku ivi, kandi ulava mwoyo.

²¹ Navuzwa Yahova amali kumbulira mu malola agaza gekoleke niiva ulasuula kwihana mu zinguru zia avandu va Babiloni.

²² Mu malola yaga, ndaalora avakali vosi avatigara munyumba yu vwami vwi Ivuyuda nivahilwa ku mwami wa avanene va Babiloni. Huliriza ku agavavoola lwa vaali ni vazizaa: ‘Avalina vu mwami avasuuvirifu vamali kumugada, vamali kumuguuta nu kumwamiiha. Kalunu umali kusikira mu vodohi, avalina veve vamali kumuleka.’ ”

²³ Maku ndaameeda kovora, “Avakali vovo vosi kandi avana vovo vosi valahirwa ku avandu va Babiloni, na ivi mwene siulahononoka kutura kuvo mba. Mwami wa Babiloni alakokola kuva umuhambe, kandi lidaala linene yili lilasambwa nu kudivizwa ligali.”

²⁴ Mwami Zedekia yativura, “Utaleka mundu kali mulala amanye amakuva yaga, na ivi si ulakuza mba.

²⁵ Niiva avanene valahulira ndi inzi mali kumoloma na ivi, valaza nokokoteva agakovooye. Niiva siulavavoolera agakovooye, hene yaho, valakwita.

²⁶ Uvavoolere ndi ivi ongoonyangi nuyanza uvuli kumbira muvuhambe munyumba ya Jonazani kigira ndakuzira mu.”

²⁷ Maku avanene vosi vaza kandi nivandeeva, na ndaavativulira agu mwami yaali naamboleye kovora. Si vaali ni kindu cha vanyara kovora mba, kigira mundu woosi siyamanya anoho kuhulira agakwali nikovooye mba.

²⁸ Maku ndaamenya mumugizi gwu mulindi wi nyumba yu vwami kuduuka lidiku lie lidaala linene lia Jerusalemi liagumirwa.