Jeremia 24 - KITABU KITAKATIFUVihinda Viviri via Makuyu 1 Yahova yamanyia vihinda viviri via Makuyu ni viviikiywi imbiri wi Litembeli. Yaga gaali lwu mwami Nebukadineza wa Babiloni yaali ni yakahila mwami Jehoyakini wi Ivuyuda, mwana wa Jehoyakimu kuli umuhambe kutura Jerusalemi kuzia Babiloni, harara na aviimiliri vi Ivuyuda, na avasiza kandi avaturi vi miyinzi. 2 Kihinda chu kutanga chaali mu na makuyu amalahi ligali agatanga kwenga; kihinda cha kaviri, chaali na makuyu amadamanu ligali, agatanyala kulivwa. 3 Maku Yahova yambolera, “Jeremia, kindiki cha ivi ololaa?” Ndaativura, “Ndolaa amakuyu amalahi ligali, kandi amakuyu amadamanu ligali agatanyala kulivwa.” 4 Kunangwa, Yahova yambolera, 5 “Inzi Yahova, Nyasaye wa avandu va Isiraeli, ng'anagana kigira avandu vaahirwa ihale mukivala cha Babiloni kuva kuli amakuyu amalahi yaga, kandi ndavakolera vulahi. 6 Ndavalinda kandi ndavilanyia mukivala yiki. Ndavumbaka na si ndavasambula kandi mba. Ndavakora vasingiri vudinyu kuli misaala jitanyala kwifwa mba. 7 Ndavakora vave nuvuha vwu kumanya ndi inzi mbeeye Yahova. Maku valava avandu vange, na inzi ndava Nyasaye wavo, kigira valirana ku inzi ni mioyo jaavo josi. 8 “Navuzwa Zedekia mwami wi Ivuyuda, harara na avatumikiri veve, kandi na avandu vandi vosi avatigara mu Jerusalemi, avamenyi mukivala yiki anoho avaazia mukivala cha Egebeti, Inzi Yahova ndavakora vosi kuva kuli amakuyu gaveeye amadamanu ligali yaga, agatanyala kuliivwa mba. 9 Ndaleta kivi yiki kuvo, na kilava litihiza linene ligali ku zihiiri ziosi ziu mulirova. Avandu valavasekeriza, nukuvakolera ekehenyahenye kandi nukuvalegeriza, nukutumikira amita gaavo kuva kuli kiramo havundu hoosi handakavasalanye. 10 Ndaleta iliihi kuvo, inzara kandi uvulwaye kuduuka vosi valadivi. Si halakaveho kali na mulala ulitigala mu kivala cha ndaavaha harara na avaguuga vaavo mba.” |
©Bible Society of Kenya, 2019
Bible Society of Kenya