Isaya 64 - KITABU KITAKATIFU

¹ O, Yahova wakatanduyi ligulu ma wiki hasi ku lirova, kunangwa vigulu viakaadegeya imbiri woovo!

² Vigulu viladegela kuli amazi gatavagira ku muliru gudidimaa. Hamba uvuli zinguru zizio zinene ku vasigu vovo, kandi okole zihiiri zidegere imbiri woovo!

³ Ing'inga yaali ho lwa wakola vindu viu kutihiza iviakwavula kuganangana ku, vigulu viadegera imbiri woovo.

⁴ Sihaveeye ho nu mundu kali mulala uwalora anoho uwahulira Nyasaye kuli ivi mba, okolaa vikolwa kuli yivi ku yavo avasuuviraa muye.

⁵ Ivi uvugilira yavo avasangalira mu likora agaveeye malungi, yavo avizulizanga kuli wenya vaduuki komeya. Waali nu vutima ni kunyi, navuzwa kwazizagilira kokora uvwoni; kali mu vutima vuvwo ovonene, kunyi kumali kokora uvudamanu kutura ing'inga yakale. Kunyala ndi konyoora ovohonyi?

⁶ Kunyi kwosi kwaveeye avoni, kali vikolwa vietu vilungi viveeye kuli inguvu ifunyaa vugundu. Kigira uvwoni vwitu, koveeye kuli amatu ganiara ma gabulukizwa nimbuuza.

⁷ Siaveeye ho mundu kali mulala usaala ku lieta liilio mba, anoho mundu kali mulala uzaa ku ivi anyoore ovokonyi mba. Ivi umali kwivisa kutura ku kunyi kandi umali kokoleka kigira uvwoni vwitu.

⁸ Yahova, ivi oveeye baba wiitu. Kunyi koveeye kuli ovodohi, na ivi oveeye kuli umulongi. Ivi wakolomba.

⁹ Kunangwa Yahova, utava nu vutima ni kunyi mba, anoho utizuliza uvwoni vwitu mihiga ni mihiga mba. Kunyi kwosi koveeye avandu vovo, okoveere zimbavasi.

¹⁰ Amadara googo amatakatifu gaveeye kuli changalangwi; Ziyoni imali kuva changalangwi, na Jerusalemi imali kuva hazwa.

¹¹ Litembeli lietu lilahi kandi Litakatifu, havundu ha vaguuga viitu vizominya ivi, limali kusambwa nu muliru, kandi havundu hoosi ha kwayaanza.

¹² O, Yahova, uligaya ku vindu yivi viosi? Ulachiring'ana, kandi ulakoleka kuduuki kusalirizwa ligali?