Isaya 62 - KITABU KITAKATIFU

¹ Inzi si ndachiring'ana kigira avandu va Ziyoni mba, kandi si ndasosa kigira Jerusalemi mba; kuduuka uvulungi vwivwe vong'ereng'ane kuli uvulavu vwa mugambazuri, kandi ovohonyi vwivwe vove kuli itaya yaka mu vudiku.

² Zihiiri ziosi zilarora uvulungi vwinyu O, Jerusalemi, kandi avami vosi valalola uvukumi vwinyu. Kandi mulagulikwa lieta lihia, ilieta litula ku Yahova mwene.

³ Mulava kuli igudwa indahi mu mukono gwa Yahova, kandi kuli itaji yu vwami mumukono gwa Nyasaye winyu.

⁴ Simulalangwa kandi, “Azuba,” liveeye kovora “Avandu valekwa” anoho kivala chiinyu si kilalangwa “Shemama” liveeye kovora “Mukali walekwa.” Navuzwa mulalangwa “Hefiziba” - liveeye kovora “Uvusangari vwa Nyasaye voveeye mu munyi.” Kivala chiinyu kilalangwa; “Beula” - liveeye kovora - “Wakwevwa.” Yahova asangalira munyi, kandi mulava kuli musaza mu kivala chiinyu.

⁵ Nyasaye alasangalira munyi kuli muyaayi asangalira mwiha wa asereraa, kandi kuli mwiha asangalira muyaayi wa aselerangwa ku.

⁶ O, Jerusalemi, mali kuviika avasikari ku amadigi giinyu. Si valachiring'ana mu muvasu gwosi kandi mu vudiku vwosi mba. Munyi avizulizaa Yahova, mutaleka amwiviliri mba.

⁷ Mutahaana vwiyangu ku Yahova kuduuka asingirize lidaala linene lia Jerusalemi kandi alilombe live lidaala lizominywa mu kivala choosi.

⁸ Yahova umali kwisuuha nu mukono gwigwe mulungi kandi ku zinguru zizie ndi, “Inzi si ndahaana uvuswage vwinyu kuva chukulia ku vasigu vinyu mba, kandi avageni si valanwa iwaini yinyu mba.

⁹ Navuzwa munyi avamiiza uvuswage kandi ni mugesa, mulalia nu kwizominya Yahova; Kandi yavo avalindaa nu kuvungiza amazabibu, valanwa iwaini yago mu mugizi gwi Litembeli liange Litakatifu.”

¹⁰ Munyi avandu va Jerusalemi, muzie mu lidaala linene mulombe inzira ku vandu vinyu avilanaa! Mwetegekize inzira enene, mutulizi amagina muyo! Mugiingi ebendera kuva kuli ekelolero, kunangwa zihiiri ziduuki kumanya;

¹¹ Yahova alandizaa ku vandu vosi vi lirova ndi: “Muvoolere avandu va Jerusalemi, ndi Yahova yazaa kumuhonyia, kandi alaza harara na vandu va yamala kosoola.”

¹² Mulalangwa, “Avandu va Nyasaye Avatakatifu”, “Avandu va Nyasaye amali kohonyia.” Jerusalemi ilalangwa, “Lidaala linene lia Nyasaye ayaanza”, “Lidaala linene lia Nyasaye yavula koleka.”