Isaya 5 - KITABU KITAKATIFU

Lwimbu kigira mulimi gwi kizabibu

¹ Huliriza lwa ngwimbira lwimbu yilu. Lwimbu lwu mulina wange harara nu mulimi gwi kizabibu chiche: Mulina wange yaali nu mulimi gwi kizabibu ku kiguru cha malova magunamu.

² Yalima mulimi natulizamu amagina goosi; yataga mizabibu milahi ligali. Yumbaka munara gwu kulindilira ku hagati hi kizabibu, kandi yayava liliina lio kolomberamu iwaini kutura ku mazabibu. Yalindilira makuyu kwenga, navuzwa vuli likuyu liali lilulu.

³ Kunangwa kalunu mulina wange avoora, “O, munyi avandu vamenyi mu Jerusalemi ni Ivuyuda, muve vakalagi hagati hi kizabibu change ninzi mwene.

⁴ Keveeye ho ni kindu chandavula kokora mu kizabibu yiki? Kunangwa, kigira ki mizabibu jamaa mazabibu malulu havogono vwa mazabibu malahi?

⁵ “Kalunu ndamuvolera aganzizaa kokora ku kizabibu change; Ndatuliza ho lungaga lwacho, kandi ndasambura lidigi liakinga zimbega ziacho ziosi, na ndaleka zinyama ziu muvulimu kulia nu kuduvagira hasi mizabibu.

⁶ Ndakeleka keve hazwa, kandi ndaleka indiva emere mu, sindakesemberera mba. Si ndahalurira zisia zie mizabibu mba, anoho si ndalima mu kandi mba. Navuzwa ndaleka amafwa kandi zindavati zimere mu nu kukunika kizabibu choosi! Kali ndigalila amalesi gavuli kukubiza imbura ku cho.”

⁷ Isiraeli eveeye kizabibu cha Yahova Wuvunyali, na vandu vi Ivuyuda vaveeye mizabibu ja Yahova yasimika. Yavalindilira vakole amalahi, navuzwa vakora uvudamanu vwu kwita. Yahova yavalindilira vakole amalungi, navuzwa vadambiza yavo avanira vanyoore vulungi.

Uvudamanu vwa vandu vakolaa

⁸ O, vayaayi kivi keveeye ku munyi! Kigira mumali kugura zinyumba zinyingi kandi milimi komeeda ku vindu via muveeye navio. Nonoho si halavaho nahavundu humundu wundi amenyaa mba, kandi munyi veng'ine mulamenya mu kivala yiki.

⁹ Inzi mali kuhulira Yahova Wuvunyali navoora, “Ligali zinyumba ziosi ziveeye zinene kandi zindahi ligali zilatigala mang'anye. Mundu sialamenya muzio kali mulala mba.

¹⁰ Mulimi gwi zihekita 10 ugwama amazabibu galatuliza zilita 8 vuzwa ziewaini zieng'ine. Na zikilo 180 ziu vumwu zilatuliza zikilo 18 ziu vuswage.”

¹¹ O, vayaayi, kivi keveeye ku munyi! Munyi muturaa mugambazuri nimuzia kunwa, kandi muhambikaa zing'inga zia mugolova.

¹² Mu lilia lienyu musangalaa nimukuba uvukana, amadungu, amarere, kandi zisugudi, kandi ni munwa iwaini. Navuzwa simuveeye ni limanyiriza miyinzi ja Yahova Nyasaye akola mba.

¹³ Kigira yaga mulahilwa ihale kuli avahambe. Aviimiliri vinyu valakuza kigira inzara, kandi avandu vandi avanyingi valakuza kigira uvuluhu.

¹⁴ Kivala cha vakuzu keveeye ninzara. Chalaminyi munwa gwacho kuvamira. Kimiraa aviimiliri va Jerusalemi harara ni kiduma cha vandu vandi avakolaa liyoga.

¹⁵ Vuli mundu alava mu zisoni, kandi avigingiri vosi valagehizwa.

¹⁶ Navuzwa Yahova Wuvunyali amanyia ovonene vwivwe mu likora lilie lirungi, kandi avuulaa uvutakatifu vwivwe mu likalagira avandu veve.

¹⁷ Vimeme via magondi, zimburi zisoleri vilaaya mu mang'anye ga madaala manene gaavo, kuli viuvwayiru vwavio.

¹⁸ O, vayaayi, kivi keveeye ku yavo avang'usaa uvwoni nimigoye jovovehi! Avang'usaa uvudamanu ni migoye ji ligale lie zing'ombe.

¹⁹ Vavoola, “Leki Yahova akole vwangu nokokola ichaavoolaa alakola, mbula kuduuki kukelora. Leka Nyasaye Mutakatifu wa Isiraeli adukize lilalira lilie. Leki kolole aveeye na lilohiza ki mu zing'anagani zizie.”

²⁰ O, vayaayi, kivi keveeye ku yavo avalangaa uvudamanu kuva uvulahi, na avalangaa uvulahi kuva uvudamanu! Mugirung'anyia kisundi kuvo uvulavu, nu uvulavu kuva kisundi. Mukoraa yicho ekeveeye kilulu ligali kuva kenoru kuli uvwuki, na yicho ekeveeye kenoru kuva ikilulu ligali.

²¹ O, vayaayi, kivi keveeye ku yavo aviiganaganaa ndi vaveeye avageri, kandi aviganaganaa ndi vaveeye nilimanya!

²² O, vayaayi, kivi keveeye ku yavo avizingulu mu linwa iwaini! Kandi avaluviriri mu lizuganyia vilulu viu kuhambikiza.

²³ Navuzwa kigira viambeti, mulakula yavo avamahiolo vazie, na mwigalira utaveeye nimbala kuvula kunyoola likalaga liu vulungi.

²⁴ Kunangwa kalunu, kuli uluvuva nuvulimu vwumu vwilingaa harara nukuhia mu muliru, nindio imiri jinyu jilagunda na vimuli via mauwa viluuma nukuhuuzwa ihale ligali kigira mwamala kusuura aga Yahova Wuvunyali, Nyasaye Mutakatifu wa Isiraeli, yakwigiza.

²⁵ Kigira yaga, Yahova aveeye nu vutima na vandu veve na umali kunyiira mukono gwigwe ukuvaha amageri. Ivigulu viladegera, miviri ja yavo avakuzaa jilalekwa muzinzira kuli mavivi. Na kali ndio uvutima vululu vwa Yahova sivulalekera mba; navuzwa alanyiira mukono gwigwe kuhaana amageri.

²⁶ Yahova ahaanaa kimanyiru ukulanga zihiiri zie ihale. Avakubiraa miluli kuvalanga vaze kutura ku keheri che lirova. Na henza, vazaa nivanyagura zimbiru, vwangu ligali!

²⁷ Siali ho nu mulala uluhaa; siali ho nu mulala uwikigitala. Sivatengezaa anoho kogona zindoolo mba. Misibi sijilegeyaa mu vikenge viavo mba; migoye ji vilato viavo sijilakalika mba.

²⁸ Mivano jaavo juvuta ni miugi ligali, nuvuta vwavo vwetegeki kulasa. Zimbagayu zie zibarasi ziavo ziveeye zindinyu kuli magina; virenge via magare gaavo gu vulwani vinyagulaa kuli kihuzuzi.

²⁹ Avasikari vahumaa kuli zisimba zimali kwita inyama na zigigingaa kugihira ha vundu hataveeye ho nu mulala unyala kuzinyaga.

³⁰ Lwa lidiku yilio liliduuka, zilahumira Isiraeli vudinyu ligali kuli lihuma lie inyanza eveeye nu vutima. Henza ku kivala yiki! Kisundi ni kivi! Uvulavu vukunikiywi ni kisundi.