Hosea 10 - KITABU KITAKATIFU

¹ Avandu va Isiraeli vaali kuli muzabibu munetu ugwama makuyu amanyingi. Lwa vaali ni linyola linyingi, nilwo lwa vumbaka uvwali vunyingi. Limeedeka liu vutugi vwi kivala chavo liavakola kolomba zitiru zia magina zindahi ziavasigamiraa.

² Avandu yavo, mioyo jaavo jiveeye ju vugadi; kalunu valasalirizwa kigira uvwoni vwavo. Nyasaye alavunanyia uvwali vwavo kandi aladiviza zitiru ziavo.

³ Maku avandu yava valavoora, “Kunyi si koveeye nu mwami mba kigira si kwatia Yahova mba. Navuzwa kali niiva kwakaveeye nu umwami yakakokoleye kindiki?”

⁴ Avandu yava vamoloma mang'ana gavuzwa, kandi valomba lilagana liavuzwa kandi indagano yavuzwa. Kunangwa vakoli likalaga lirungi kuva likalaga litaveeye lirungi kuli indiva yi sumu ku vitagwa mu mulimi.

⁵ Avandu vamenyi mu lidaala lia Samaria valava nuvuti kandi valasioma kigira igiriki yu mugasa ha Bezaveni. Yavo harara na avasaalisi vatumikira kifananyi valagilirira kigira uvukumi vumali kutulizwa kuyo.

⁶ Kifananyi yiki kilagingwa nu kuhilwa mukivala cha Asiria keve kuli mutungu gwu vusuuru ku mwami munene. Avandu va Isiraeli valava mu zisoni kigira vasigamira kifananyi yiki.

⁷ Mwami wi lidaala lia Samaria aladiva kuli kedonye chu musaala ku mazi.

⁸ Havundu hadiguluku ha Bezi Aveni, ha vandu va Isiraeli vasigamira vifananyi haladivizwa. Amafa kandi zindavati vilamera ku vwali vwavo.Avandu valavoolera vigulu ndi, “Mukuvisi!” Kandi valavoolera utugulu ndi, “Mukukingi!”

Yahova alaangaa Kuhaana Mageri ku Vandu va Isiraeli

⁹ Yahova avoora, “Avandu va Isiraeli, si valekera kokora uvwoni ku inzi kutura ing'inga ya vaali ha Gibea mba. Kunangwa Uvulwani vulavonyoola mu Gibea.

¹⁰ Inzi ndingilira vandu vu uvwoni yava kandi ndahaana mageri. Zihiiri zilahambana harara nukuvalwana kandi ndavaha mageri kigira uvwoni vwavo vunyingi.

¹¹ “Avandu va Isiraeli vigizwa vulahi kuli kemoli chigizwa vulahi ichetegeki kuhuura uvuswage. Navuzwa ndaaganagana kuviika iniira ku mavega gayo amalahi kuvakola kuyinzira vudinyu. Avandu vi Ivuyuda valalima na vandu va Isiraeli valavusa.

¹² Inzi ndaavoora, ‘Mwenyelerizi kokora uvulungi munyi aveene, na mulanyola uvuyanzi vutaveeye nekeheri. Mutulizi vudamanu vwinyu, kigira ing'inga yiduuki yu kwenya Yahova, aduuki koleta ovohonyi ku munyi.’

¹³ Munyi mwakora uvudamanu, kandi mumali konyoora likora liu vudamanu vwinyu, mumali konyoora madanyi gu vugadi vwinyu. “Kigira mwasuuvira mu zibarasi zienyu kandi mu vasikari vinyu vanyingi,

¹⁴ Muganda gwa vandu viliihi gulaza kulwaana vandu vinyu, kandi zimbinga zienyu ziosi ziladivizwa. Nalive lidiku kuli lwu mwami Shalimani yadiviza Lidaala linene lia Bezarabeli mu vulwani. Avamama harara na vana vaavo vashonoranywa mu vidonye kuduuka nivakuza.

¹⁵ Yaga nigo agalikoleka ku munyi, avandu va Bezeli, kigira uvudamanu vwinyu vwukuvihiliriza vwa mumali kokora. Nonoho lwu vulwani vutanga, umwami wa Isiraeli alakakuzi.”