Habakuk 1 - KITABU KITAKATIFU

Habakuki Yigana Kigira Kuvula Kuva nu Vulungi

¹ Yaga na makuva ga Yahova yavulira muporofeti habakuki.

² O, Yahova, ndavugura ing'inga ki kwanira vokonyi ku ivi nukikiri kuhulira kandi nukikiri kokohonyia kutura mu kilage?

³ Kigira ki ondeki ndore vudinyu kuli yivu? Wikuzira ndi kolola vudamanu kuli yivu? Vwoneku ni kivihiri vimali kungumberiza. Volembani kandi vulwani viveeye havundu hoosi.

⁴ Malago sigaveeye ni zinguru mba, kandi gaveeye vuzwa, vulungi sivokolwaa mba. Avandu vadamanu vanyoola vindu vilahi via vandu valungi, kandi vulungi vuchaminywaa.

Mativuli ga Yahova

⁵ Maku Yahova yavolera vandu veve, “Muzizagiliri kohenza zihiiri ziveeye ahimbi na munyi, na mulagenya ku gamulolaa. Nziza kokora kindu cha mulivula kusuuvira lwamulikihulira.

⁶ Nziza kuhaana zinguru ku vandu va Babiloni, avandu valulu, vataveeye ni lisosa. Vagenda ni kivigu mu kivala nu kuguuta vwami vundi.

⁷ Valandiza vuti ni lidegera linene kandi mu vwelori vwavo valivugulira malago.

⁸ “Zibarasi ziavo ziveeye ni zimbiru kuvita zingo, kandi ziveeye zinduru kuvita vivwi viveeye ni inzara. Avahiri vi zibarasi vazaa ni vanini kuzio kutura muvivala viveeye ihale; zibarasi ziavo zikwatula malova. Viika kutura ku zibarasi vwangu kuli kihungu kigumi via kihiimaa.

⁹ “Amahi gaavo gaaza ni zinguru ziu kuguuta, kandi vuli mundu atihizwaa ni liza liavo. Avahambe vaavo vaveeye vanyingi kuli muyeke.

¹⁰ Vachaaya vami kandi vasekeriza vaamiihi. Sihaveeye ho ni imbinga inyala kuvigalira mba. Vavungizaa kumalova ma vagivugula.

¹¹ Maku vavitaa vwangu kuli vukindu ma vazia, nyasaye wa vandu yava ni zinguru ziavo.”

Habakuki Yigana ku Yahova Kandi

¹² Yahova, ivi oveeye Nyasaye kutura mu litanga. Oveeye Nyasaye wange mutakatifu kandi wi mihiga ni mihiga. Oveeye Yahova Nyasaye wange kandi mukingi wange; ivi umali kotovola vandu va Babiloni kandi uvaheeye zinguru vaduuki kuhaana mageri ku kunye.

¹³ Navuzwa ivi unyala kuhulirizana ndi na vandu vaveeye vagadi kandi vadamanu kuli yava? Ivi oveeye mutakatifu ligali kolola vudamanu, kandi wikuziraa kolola vandu ni vakora vudamanu. Kigira ki ukiring'anaa lwa vandu yava vadiviza vandu vovo avaveeye valungi ligali kuvita yavo.

¹⁴ Kigira ki okolera vandu kuli zisuzi anoho kiganda chi viguguli vitaveeye nu mwamihi kuvimilira?

¹⁵ Avandu va Babiloni vagumira vandu ni zindoani kuli zisuzi. Vavang'usaa kutura mumuluvo kandi vahanzuka nu vusangali kuli vavagumiyi!

¹⁶ Kali vasigamira miluvo jaavo kandi vahaana vihaanwa vie visiuviliru kuzio, kigira miluvo jaavo givahezaa choosi cha venya.

¹⁷ Valazizagilira kutumikira vivavi viavo zing'inga ziosi nu kudiviza zihiiri vugira zimbavasi?