Filemona 1 - KITABU KITAKATIFU

¹ Inzi Paolo, muhambe kigira Kristo Yeso, kandi Timateo amiitu wiitu Kong'oderaa ivi Filimona, umulina umuyanze wiitu kandi muyinziri wache wiitu

² harara ni likanisa livuganiraa munyumba yooyo, mbozwa wiitu Afia kandi Arikipo, umusikari wache wiitu.

³ Kusaala Nyasaye Baba wiitu kandi Mwami Yeso Kristo ahaane zimbavasi ni mirembe ku munyi.

Uvuyanzi kandi lisuuvira lia Filimona.

⁴ Amiitu Filimona, sandizaa Nyasaye wange kazozo, lwa ngwizulizaa mulisaala liange,

⁵ kigira mbulira amakuva goosi guvuyaanzi vuvwo ku vandu va Nyasaye vosi kandi lisuuvira lia oveeye nalio mu Mwami Yeso.

⁶ Lisaala liange liveeye ndi, lisanga lietu harara niivi ku vandu avasuuviri lilakaleete limanyiriza linene liu uvugasu vwosi vwa kunyi koveeye navwo, mu vuhambani vwitu mu Kristo.

⁷ Amiitu wange umuyanze ndaali nu vusangali uvunyingi kandi kelema mwoyo kigira uvuyanzi vuvwo! Ivi umali kusangaliza mioyo ja vandu va Nyasaye.

Ilienya lia Paolo kigira Onesimasi

⁸ Ku kivuni yiki mbeeye nu vuluviliri vwosi, kuli amiitu woovo mu Kristo, ngulaga okole ikiduukanaa kekolwi.

⁹ Navuzwa kigira nguyaanzaa, ngogonya vuzwa mu vogono yivwo. Ngolaa ndio kali nimbeeye Paolo, umutumwa wa Kristo Yeso kandi kalunu mbeeye umuhambe kigira oyo.

¹⁰ Kunangwa ngogonya ligali mu vogono vwa Onesimasi, oveeye mwana wange mu Kristo; kigira lwa mbeeye mu vuhambe, mali kuva baba weve mu roho.

¹¹ Maziambiri Onesimasi siyaali no vokonyi ku ivi mba; navuzwa kalunu aveeye novokonyi ku ivi kandi ku inzi.

¹² Nguyu mutumaa yirani ku ivi kandi aveeye umuyanze wu mwoyo gwange ligali.

¹³ Ndakayanzi amenye ninzi hano aduuki kundumikira mu vogono vuvwo, lwa mbeeye muvuhambe kigira Ivangeri.

¹⁴ Navuzwa sinyenyaa kokora ikindu choosi vugira livugilira liilio mba. Sinyenyaa kukuniga ku ongonye mba, kigira uvulahi vuvwo kuduuka vutuli ku liyaanza liilio mwene navuzwa sigaveeye kigira linigwa mba.

¹⁵ Hawundi yiki nicho ikivuni chagira Onesimasi natura ku ivi ku ing'inga ngekeeke, kunangwa ivi aduuki komenya nivi;

¹⁶ Sigaveeye kuli umutugwa, navuzwa aviti mutugwa ligali, aveeye amiitu umuyanze mu Kristo. Aveeye umuyanze ligali ku inzi ligali! Kandi ku ivi alava umuyanze ligali kuli mutugwa kandi kuli amiitu mu Mwami.

¹⁷ Kunangwa, niiva uganaganaa kuvugiliraa inzi kuva kuli umulina woovo, mwaza mwingilizi yirani ku ivi kuli unyala kunzingiriza.

¹⁸ Niiva yakwonera ku kindu choosi, anoho niiva naveeye niligovi liilio liosi, yaanza uviiki ku inzi chazana.

¹⁹ Inzi Paolo, ndang'oda yaga nu mukono gwange mwene, ndakutunga Sigaduukana ngwizulizi, ndi ivi mwene oveeye ni ligovi lie livamwoyo liilio mwene mba.

²⁰ Kunangwa, amiitu wange, nuyanza ngolera uvulahi yivu kigira Mwami; kuli amiitu mu Kristo, sangariza mwoyo gwange mu Kristo!

²¹ Mbeeye ni lisuuvira ndi, lwa ng'oda yaga ku ivi, ulakola aga ngoteva, kandi manya ligali ndi ulakola ligali agambooraa kali kuvita.

²² Harara na yaga, wetegekizi inyumba yange kigira suuviraa ndi, Nyasaye alahaana amativuli ku lisaala lienyu vosi, ma nduuki kwirana ku munyi.

Mirembe ju Kumaliriza

²³ Epafura, muhambe wache wange kigira Kristo Yeso uhaani mirembe.

²⁴ Kandi avayinziri vache vange, Mariko, Arisitariko, Dema na Luka, avayinziri vache vange vahaani mirembe.

²⁵ Zimbavasi ziu Mwami Yeso Kristo, zive harara ni munyi mwosi. Amini.