Ezekieli 9 - KITABU KITAKATIFU

Nyasaye Yahaana Mageri Ku vandu va Jerusalemi ni Vuyuda

¹ Maku ndaahulira mwoyo gwa Nyasaye niguhanzuka, “Hambi hano, munyi avandu vamuziza kuhana mageri ku lidaala linene. Vuli mulala agingi kivavi chiche.”

² Nonoho avasaza sita vaza kutura kunzira ya higulu, kulovega lwi kirivwa cha Ivaale. Vuli mulala kuvo yaali nagingi ichugi. Harara navo, yaliho nu mundu uwaali niyiviiki inguvu yu luvaala, kandi nagiingi kindu chu kong'odera. Vosi vaza nivasingila ha vwali vwu mugasa.

³ Maku uvukumi vwa Nyasaye wa Isiraeli vwazia Igulu kutura ku vakerubi, nivuzia kuvwingiliru vwi Litembeli. Yahova yalanga mundu waali niyiviiki inguvu yu luvaala navoora,

⁴ “Zia mu lidaala linene lia Jerusalemi liosi na uviiki kelolero ku vweni vwa vuli mundu overeraa kandi usiomaa kigira vindu viosi viu kuvihiliriza vikoleka mu lidaala yili.”

⁵ Kandi ndaahulira Nyasaye navolera vandu vandi, “Mumulonde kuduuka mu lidaala linene, kandi mu mwiti. Mutaleki mundu kali mulala mba; kandi mutavererera mundu kali mulala mba.

⁶ Mwiti avasaakulu, avayaayi avasoleri kandi avakaana vasoleri, avakali kandi avana vakekeeke. Navuzwa mutadiiri ku mundu woosi oveeye ni kelolero ku vweni vwivwe mba. Mutangili hano mu Litembeli liange.” Kunangwa vatanga kwita aviimiliri vaali nivasingiyi ha Litembeli.

⁷ Nyasaye yavavolera, “Yonogonyi Litembeli; kandi muviiki miviri javakuzu mu migizi ja lio. Zi mutange miyinzi!” Kunangwa vatanga kwita vandu mu lidaala.

⁸ Lwa vaali nivazizagilira kwita, inzi ndaahononoka. Ndaagwa hasi mamumama kandi nindira nembora, “Mwami munene Yahova, ivi oveeye nu vutima ligali na vandu va Jerusalemi na uzizaa kwita vuli mundu woosi uwatigala mu Isiraeli?”

⁹ Nyasaye yativura, “Avandu va Isiraeli na vandu vi Ivuyuda vamali kokora vwoni vudamanu ligali. Vamali kwita vandu mu kivala choosi kandi vamali kuviika likalaga litaveeye lirungi mu Jerusalemi. Vavoola ndi inzi Yahova, mali koleka kivala chavo kandi si mbalolaa mba.

¹⁰ Navuzwa si ndavavererera, anoho si ndavahonyia mba. Ndavaha mageri kuli vahaana mageri ku vandi.”

¹¹ Maku mundu yaali niyiviiki inguvu yu luvaala yirana navoora, “Inzi mali kokora kuli wandaga.”