Ezekieli 35 - KITABU KITAKATIFU

Amageri ga Nyasaye ku Kivala cha Edomu

¹ Yahova yamoloma na inzi.

² Yavoola, “Mwana wu Mundu, ohenze ku kivala cha Edomu na uporofete makuva kigira kuhaana mageri ku vandu va Edomu.

³ Ovoolere avandu aga Inzi, Mwami Munene Yahova mboraa: Inzi mbeeye musigu winyu, munyi avandu va Edomu! Ndahaana mageri ku munyi kandi ndamukora muve hazwa.

⁴ Ndakora madaala ginyu kuva mang'anye, na munyi mulava hazwa. Maku mulamanya ndi, inzi mbeeye Yahova.

⁵ “Munyi mwali avasigu kazozo ku vandu va Isiraeli, kandi mwaleka avandu nivaviita mu ing'inga yi kivi, ing'inga yu kumaliriza kuhaana mageri kigira uvwoni vwavo.

⁶ Kulwayago, ligali kuli inzi Mwami Munene Yahova, mbeeye Nyasaye omenya. Likuza liladuuka ku munyi na si mulahononoka mba. Mumali kololeka kuva avalumindi kulwayago, mulakuza.

⁷ Ndakora kivala cha Edomu kuva hazwa kandi ndiita vuli mundu woosi uvitira mucho.

⁸ Ndakunika vigulu viosi ni miviri ja vakuzu, kandi miviri ja yavo aviitirwa mu vulwani jirakunika amavoona goosi, kandi jirasiuvwa mu migera ja mazi.

⁹ Ndamukora kuva hazwa mihiga ni mihiga, mundu kali mulala si alakamenye mu madaala ginyu kandi mba. Maku mulakamenye ndi, Inzi mbeeye Yahova.

¹⁰ “Munyi mwavoora ndi, avandu vi ihiiri yi Ivuyuda na Isiraeli, harara ni vivala viavo ni vienyu kandi mulavivugula, kali niiva Inzi Yahova, ndaali Nyasaye wavo.

¹¹ Kulwayago, ligali kuli Inzi Yahova Wuvunyali, mbeeye Nyasaye omenya, ndamukolera kolondekana nembodoka yinyu kandi ni likendeka lienyu, kuli mwalolekiza ku vandu vange vutima vwinyu. Avandu vange valamanya ndi, Inzi mbana mageri ku munyi kigira uvudamanu vwa mwavakolera.

¹² Maku mulakamanye ndi, Inzi Yahova ndahulira manyego ginyu ku vandu va Isiraeli lwa mwavoora ndi: vatigaye hazwa kandi vahaniyiwi ku munyi kuvadiviza.

¹³ Inzi mali kuhulira liegingira lienyu, nu kovora, makuva madamanu ku inzi.”

¹⁴ Yahova Wuvunyali avoora, “Ndamukora kuva hazwa ligali, kandi avandu mu kivala choosi valasangalira liigwa lienyu,

¹⁵ kuli mwasangalira lidivizwa lia vandu Vaisiraeli miandu jange, kunangwa inzi ndamukora kuva hazwa, kiguru cha Seiri, yee, kivala choosi cha Edomu, ndakikola kuva hazwa. Maku vuli mundu woosi alakamanye ndi inzi mbeeye Yahova.”