Ezekieli 34 - KITABU KITAKATIFU

Aviimiliri va Isiraeli

¹ Yahova yamoloma na inzi.

² Yavoola, “Mwana wu Mundu, oporofete uvudamanu vwa avami va Isiraeli. Porofeta kuvo, uvavoolere aga inzi, Yahova Wuvunyali mbavooleraa: Kivi keveeye ku, munyi aviimiliri va Isiraeli! Munyi mwehendera mwoyo, navuzwa si mulinda magondi gange mba.

³ Munwezaa maveere, mwivikaa zinguvu zialombwa ku uvwoya, kandi mwita ligondi lilahi ligali ma mulia. Navuzwa si mulinda magondi gange mba.

⁴ Si muhenderaa agaveeye amadedekere anoho kohonyia agaveeye malwaye mba, anoho si muvohelelaa agasaliraa anoho kwiranyia agavoyavoya anoho kohenza aga gotaa mba. Muvogono yivwo mumali kugamiiha ni zinguru kandi nu vululu.

⁵ Kigira magondi si gaali numwiliri mba, gasalanywa, kandi zinyama zinduru ziu muvulimi ziagiita kandi zigalia.

⁶ Magondi gange gaavoyavoya ku vigulu viosi kandi kuvuli tugulu tutambi. Gasalanywa ku lirova liosi, kandi siaveeye ho kali mulala uwageenyeleriza mba.

⁷ “Kalunu munyi aviimiliri, muhuliri aga inzi, Yahova muvooleraa.

⁸ Kuli mbeeye ligali Nyasaye oveeye mwoyo, vwakaveeye vulahi munyi kumbulirizi. Magondi gange gamali kwingilirwa ni zinyama ziu muvulimu; zimali kugiita kandi kugalia kigira mwimiliri si yaali ho mba. Aviimiliri vange si vageriza kwenya magondi gange mba. Vehendera mwoyo aveene vugira kohendera magondi gange.

⁹ Kunangwa, mumbulirizi munyi aviimiliri!

¹⁰ Inzi, Mwami Munene Yahova mboraa, mbeeye musigu winyu. Ndakavuguli magondi gange kutura ku munyi kandi si mulakave aviimiliri vago kandi mba. Si nandeke na mwilindi aveene kandi mba. Ndakahonyie magondi gange kutura ku munyi kandi si mulagalia kandi mba.

Yahova Aveeye Mwimiliri Mulahi

¹¹ “Inzi Mwami Munene Yahova, muvooleraa ndi, Inzi mwene ndaaya magondi gange nu kugalinda

¹² munzira indara nzere, kuli mwimiliri alindaa magondi geege agaali nigasalaana ma agiranyia harara kandi. Naangiranyie kutura havundu hoosi uwa gaali nigasalanyirwa ku lidiku lie kisundi kandi kivi.

¹³ Nangatulizi muvivala vigeni, nukugavungiza harara, kandi nangalete mu kivala chago ageene. Ndakagimiliri kuzia mu vigulu kandi mu togera twa Isiraeli kandi na ngayizi mu vwayiru vulahi.

¹⁴ Nangakole nagaye mu lisoolwa mu vulimu vwu mu kiguru kandi mu mavoona nu muvwayiru vwosi vulahi vwi kivala cha Isiraeli.

¹⁵ Inzi mwene ndakave mwimiliri wamagondi gange, kandi ndakaganyoolere havundu hokososa. Inzi, Mwami Munene mali kovora.

¹⁶ “Inzi mwene ndahenza agagotaa; ndiranyia agavoyavoya, ndavohelera agasalirizwa, kandi ndahonyia yago agaveeye malwaye. Ndakadivizi agaveeye amakomeru kandi agizingulu, kigira mbeeye mwimiliri okolaa agaveeye malungi.

¹⁷ “Chayo change, kalunu, inzi Mwami Munene Yahova muvooleraa ndi, ndakalagira vuli mulala ku munyi kandi ndavukanyia vulahi kutura ku vudamanu, ndavukanyia magondi kutura mu zimburi.

¹⁸ Malala kugo galiiza vunyasi vulahi magasenasena mu vutigaye. Agandi ganweza mazi malahi magasena mu nukuduvura agatigaye.

¹⁹ Magondi gange gandi galiiza vunyasi vwa musenaseni mu nukunwa mazi gamuduvuyi.

²⁰ “Kunangwa kalunu, Inzi, Mwami Munene Yahova muvooleraa ndi, ndahaana likalaga hagati ha magondi gi zinguru kandi magondi madedekere.

²¹ Munyi mwasuunda agaveeye malwaye halovega kandi nimugakubira mu chayo.

²² Navuzwa ndasoora magondi gange na si ndagaleka gakolelwe vudamanu kandi mba. Ndahaana likalaga ku vuli magondi gange kandi nukwavukanya malahi kutura mu madamanu.

²³ Ndahaana Mwami Daudi yeng'ine kuli mutumikiri wange kuva mwimiliri wavo kandi alagalinda.

²⁴ Inzi, Yahova ndava Nyasaye wavo, kandi mwami kuli mutumikiri wange Daudi naave mwamihi wavo. Inzi mali kovora.

²⁵ Ndakalombe lilagana liange navo liu kuvasuuviriza mirembe. Ndakatulizi mu kivala zinyama ziosi ziu vuhimwa, kunangwa magondi gange galamenya mu milimi kandi kogona mu militu mu mirembe.

²⁶ “Ndakagagasizi kandi ndakagaleke gamenye ahimbi ku kiguru change kitakatifu. Wene yeyo ndakagagasizi niimbura lwa nagave ni lienya.

²⁷ Misaala jilakame makuyu, milimi jilakame vitagwa, kandi vuli mundu alakamenye mu mirembe mu kivala chiche mwene. Lwa nambunanye minyororo ja vandu vange nu kuvavoholola kutura ku yavo avavakola avatugwa, maku navamanye ndi, Inzi mbeeye Yahova.

²⁸ Zihiiri si zilavalanya kandi mba, anoho zinyama ziu muvulimu si zilavadiviza kandi mba. Valamenya mu mirembe, kandi mundu kali mulala sinavatiihizi mba.

²⁹ Inzi ndaaza ngole milimi jaavo kuva ni ligesa linyingi, kunangwa si navave ninzara anoho kokolelwa kehenyahenye ni zihiiri mba.

³⁰ Vuli umundu namanye ndi inzi soolaa vandu va Isiraeli kandi vaveeye avandu vange. Inzi Mwami Munene Yahova mali kovora.

³¹ “Munyi muveeye magondi gange, chayo cha nindaa ekeveeye avandu vange kandi mbeeye Nyasaye winyu,” Mwami Munene Yahova avoora.