Ezekieli 33 - KITABU KITAKATIFU

Nyasaye Yatovola Zacheli Kuva Musikari

¹ Yahova yamoloma ninzi.

² Yavoola, “Mwana wu Mundu, ovoolere avandu vovo agekoleka lwa ndeta uvulwani ku kivala. Avandu vi kivala chene yicho vatovora mulala kuvo kuva musikari.

³ Lwa alolaa musigu niyisunda ahimbi, akubaa lwanga kwiganihiza vuli mundu.

⁴ Niiva umundu alahulira navuzwa achaye kandi musigu yaze ma amwiti, maku aladulwa kigira likuza lilie mwene.

⁵ Likuza lilie liveeye kigira uvudamanu vwivwe mwene, kigira si yahulira lieganihiza mba. Niiva yakahuliyi yakahononoki.

⁶ Niiva musikari alalola musigu niyaza kandi avuli kukuba lwanga, musigu alaza kandi aliita avoni yavo, navuzwa ndadula musikari kigira likuza liavo.

⁷ “Kalunu, Mwana wu Mundu, ngokora kuva musikari ku ihiiri ya Isiraeli. Kuduuka uvavoolere lieganihiza lia ngovolera.

⁸ Niiva ndarandiza ndi, umundu mudamanu azizaa kukuza navuzwa uvuli kumwiganihiza aleke uvwoni kunangwa ahone, maku alakuza nakikiri mwoni, kandi ndakudula kigira likuza lilie.

⁹ Niiva uliganihiza umundu mudamanu, navuzwa avuli kolekera kokora uvwoni, alakuza, navuzwa ivi ulahona.”

Yahova Aveeye Mulahi Kazozo

¹⁰ Yahova ya moloma na inzi. Yavoola, “Mwana wu Mundu, ovoolere nu kwilanira makuva ga avandu va Isiraeli vavoola: ‘Vwoni vwitu kandi uvudamanu vwitu vwa kumali kokora voveeye vuliduhu ku kunyi; Kunyi kung'aha. Kunyala ndi komenya?’

¹¹ Uvavoolere ndi ligali kuli inzi, Yahova Wuvunyali, mbeeye Nyasaye oveeye mwoyo, si sangala kolola mwoni nakuzaa mba. Ndakayanzi kolola naleki kokora vwoni kandi naveeye mwoyo. Avandu va Isiraeli, muleke uvudamanu vwamukolaa. Kigira ki mwenya kukuza?

¹² “Kalunu, Mwana wu Mundu, ovoolere avandu va Isiraeli ndi lwu mundu mulala akolaa uvwoni, uvulahi vwamali kokora si vulamuhonyia mba. Niiva umundu mudamanu alaleka kola vudamanu, si alahevwa mageri mba. Kandi niiva umundu mulahi natanga kokora uvwoni, sialava mwoyo mba.

¹³ Niiva ndavolera umundu mulahi ndi alava mwoyo, navuzwa atange kuganagana ndi uvulahi vwivwe vwa maziambiri voveeye vuduukiru ma atange kokora uvwoni, si ndizuliza uvulahi vwayakola mba. Alakuza kigira uvwoni vwivwe.

¹⁴ Niiva ndiganihiza umundu mudamanu ndi azizaa kukuza, ma alekele kokora uvwoni kandi akole malungi kandi malahi,

¹⁵ kandi, niiva alilanyia kindu chayahaana kigira ligovi anoho yiranye icha yiva, kandi alekele kokora uvwoni, ma alonde lilaga lihaana livamwoyo, sialakuza mba, navuzwa alava mwoyo.

¹⁶ Ndasamiiha uvwoni vwamali kokora, kandi alava mwoyo kigira umali kokora agaveeye malungi kandi malahi.

¹⁷ “Kandi avandu vovo vavola ndi aga ngolaa si gaveeye amalungi mba! Awa likora liavo nilio litaveeye lirungi.

¹⁸ Niiva umundu mulungi alagirung'ana nokoleka vulungi na akole vudamanu, alakuza kigira likora vudamanu.

¹⁹ Lwu mundu mudamamu agirung'anaa kutura ku likora vudamanu vwivwe, ma akole agaveeye amalahi kandi malungi, alava mwoyo kigira likora malungi.

²⁰ Navuzwa munyi avandu va Isiraeli muvooraa ndi, aga ngolaa sigaveeye malungi mba. Nziza kumukalagira kolondekana na agamukolaa.”

Makuva kigira Ligwa lia Jerusalemi

²¹ Ku lidiku lia katano liu mweli gwi 10 gwu muhiga gwi 12 gwi lihaminywa lietu, umundu waali niyiruki kutura Jerusalemi yaza kandi nambolera ndi, lidaala linene limali kugwa.

²² Mugorova inyima wu mundu uyu yaali nakikiri kuduuka, ndaali nimali kuhulira zinguru zinene zia Yahova. Lwu mundu uyu yaduuka mugamba gwalonda ku, Yahova yaanziranyira zinguru ziu komoloma.

Uvwoni Vwa Vandu

²³ Yahova yamoloma na inzi.

²⁴ Yavoola, “Mwana wu Mundu, avandu vamenya mu madaala manene mang'anye gi kivala cha Isiraeli vavoola ndi: ‘Aburahamu yaali vuzwa mundu mulala, navuzwa yahevwa kivala choosi. Kunyi koveeye avanyingi, kunangwa kalunu kivala keveeye chiitu.’

²⁵ “Uvavoolere aga inzi, Yahova Wuvunyali mboraa: Munyi mulizaa inyama na masahi, musigamiraa ivifananyi, kandi mwita. Nikindiki kimukolaa nimuganagana ndi kivala keveeye chiinyu?

²⁶ Munyi musuuviraa mu vivavi vienyu. Vikolwa vienyu viveeye viukuvihiliriza. Vuli mundu akolaa ovoheyi. Nikindiki kimukolaa nimuganagana ndi kivala keveeye chiinyu?

²⁷ “Uvavoolere ndi inzi, Yahova Wuvunyali, mbiganihizaa ndi, kuli mbeeye ligali Nyasaye oveeye mwoyo, avandu vamenyi mu madaala manene gaveeye mang'anye valitwa. Yavo avamenyaa mukivala valalivwa ni zinyama ziu muvulimu. Yavo avivisaa mu vigulu kandi mu zimbangaywa valakakuzi kigira vulwaye.

²⁸ Ndakakole kivala kuva chere kandi hazwa. Zinguru ziamwigingira nazio zilakaduuki kukeheri. Vigulu via Isiraeli vilakatigale viere kali umundu sialakagende mu mba.

²⁹ Lwa nambane mageri ku vandu kigira uvwoni vwavo kandi lwa nangore kivala hazwa, maku navalakamanye ndi Inzi mbeeye Yahova.”

Avandu vagirung'ana mba

³⁰ Yahova yavoola, “Mwana wu Mundu, avandu vovo vamoloma kigira ivi lwa vavuganira mu madigi gi lidaala linene anoho mu zinzira zie kiliango chi zinyumba ziavo. Vavolerana mulala nu wundi ‘Leki kuzie kuhulira likuva limali kutura ku Yahova kalunu.’

³¹ Kunangwa avandu vange vazaa kuhulira makuva aga oveeye nago, navuzwa si vakora aguvavoolela vakole mba. Vavoola makuva gu kuyaanziza, navuzwa vazizagiliraa muliiva liavo liokolomba vukala vunyingi.

³² Ivi oveeye kuvo kuli mundu wimbaa zinyimbu ziuvuyaanzi, kandi ukubaa uvukana vulahi. Vahuliraa aga ovola, navuzwa sivagakolaa kali lilala mba.

³³ Navuzwa lwa makuva googo goosi galitwekizwa, kandi lwa navave avandu va giligali, maku navamanye ndi, muporofeti yaveeye harara navo.”