Ezekieli 1 - KITABU KITAKATIFU

Amalola gukutanga ga Zacheli kutura ku Nyasaye 1:1—7:27 Uvukumi vwa Nyasaye

¹ Ku lidiku lia katano ku mweli gwa kane mu muhiga gwa salasini, Inzi Zacheli musaalisi, mwana wa Buzi, ndaamenya harara na Vayuda vahaminywa ahimbi nu mugera gwa Kebari mu kivala cha Babiloni. Ligulu liakunuluka, na ndaalora malola ga Nyasaye.

² Gwaali muhiga gwa katano lwu mwami Jehoyakini yaali nahiliywi mu lihaminywa.

³ Lwa ndaali nimbeeye mu Babiloni, ahimbi nu mugera gwa Kebari, ndaahulira Yahova namolomaa na ndaahulira zinguru zizie.

⁴ Ndahenza igulu na ndaalora kihuzuzi nikihuuzaa kutura Ivaale. Uvwaku vwahemahema kutura mu malesi, kandi kisundi chakumbiriza iligulu. Mu lihemahema liu vwaku yivwo, kindu chaloreka kuli uvwakanyu vwu mugasa.

⁵ Hagati hi kihuzuzi yiki, ndaalora ivilombe vine mu lifana liu mundu,

⁶ navuzwa vuli kilala kuvio chaali ni mumoni haali kane kandi ni zimbaha zine.

⁷ Virenge viavio viali vilungi, kandi zimbagayu ziavio ziali kuli zie zigiriki. Viang'ereng'anaa kuli umugasa guvakiywi.

⁸ Isi wa vuli zimbaha zie vilombe, ku zimbega zine viali kandi na makono gane kuli ga vandu.

⁹ Zimbaha ziviri zia vuli kelombe ziavambuka kandi nizidirana ni zielomba virombe vindi. Vuli kelombe chazia imbiri vulungi vugira kugirung'ana.

¹⁰ Vuli kelombe keveeye mwoyo chaali ni lifana zing'ano zine: Lifana liu mundu mu zimoni, lifana lie simba ku mukono mulungi, lifana lie giriki ku mukono mumosi, kandi lifana lie indizu kolovega lwu mugongo.

¹¹ Zimbaha ziviri zia vuli kelombe ziavambuka igulu nizidiira ku zimbaha zie vilombe vindi ku lovega lundi, zimbaha zindi ziviri ziakunika muviri gwa vuli kelombe.

¹² Vilombe viosi viazia imbiri vulungi uwaviaganagana kuzia vugira kugirung'ana.

¹³ Hagati hi vilombe yivi, kindu chaliho ichaloleka kuli amanda gu muliru, chaloreka kuli ulumuli lwi kiyayi nikimulamulaa hagati hi vilombe. Muliru gwene yigwo gwaali nu vwaku ligali, kandi oloheni lwatula mugwo.

¹⁴ Vilombe yivi vianyagula zimbiru ligali kuli lihemahema lioloheni.

¹⁵ Lwa ndahenza ku vilombe vine yivi, ndalora magurudumu gane ku lirova. Vuli lilala niliveeye kolovega lwa vuli kelombe.

¹⁶ Amagurudumu goosi gane gaali ni lifana lilala; vuli lilala kugo liang'ereng'anaa kuli ligina liu vuguli, kandi vuli lilala liagavulanywa hagati ni lindi ku lovega lwu mukono mulungi.

¹⁷ Lwi vilombe yivi viagendaa, viazia imbiri vulungi, viazia ku zimbega ziavio ziosi zine vugira kugirung'ana.

¹⁸ Amagurudumu gane yaga gaali nuvwikudumbu kandi gaali ni zisingenge. Uvwikudumbu vwazio vwali ni zimoni ku zimbega ziosi.

¹⁹ Lwi vilombe yivi viageendaa, amagurudumu gagendaa harara navio, kandi lwi vilombe viasingira kutura ku lirova, amakurudumu kandi gasingira.

²⁰ Havundu hoosi hi vilombe viazizaa, amagurudumu gazizaa navio, kigira roho gwi vilombe gwaali mugo.

²¹ Lwi vilombe viagendaa, anoho viasingira anoho lwa viaburuka kutura ku lirova, amagurudumu gakoraa ndio kandi kigira roho gwi vilombe gwaali mugo.

²² Igulu wi mitwi ji vilombe haali ho ni lifana liu vwerefu, ni vong'ereng'anaa kuli magina gimbula, iliavambulwa igulu wi mitwi ji vilombe.

²³ Isi wu vwerefu, vuli kelombe chanyiira zimbaha ziviri nizidirana ni zimbaha zie vilombe vindi. Vuli kelombe chakunika muviri gwacho nizimbaha zindi ziviri.

²⁴ Lwi vilombe yivi viaburuka, ndaahulira liyoga lie zimbaha ziavio. Liyoga yili liahulirika kuli muhuumu gwa mazi ginyanza, kuli liyoga lie liihi linene, kandi kuli mwoyo gwa Nyasaye Wuvunyali. Lwa vialekera kuburuka vialingaa zimbaha ziavio,

²⁵ navuzwa liyoga liavio liahulirika muvwerefu kuvitira ku mitwi jaavio.

²⁶ Igulu muvwerefu, chaliho ni kindu chalorekaa kuli endeve yu vwami iyalombwa ni ligina liesafiro. Kondeve yu vwami yiyi, kindu chaali nichikaye ku, ichalombwa mu lifana liu mundu.

²⁷ Kutura mu kisindi kuzia igulu, kindu yiki chaang'ereng'ana kuli mugasa; na kutura mu kisindi kuzia hasi, chaloreka kuli muliru. Uvwaku vwu vulavu vwakumberiza mundu uyu.

²⁸ Uvwaku vwu vulavu yivu vwafanaa kuli ikisahi chi imbura mu malesi mu lidiku lie imbura. Yiki chaloreka kuva kuli uvukumi vwa Yahova. Lwa ndaahulira yaga, ndaagwa hasi mamumama. Maku ndaahulira mwoyo gwu mundu nigumulomaa.