Esther 9 - KITABU KITAKATIFU

Avayuda vaadiviza avasigu vaavo

¹ Lilaga liukutanga liu umwami yaali niyalomba lienya lilondwe ku lidiku lia komi na tatu liumweli gwa komi na mbiri, mweli gwa Adari. Lidiku yilio nilio lia avasigu va Avayuda vasuuvira valaviita nukuvadiviza ligali. Navuzwa mu vogono yivwo, Avayuda vavaguuta nukwamiiha vasigu vaavo.

² Hoosi ha Avayuda vamenya mu vuli lidaala linene mu vivala via Ahasuero yamiha, Avayuda vetegeka aveene kulwaana nu mundu woosi uwageriza kuvingilira. Avandu ha vundu hoosi vaatia Avayuda ligali, na sihaliho nu mundu kali mulala uwasingira kuhing'ana navo mba.

³ Kali avanene va vuli kivala, aviimiliri harara na avamihi mu vuli kivala mu vogono vwu mwami mwene, vakonya Avayuda kigira vaatia Modekai.

⁴ Gaali nigaakamanyikana vulahi mu vwamihi vwosi ndi, Modekai aveeye umundu wi zinguru munyumba yu vwami, kandi yaali namedekaa kuva nu vunyali ligali.

⁵ Kunangwa Avayuda vaali vanyara kokora choosi ichaveenya ku avasigu vaavo. Vingilira avasigu vaavo vosi ni vivavi nivaviita.

⁶ Mu Susa, lidaala linene liene, Avayuda vita avandu mia tano.

⁷ Vita kandi Parishandaza, Dalifoni, Asupaza,

⁸ Poraza, Adalia, Aridaza,

⁹ Parumashita, Arisai, Aridai harara na Bajezaza,

¹⁰ avayaayi likomi va Hamani umwana wa Hamedaza, umusigu wa Avayuda vaali hagati ha vandu vadivizwa, navuzwa si vaavugura vilaanye kali kilala mba.

¹¹ Lidiku liene yilio, mwami Ahasuero yavolerwa avandu viitwa vosi mu Susa, lidaala linene.

¹² Mwami yavolera mukali weve Esiteri, “Avayuda viiti nu kudiviza avandu mia tano mu Susa kandi na avayaayi likomi va Hamani. Uganaganaa vanyara kuva niviiti avandu vange kuduuka ulwene yilu muvivala vindi vianzamiihaa; kindiki ikindi chawenyaa kalunu? Mbolera na ulakenyoola.”

¹³ Esiteri yativura, “Niiva galayaanziza ivi mwami wuluyali, leka Avayuda mu Susa vakole malala meere mugamba agavatula kokora kalunu. Na ulage ndi, imiviri ja vayaayi va Hamani likomi jisungwi ku mwinuya gwu kusunga ku avandu.”

¹⁴ Umwami yalaga yaga gakolwe ndio, kandi lilandiza lie lilaga lialandizirwa ku vandu vosi mu Susa. Vaasunga avayaayi likomi va Hamani avandu vosi vaduuki kujilora.

¹⁵ Ku lidiku lia komi na ini liu mweli gwa Adari, Avayuda vosi mu Susa viivungikiza harara kandi, na vita avandu vandi miatatu mu lidaala linene. Navuzwa sivalaanya miandu ja avasigu vaavo mba.

¹⁶ Avayuda muvivala vindi viu Vwamihi vwa Ahasuero navo kandi veelohiza kwikinga aveene. Veehonyia aveene ku avasigu vaavo kulwukwita avandu 75,000 avaari nivavavihiliraa. Navuzwa sivavugula ivilanye ku miandu jaavo mba.

¹⁷ Yili liali lidiku lia komi na tatu liu mweli gwa Adari. Ku lidiku lialondaku, lia komi naine, sihaaliho niliitana kandi mba, vasoosa, kandi valilomba kuva lidiku liu vusangali kandi lie lilia.

¹⁸ Nitali Avayuda va Susa valomba lidiku lia komi natano niliva liokososa na lieliilia nuvusangali, kigira lidiku lia komi na tatu na komi naine vaali ni vita avasigu vaavo.

¹⁹ Yiki nicho kivuni kigiranga Avayuda vamenyi mu madaala makekeeke vizuliza lidiku lia 14 mu mweli gwa Adari kuva lisosa liu vusangali. Ing'inga yiyi yaali yi lilia kandi kuhaanirana vihaanwa vie viukulia vilahi.

Lilia lia Purimu

²⁰ Modekai yang'oda ivindu yivi, kandi naahira zibarwa ku Avayuda vosi mu vwamihi vwa Ahasuero vwosi vwa himbi ni hale,

²¹ navavoolera ndi, viizulize lidiku lia komi naine na komi na tano mu mweli gwa Adari kuva amadiku go kosoosa vuli muhiga.

²² Yaga gaali amadiku ga Avayuda vanyoola ovovoholore kutura ku avasigu vaavo. Yigu gwaali umweli gwagirung'anywa kutura kung'inga yo vovereri kuduuka mung'inga yu vusangali nu vuyanzi. Vavolerwa vizulizi amadiku yaga kuva agi lilia kandi agu vusangali; agu kuhaanirana vihaanwa vie viukulia ku aveene na aveene kandi ku avadaka.

²³ Kunangwa Avayuda valonda amalago ga Modekai, ma iliizuliza yili liagwa umwima gwa vuli muhiga.

²⁴ Hamani, muyaayi wa Hamedaza, kisukururwi cha Agagi, kandi nu umusigu wa Avayuda, yaali nakubi ikura kumanyiriza lidiku liu kwita nu kudiviza Avayuda vosi.

²⁵ Navuzwa lwa Esiteri yazia ku mwami, mwami yahaana amalago mu mang'oda ndi, lilohiza lie zing'anagani zindamanu zia Hamani yaali naalombeeye Avayuda, vimugwiili umwene, kandi oyo harara na vayaayi veve vasungwi ku mwinuya gwa yalombera avandi.

²⁶ Yiki nicho kivuni kigira amadiku gi lihonga yili ni galangwa Purimu. Kigira ibarwa ya Modekai, kandi kigira koleka kuvo,

²⁷ Avayuda valilomba kuva lilago kuvo aveene, ku avisukululwi vaavo, ku uyu woosi unyala kugwa Umuyuda, ndi kung'inga indukanu ku vuli muhiga, amadiku gaviri yaga galizulizwa kolondekana na malago ga Modekai.

²⁸ Gaavitizwa ndi, vuli mundu winyumba yu Muyuda va makura ga madiku gaazaa mu vuli kivala, kandi mu vuli lidaala linene mu vwamihi vwa Ahasuero kuduuka vizulizi nukulinda madiku ga Purimu kung'inga yoosi iyiizaa.

²⁹ Esiteri mukali wu mwami, umukana wa Abihaili, harara na Modekai, vaang'oda ibarwa kandi, nivahaana uvunyali ni zinguru zizie kubarwa yamakuva ga Purimu, ya Modekai yaali nang'odi.

³⁰ Ibarwa zana yang'oderwa Avayuda vosi, muvivala viosi 127 viu uvwami vwa Pasia, vwu umwami Ahasuero yamiha. Ibarwa yiyi yenyeraa Avayuda mirembe ni likingwa,

³¹ yalaga yavo vosi kandi visukululwi viavo ukwizuliza amadiku ga Purimu ku zing'inga ziduukanaa. Yaga gaali kuli vaali ni vaavugura amalago gu kwizuliza ilihonga lilia ni zing'inga ziukusioma. Yaga goosi galagwa na Modekai nu mukali wu mwami walangwa Esiteri.

³² Lilaga lia Esiteri, ukudinyiriza amalago ga Purimu, gang'odwa mu kitabu.