Esther 4 - KITABU KITAKATIFU

Modekai yateeva ovokonyi kutura ku Esiteri

¹ Lwa Modekai yahulira goosi agaali nigakoleeywi yatandula zinguvu zizie mu vovereri niyiviika zinguvu zia magunia nu kwibuuga ligoke. Yazia naavitira hagati hi lidaala linene nakubaa izikwiri zinene nuvuzunu,

² kuduuka lwa yaduuka ha kirivwa cha hango hu vwami. Siyingira mba kigira mundu wiviki zinguvu ziu lugano yilu siyaali unyala kwingira ho mba.

³ Na mu vuli kivala, hoosi hi lilaga liu mwami lialandizwaa, haali ho ni lisioma linene liahulirika mu Vayuda. Haali ho nilihonga lilia, nivalira kandi avanyingi nivakuba zikwiri, ni viviika magunia nokwiyaliriza mu ligoke.

⁴ Lwa avakaana vatumikiri va Esiteri kandi viziri veve vamuvolera cha Modekai yaali nakora, Esiteri yanyangizwa mu mwoyo gwigwe ligali. Yatumira Modekai izinguvu yiviiki mu vogono vwu kutumikira zinguvu zia amagunia, navuzwa Modekai yasura.

⁵ Maku Esiteri yalanga Hazaki, mulala ku viziri vinyumba yu vwami uwaali natovooleeywi numwami kuli mutumikiri wa Esiteri, kandi naamulaga azie ku Modekai kumanya ichekolekaa, ni kivune chene.

⁶ Hazaki yazia mu luhia lwi lidaala linene, imbiri wi kirivwa chinyumba yu vwami ha Modekai yaali.

⁷ Modekai yamuvolera vindu viosi viali viekoleki kuye, kandi amabese amanyingi aga Hamani yaali nalagi kuhaana mu livikiru lio vwami niiva Avayuda vosi vakadiviziywi.

⁸ Kandi yaaha Hazaki ekopi ndala yi zibarwa zie lilaga lialandizwa mu Susa, ukulaga lidivizwa lia Avayuda. Modekai yaamugoonya agihiliri Esiteri, amwivaliri kuli gaveeye, kandi ateeve Esiteri azie kogoonya umwami mbula ave nizimbavasi ku vandu va Esiteri.

⁹ Hazaki yirana navolera Esiteri amakuva ga Modekai yaali navooye.

¹⁰ Esiteri yamuha amakuva yaga ukwilanyira Modekai:

¹¹ “Niiva umundu woosi, musaza anoho mukali yingira munyumba yu musi kolola mwami vugira kulangwa, umundu mwene oyo kuduuka akuzi. Iliene yilio ni lilaga; vuli mundu, kutura ku avukuhaana zing'anagani ku mwami, kuduuka ku vandu vi vivala via yamiha, vamanya ageene yaga. Eveeye ho inzira ndala vuzwa yukweevendeela lilago yili: niiva umwami alagiinga igulu imbimbu yeeye yi zahabu, umundu oyo sialiitwa mba. Navuzwa gufweye umweli umwami nakikiri kuunanga.”

¹² Lwa Modekai yanyoora amakuva ga Esiteri,

¹³ yamutumira lieganihiza yili: “Ivi utaganagana ulahononoka ilikuza kigira oveeye munyumba yu vwamii kuvita Vayuda vandi vosi mba.

¹⁴ Niiva ulachiring'ana ku ing'inga kuli yiyi, ovokonyi vulatula muligulu ku Avayuda, na valahonywa, navuzwa ivi ulakuza, navinyumba ya baba woovo valaherizwa. Nitali ni vwaha umanyi hawundi ivi wakolwa mukali wu mwami ku kivuni keveeye ho ing'inga yinu!”

¹⁵ Esiteri yatumira Modekai amativuli yaga:

¹⁶ “Zia, uvungizi Avayuda vosi harara mu Susa; muhonge lilia na mumbiki mu lisaala. Mutalia anoho munwi kindu choosi ku madiku gavaga, umbasu nuvudiku mba. Avakaana vatumikiri vange harara ninzi kulakola malala mere. Inyima wa yago, inzi ndazia ku mwami, kali niiva lilago silimbugiliranga mba. Niiva nditwa, nzitwi.”

¹⁷ Kunangwa Modekai yazia kokora goosi aga Esiteri yaali namuvooleye akole.