Ayubu 6 - KITABU KITAKATIFU

Ayubu

¹ Maku Ayubu yativura navoora,

² Oh! Niiva lizuunwa liange liakagereywi ku kibimu, kandi niiva uvusaliri vwange vwosi vwakaviikiywi ku kegero,

³ vwakave nuvuliduhu vonene ligali kali kuvita vuliduhu vwu muyeke mu inyanza, na kigira yaga, makuva gangega mali kuva malulu ligali.

⁴ Nyasaye Wuvunyali umali kundumita ni mivano juvuta; kandi vuziva vwi mivano yijo vumali kusalana mu muviri gwange. Nyasaye umali kutihiza inzi.

⁵ Ibunda yu mumulitu inyala kwana ni yaya vunyasi bwayo? Anoho eng'ombe inyala kuchiringana ni yaya vunyasi?

⁶ Nivwaha unyala kulia chukulia chazangalara kitaveeyemu nijumbi? Anoho mwayu goveeye mu amazi malavu gi livuyu?

⁷ Inzi si mbeeye nulusa ukulia chukulia kuli yiki mba, vuli chukulia choosi chandiza kenombaa nzegovola.

⁸ O, vwakaveeye vulahi nyore ichandevaa! O, vwakaveeye vulahi Nyasaye yambanili kolondekana ni lienya liange!

⁹ Vwakaveeye vulahi niiva Nyasaye yakaashonolanyi! Kandi yaanziti nduli mu kivala!

¹⁰ Niiva Nyasaye yakakoli ndio, ndakaveeye ni lileminywa mwoyo; kali niiva ndakaveeye nilizuunwa linene mu muviri gwange, Mbeeye ni limanya ndi Nyasaye aveeye mutakatifu; kandi ngikiri kuhing'ana ku na malago geege mba.

¹¹ Inzi simbeeye ne zinguru kuzizagilira kuva mwoyo mu kivala, kandi sindora kivuni inzi kuzizagilira komenya vugira lisuuvirizwa mba.

¹² Inzi ndaalombwa kutura ku ligina? Muviri gwange goveeye kuli mugasa?

¹³ Inzi simbeeye ni zinguru kwehonyia mwene mba; kandi simbeeye na havundu ha nzilukira konyoora vokonyi mba.

¹⁴ Uyu usulaa kovererera mulina weve, siatizaa Nyasaye Wuvunyali mba.

¹⁵ Navuzwa munyi avalina vange, mwangaada kuli migera jia mazi jumaa lwi imbura itakubi.

¹⁶ Migera jifumiywi na amagina gi imbura, kandi jikunikiywi ni likonza,

¹⁷ navuzwa mu ing'inga yu mbasu mululu vikamulukaa, ni migera jigota, ma jirana kugwa imiere kandi juma.

¹⁸ Miganda ja vakiranyi jigota mulienya amazi; vagendagenda ma vakuzira mu changarangwi.

¹⁹ Miganda ja vakiranyi kutura Tema na Sheba venyeleriza,

²⁰ vaveeye ni likuza mioyo kigira migera jaali nijumi.

²¹ Munyi kalunu, muveeye vuzwa kuli migera miumu ku inzi, kigira muloraa lidivizwa liange ma mwisunda ihale kutura ku inzi mu vuti.

²² Inzi ndamuteva ku muhaane kihanwa ku inzi, anoho kuhaana kikukura ku inzi kutura ku vutugi vwinyu?

²³ Anoho ndamuteevaku kombonyia kutura ku avasigu vange? Anoho kutura kuvandu avandambizaa?

²⁴ Ivi Elifazi, unzigizi na inzi ndachiring'ana, umanyie vudamanu vwange vwa ndakokolera.

²⁵ Makuva gu vusuvirifu gaveeye gokogoonya, navuzwa munyi mumolomaa uvusiru.

²⁶ Munyi muganaganaa munyala kulungikiza agambooraa, kandi muganaganaa munyala kokora makuva gu mundu utaveeye nilisuuvirizwa kuva kuli imbuza?

²⁷ Munyi mukubaa ikura ku avavisandu nukuvakola vatugwa, kandi mwekora vatugi ku liguliza avalina vinyu avahimbi ligali.

²⁸ Navuzwa, kalunu muyaanziliri kombenza, kigira sindaveeha imbiri winyu mba.

²⁹ Munyi muziyi ihale ligali. Muleke kokora agataveeye amalungi. Mutangalagiri mba, kigira inzi mbeeye ku vulungi.

³⁰ Muganaganaa mboraa ovovehi? Kandi muganaganaa sinyala kwavukanyia kumanya vulungi nu uvudamanu? Navuzwa gaveeye gu vulungi kandi giligali.