Ayubu 42 - KITABU KITAKATIFU

¹ Maku Ayubu yativulira Yahova:

Ayubu

² “Inzi manya ndi ivi, Yahova oveeye ni zinguru ligali, ivi unyala kokora vindu viosi viawenyaa.

³ Ivi oteevi ndi, nivwaha uyu uvisaa zing'anagani vugira limanyiriza? Kulwayago, mali komoloma makuva ga inzi mwene ndaavura kumanyiriza; Kandi mali kovora vindu viokogenyia ligali, via inzi ndaavura kumanya.

⁴ Ivi wambolera mbulirize lwa wamolomaa, inzi ndakoteeva mateeva gange na urandivulira.

⁵ Mu ing'inga yavita, ndaamanya vuzwa makuva ga vandu vandi vaali nivamali kombola. Navuzwa kalunu inzi mali kolola ivi ne emoni yange.

⁶ Kunangwa, inzi mbeeye nizisoni ku goosi aga inzi mali kovora, kandi nzivakaa luguchi ni ligoke ukumanyia lieganira liange.”

Amakuva gu kumaliriza

⁷ Inyima wa Yahova yaali niyakamara komoloma makuva yaga ku Ayubu, yavolera Elifazi umutemani ndi: “Inzi mbeeye nu vutima vonene ku ivi harara na valina vovo vaviri, kigira si mwavoora agaveeye malungi kigira inzi kuli mutumikiri wange Ayubu mba.

⁸ Kalunu, muvuguli zigiriki saba na magondi makore saba na muzie ku mutumikiri wange Ayubu, mwihaaniri aveene kisiuviriru chu kusambwa. Umutumikiri wange Ayubu alamusaalira, kandi inzi ndavugilira lisaala lilie mburi kumbika muzisoni kolondekana nuvusiru vwinyu mba. Munyi si mwavoora agiligali kigira inzi kuli mutumikiri wange Ayubu mba.”

⁹ Kunangwa, Elifazi Umutemani, Bilidadi Umushuhi, na Zofari Umunamazi vazia ni vakora kuli Yahova yavalaga; na Yahova yavugilira lisaala lia Ayubu.

¹⁰ Maku, lwa Ayubu yaali ni yakasaala valina veve vavaga, Yahova yamugasiza kandi naamuha ivindu haali kaviri kuvita ivia yaali navio maziambiri.

¹¹ Maku avamwavo na vavoozo, na valina va Ayubu vosi, vazia kumugeniha nivalia harara naye nivasaangala munyumba yeeye. Vamanyia liverera liavo ku Ayubu ni vamuleminya mwoyo ku vudinyu vwosi vwa Yahova yaali naleti kuye. Sa mulala yamuha mabesa ni mingiri yi zahabu.

¹² Yahova yagasiza Ayubu mu keheri chi livamwoyo lilie kali kuvita lwa yaali ni yamugasiza mu litanga. Ayubu yaali na magondi zielefu likomi na gane, zing'amia zielefu sita, zing'ombe ziokulima zielefu ziviri, ni zisukiri elefu indala.

¹³ Kandi yaali na vana vayaayi saba na vakana vavaga.

¹⁴ Yagulika mukaana weve wukutanga lieta Jemima, wakaviri yamugulika lieta Kezia, nu wa kavaga mukekeeke yamugulika lieta Kerani Hapuchi.

¹⁵ Mu kivala yicho choosi, si vaaliho na vakaana vandi avaari ni ligondo lilahi ligali kuvita vakana va Ayubu mba; Baba wavo yavagavulira miandu harara na vavoozo vaavo.

¹⁶ Inyima wa yaga, Ayubu yamenya mihiga imia indala na arubaini. Ayubu yamenya madiku manyingi naduuka kolola avana veve, aviisukulu veve kandi visukululwi veve.

¹⁷ Maku Ayubu yakuza naveeye musakulu wi mihiga minyingi ligali.