Ayubu 15 - KITABU KITAKATIFU

Livoolerana lia kaviri 15:1—21:34

¹ Maku, Elifazi, watura Evotemani, yativura,

² Mundu mugeri anyala kuhaana amativuli ga vuzwa? Anoho aveeye unyala komoloma amakuva ga kudiviza kuli imbuza imbiu yi Ivugwi?

³ Mundu uyu sigamuduukira kuhing'ana na makuva ga vuzwa mba, anoho kuhing'ana na makuva agatanyala kokora kindu kilahi.

⁴ Navuzwa ogerizaa kuvula kutia Nyasaye, kandi wigalira avandu kuvula kumusigamira.

⁵ Munwa gugwo guveeye na makuva gu vuchamu, na lulimi lulwo lovoolaa makuva gu vugadi.

⁶ Amakuva ga ivi mwene ovola galakukalagira, siaveeye ninzi mba. Gu munwa gugwo govoora, galakukalagira, munwa gugwo mwene gukuyaalaa.

⁷ “Uganaganaa oveeye mundu wukutanga kwivulwa? Anoho waaliho mulitanga lwa Nyasaye yalomba vigulu?

⁸ Ivi wahuliriza lilohiza lia Nyasaye yaali nalio? Kandi ni ivi weng'ine oveeye novogeri vwo mundu?

⁹ Ni kindiki cha ivi umanyi cha kutamanyi? Ni kindiki cha ivi umanyirizi kitamanyikani ku kunyi?

¹⁰ Kunyi kwanyoora vogeri kutura ku vasakulu vakungu vi zimbuzi, avakulundu viivulwa imbiri wa baba woovo.

¹¹ “Nyasaye ahaanaa lileminya mwoyo ku ivi na kigira ki ulisulaa? Kumali kumoloma kigira makuva gukwehozeriza.

¹² Kigira ki zing'anagani zizio ziveeye ihale? Kandi kigira ki zimoni zizio zihenza ni liguniera?

¹³ Mwoyo gugwo guhing'anaa na Nyasaye, na yiki nicho kigira novoora amakuva kuli yaga kuye.

¹⁴ “Mundu woosi anyala kuva mulahi ligali? Anoho mundu anyala kuva mulungi imbiri wa Nyasaye?

¹⁵ Henza Nyasaye siasuviraa kali zingelosi veve mba, kali si vaveeye valahi imbiri weve mba.

¹⁶ Mundu akolaa vudamanu kuli anwezaa amazi, yee, uyu aveeye wu kuvihiliriza nu vudamanu, kandi siaveeye okonyaa kindu mba.

¹⁷ “Umbulirizi na inzi ndakumanyia; kandi ndavoora havulavu goosi gamanyi.

¹⁸ Avandu vovogeri vayinzigiza gagiligali, gaviiga kutura ku vaguuga vaavo, kandi siliveeyeho kali lilala lia vavisa mba,

¹⁹ avandu va Nyasaye yaaha kivala yicho veng'ine, kandi avageni sivavita hagati haavo mba.

²⁰ “Mundu mudamanu udambiza vandi, alava mu lizuunwa mu madiku gi limenya lilie liosi.

²¹ Liyoga lie litihiza lilakuba lwanga mu matu geege, na aviivi valamwingilira lwa aganagana aveeye mu likingwa.

²² Mundu uyu siaveeye ni lisuuvira ndi alahona kutura mu vudinyu vwi kisundi mba, kandi kivavi keveeye havundu kimulindaa ku mwita.

²³ Zindizu zigendagenda nizihenza ziduuki konyoora muviri gwigwe zilie. Mundu uyu aveeye ni limanya ndi, madiku gi livamwoyo lilie gaveeye mu kisundi.

²⁴ Kivi nu vuzunu vwu vusaliri vwivwe vi mutiihizaa; valamuguuta kuli mwami wi zinguru yetegekera iliihi.

²⁵ “Kigira mundu uyu yamali kuhing'ana na Nyasaye, kandi yamali kwigingira imbiri wa Yahova Wuvunyali,

²⁶ anyaguraa ni kirage kuzia kwingilira Nyasaye na gingi inguuva yeeye enene,

²⁷ aveeye mukomeru mu moni mwimwe ligali, kandi kekenge chiche keveeye kekomeru ni zitinya zinyingi.

²⁸ “Mundu uyu amenyaa mu madaala mang'anye, mu zinyumba ziu mundu atamenyaa muzio mba, izialekwa kuva vitumi vie vianyi.

²⁹ Mundu uyu sialava mutugi mba, kandi miandu jije si jiravaho mba,

³⁰ kandi si alahononoka kutura mu kisundi mba; alava kuli musaala gwi zisia zitemangwa ma ziviikwa mu muliru ma ziaduka, na Nyasaye alamuhuuza nu vukindu kuli kimuli na alatulaho.

³¹ Atasuuvira mu makuva gataveeye nikindu nu kwigaada mwene mba; kunangwa vudamanu vulava amadanyi geege.

³² Imbiri wi ing'inga yeeye ikikiri kuduuka, alaniala kuli musaala; alaniala kuli lusia na silulava luvisi kandi mba.

³³ Mundu uyu alava kuli musaala gwa mazabibu guvungulura mazabibu amagingi, kandi kuli musaala gwa muzeituni guvungulura vimuli via gwo.

³⁴ Muganda gwa vandu vatasuuviraa Nyasaye valakuza vugira visukululwi, kandi muliru gulasamba zinyumba ziumbakwa ni viambeti.

³⁵ Yava nivo avandu vi mioyo jaavo jizula uvugadi, kandi avalohizaa koleta uvuchamu no kokora uvudamanu.”