Ayubu 14 - KITABU KITAKATIFU

¹ “Mundu wu mukali yivula, aveeye wa amadiku makekeeke, kandi yizuuye ikivi.

² Alavizaa kuli kimuli kandi aniala vwangu, atulaaho kuli chiriri, kandi siazizagilira kuvaho mba.

³ Nyasaye, ivi kali ulambenza, anoho ulambiika mu magerizu nu kungaragira?

⁴ Aveeye ho nu mundu unyala kutuliza kindu kilahi kutura mu kindu kidamanu? Siaveeye ho mba.

⁵ Kigira madiku gi limenya liu mundu gamali kotovolwa maziambiri, kandi umanyi livaliza lie mieli jije jilimenya. Kandi ivi umali kotovola na umundu sianyala kugirung'anyia mba.

⁶ Leka mundu uyu ave yeng'ine, leka asangaliri madiku geege gi miyinzi midinyu niiva alanyala.

⁷ “Lisuuvira liveeyeho ku musaala gumali kotemwa; gulasivuka kandi visivu viagwo vilazizagila kuvaho.

⁸ Kali niiva imiri ju musaala yigu jilakunguhira mu marova, kali vitinya viagwo ni vikuzira mu marova,

⁹ navuzwa ni gonyoora lisama lia mazi, gulasivuka kandi gulatuliza zisia kuli musaala mudoto.

¹⁰ Navuzwa lwu mundu akuzaa, keveezaa keheri kuye, akuzaa kandi si avezaaho mba.

¹¹ “Kuli migera jitaveeye na mazi, kandi kuli zinyanza zimali kwuma,

¹² ni ndio avandu vakuza, na si vasimuguka kandi mba. Si valasimuguka kandi, kuduuka ing'inga yi ligulu lilivula kuvaho, anoho sivalakasimuguki kutura mu zindolo ziavo mba.

¹³ “Vwakaveeye vulahi, ngano wakambisa mu kivala chavakuzu; vwakaveeye vulahi numbisi kuduuka lwu vutima vuvwo vufwa, maku kuvikiho ing'inga yu kunzizuliza.

¹⁴ Niiva mundu akuza, anyala kuva mwoyo kandi? Navuzwa ndalindilira ing'inga indahi, ndakalindi kuduuka ing'inga yu vudinyu vwange vohera.

¹⁵ Maku ulakanange, na inzi ndakakutivuliri, kandi ulakayaanzizwi ni inzi kelombe chicho.

¹⁶ Maku, ulakahenzerizi vuli zinzira zie zinduvatiru ziange, navuzwa siulakalola uvwoni vwange mba.

¹⁷ Utulizeho vudamanu vwosi vwa inzi mali kokora, kandi usamihi uvwoni vwange vwosi.

¹⁸ “Ing'inga iduuka lwi vigulu viosi vigwizaa, kandi zinyanda ziosi zisundwa kutura mu vogono vwazio.

¹⁹ Kuli amazi gagehizaa amagina, kandi kuli imbura ikubaa enene ma mazi gaahira lirova, kandi nindio ivi Nyasaye udiviza lisuuvirizwa lie livamwoyo lia vandu.

²⁰ Ivi ugutaa mundu ma ugirung'anyia ligodo ni ligondo lilie kandi umutulizaho mihiga ni mihiga.

²¹ Avana vu mundu uyu vayoolaa uluyali, navuzwa si amanyaa mba; anoho lwa vaviikwa mu zisoni, siamanya mba.

²² Mundu uyu aveeza mu vuzunu vwu muviri gwigwe mwene, kandi yisiomeraa mwene.”