2 Vakorintho 6 - KITABU KITAKATIFU

¹ Kuli kunyi koveeye avayinziri harara na Nyasaye, kumugoonya mutumikiri vulahi zimbavasi zizie zia mumali konyoora.

² Nyasaye avoora ndi: “Lwing'inga yaduuka yukumumanyia livugilirwa, ndaamuhulira; Lwi lidiku liaduuka liu kumuhonyia, ndamukonya.” Huliriza yiyi niyio ing'inga yakonyoola livugililwa lia Nyasaye kalunu ni lidiku liokohonywa.

³ Kunyi sikwenyaa mundu woosi anyoore mahiolo mu miyinzi jietu mba; sikwenyaa kuviika ikindu chu kwikigitariza mundu woosi mba.

⁴ Nitali mu vindu viosi via kokoraa kumanyia ndi koveeye avatumikiri va Nyasaye ku liekuzira linyingi, mu vusaliri, mu vudinyu kandi mu kivi.

⁵ Kwamala kukuywa, kwavofwa mu vuhambe; kwavihilirwa no kosekerizwa, kandi ividuma viakokolera kehenyahenye, kwayinzilizwa vudinyu vugira lisosa; sikwanyoola ligona zindoolo kali hakuzu, kandi kwaali ninzara.

⁶ Kigira vutakatifu vwitu, ilimanya, liekuzira, kandi zimbavasi, kumali kwimanyia aveene kuva vatumikiri va Nyasaye kuvitira mu Roho Mutakatifu kigira vuyanzi vwitu vwagiligali.

⁷ Kwilwaza likuva lietu lia giligali mu zinguru zia Nyasaye. Koveeye nu vulungi kuli viugi viu kulwaanira kandi kwikingira.

⁸ Kohevwa uluyali na vandi. Konyegwa kandi kuginwa na valala; na kwizominywa na vandi. Kuvugulwa kuli vavehi, navuzwa kovora giligali;

⁹ Koveeye kuli avatamanyikani, navuzwa kwamanyikana vulahi vosi; kuli avakwaali ni kwakuza, navuzwa munyi muloraa kunyi kuli koveeye mwoyo. Kali nikoheevwa amageri, sikwitwaa mba;

¹⁰ kali nikovererizwa, koveeye nu vusangali kazozo; kololeka kuli avadaka, navuzwa kokoraa vanyingi kuva vatugi; kololekaa kuli avataveeye ni kindu, navuzwa koveeye ni vindu viosi.

¹¹ Avalina vayaanze mu Korinzo! Kumali kwilwaza ku munyi havulavu. Kumali kwigura imioyo jietu ku munyi.

¹² Sikoveeye ni kunyi kwigalira vuyanzi vwitu ku munyi mba, navuzwa ni munyi vene avamali kwigalira vuyanzi vwinyu ku kunyi.

¹³ Molomaa kalunu kuli munyi muveeye avana vange: mukumanyie liiva lia kunyi koveeye nalio ku munyi. Mwiguli imioyo jinyu ligali!

Mutava ni lisanga harara na vandu avatasuuvira mba

¹⁴ Mutahambani mulikola lienyu harara na vatasuuvira mu Kristo kigira yaga siganyala kunyalika mba. Haveeye na lisanga ki hagati hu vulungi nu vudamanu? Anoho haveeye na lisanga ki hagati hu vulavu ni kisundi?

¹⁵ Kristo na Setani vanyara kuhulirizana ndi? Uyu usuviraa anyoolekana ndi mu lisanga na uyu utasuviraa?

¹⁶ Litembeli lia Nyasaye liveeye ni livugilirizana ki ni vifananyi? Kunyi koveeye Litembeli lia Nyasaye oveeye mwoyo! Kuli Nyasaye mwene amali kovora, “Ndakalombe hango hange harara na vandu vange nokomenya hagati haavo ndakave Nyasaye wavo, navo valava avandu vange.”

¹⁷ Mwami avoora, “Mwiyahuli aveene kutura kuvo. Mutadiiri kindu choosi kitaveeye kinifu, ninzi ndamuvugirira.

¹⁸ Inzi ndava Baba winyu, namunyi mulava avana vange, avayaayi na vakana.” Mwami Wanyala Viosi avoora.