2 Kyetsinyinga 33 - KITABU KITAKATIFU

Mwami Manase wi Ivuyuda

¹ Manase yaali ni mihiga 12 lwa yaatanga kwamiiha kuli mwami wi Ivuyuda; na yamiha ku mihiga 55 mu Jerusalemi.

² Yakola agaali gu vwoni imbiri wa Yahova, kolonda likora liu kuvihiliriza lie zihiiri zia Yahova yakunga kutura mu kivala imbiri wa vandu va Isiraeli.

³ Yumbaka vuhia havundu hukusigamira misambwa aha baba weve Hezekia yaali niyasambula. Yumbaka kandi uvwali mu Litembeli kigira lisigamira lia Baali, kandi nalomba vifananyi viu munyasaye wikikali Ashera; kandi nasigamira zing'ereng'ani.

⁴ Yumbaka uvwali vwu kusigamira misambwa mu Litembeli, havundu ha Yahova yaali niyavoola ndi halava aha sigamirwa mihiga ni mihiga.

⁵ Mu migizi 2 ji Litembeli, Manase yumbaka uvwali vwu kusigamira zing'ereng'ani.

⁶ Yahaana avayaayi veve kuli visiuviliru viukusambwa mu Livona lia Hinomu. Yakola uvusigitiri, uvukumu, uvulaguli. Yakola uvudamanu vunyingi mu zimoni zia Yahova kandi naavukiza uvutima vwivwe.

⁷ Yavika kifananyi cha yalomba mu Litembeli, havundu ha Nyasaye yavolera Daudi nu muyaayi weve Solomoni, “Hano mu Jerusalemi, mu Litembeli yili, ni havundu ha inzi mali kotovola kutura mu kivala choosi chi zihiiri zia Isiraeli kuli havundu ha inzi sigamirwa mihiga ni mihiga.

⁸ Na niiva avandu va Isiraeli valahulira malago gange goosi nilikalaga liange kandi valindi Lilaga liosi liu mutumikiri wange Musa yavaha, hene yaho, si ndavugilira vakungwi mu kivala cha ndaha avaguuga vaavo mba.”

⁹ Manase yaachaminya avandu vi Ivuyuda kandi avaamenya mu Jerusalemi okokora vwoni vonene kali kuvita uvwakolwa ni zihiiri zia Yahova yadiviza imbiri wavo.

Mwami Manase yiganiraa

¹⁰ Yahova yiganihiza Manase na avandu veve, navuzwa vasuura kuhulira.

¹¹ Kunangwa Yahova yaleka avanene vi liihi kwingilira kivala chi Ivuyuda. Vagumira Manase, nivatoza zindoani nu mu muulu geege, nivamuvoha niminyororo ju mugasa, ma nivamuhila Babiloni.

¹² Mu vusaliri vwivwe, yegehiza ligali, nagirung'ana koyeeka ku Yahova Nyasaye weve, kandi namugoonya amukonye.

¹³ Nyasaye yaavugilira lisaala lia Manase, ma ku namuleka yirani Jerusalemi nukwaamiiha kandi. Yaga gamanyia Manase ndi Yahova aveeye Nyasaye.

¹⁴ Inyima wa yaga, Manase yameda kwumbaka uvutambi igulu wi lidigi lie chova ku lovega lwi Ivugwi lwi Lidaala linene lia Daudi, kutura havundu mu livona ahimbi ni kidaho cha Gihoni ivaale wi Kirivwa chi Zisuzi kandi havundu hi lidaala linene ahalangwa Ofeli. Yavika kandi munene wi liihi mu vuli lidaala linene liumbakirwa zimbinga lie Ivuyuda kuliliinda.

¹⁵ Yaatuliza mu Litembeli avanyasaye vageni nikifananyi cha yaali niyaviika mu, kandi yaatuliza uvwali vwu kusigamira misambwa, uvwali ku Kiguru ahi Litembeli liumbakwa kandi havundu handi hoosi mu Jerusalemi hi misambwa ja sigamirwa. Yaahira vindu yivi viosi ichova wi Litembeli ma navisiuva ihale ichova wi lidaala linene.

¹⁶ Yumbaka vuhia uvwali aha Yahova yaasigamirwa, kandi yahaana visiuviliru viemirembe kandi vihaanwa vie lisandiza kuvwo. Yalaga avandu vosi vi Ivuyuda ukusigamira Yahova, Nyasaye wa Isiraeli.

¹⁷ Kali nigava avandu vosi vazizagilira kuhaana visiuviliru havundu hukusigamira misambwa, vaahana vihaanwa yivio vuzwa ku Yahova Nyasaye wavo yeng'ine.

Keheri chi liamiiha lia Manase

¹⁸ Ivindu vindi viosi via Manase yakola, lisaala lia yanira ku Nyasaye weve, amakuva ga vaporofeti vamoloma kuye mu lieta lia Yahova, Nyasaye wa Isiraeli, viang'odwa viosi mu vitabu via makuva ga kale ga Avami va Isiraeli.

¹⁹ Lisaala liu mwami na mativuli ga Nyasaye kulio, kandi livaala liu vwoni vwa yakola nakikiri kwiganira, uvudamanu vwa yakola, havundu hukusigamira misambwa nivifananyi viu munyasaye wikikali Ashera ivia yalomba kandi ni misambwa ja yasigamira viosi viang'odwa mu vitabu via makuva ga kale ga Avaporofeti.

²⁰ Manase yakuza ma naateevwa ha inyumba yu vwami, nu muyaayi weve Amoni yavugula ovogono kuli mwami wi Ivuyuda.

Mwami Amoni wi Ivuyuda

²¹ Amoni yaali wi mihiga 22 lwa yaatanga kwamiiha kuli mwami wi Ivuyuda, na yamiha mu Jerusalemi ku mihiga 2 vuzwa.

²² Kuli baba weve Manase, yoona ku Yahova, kandi nasigamira vifananyi via baba weve yasigamira.

²³ Amoni siyegehiza umwene imbiri wa Yahova, kuli baba weve Manase yegehiza mba, navuzwa, yaazizagilira kokora uvwoni kuvita ligali.

²⁴ Avanene va Amoni vamwikiruka ma nivamwitira munyumba yeeye yu vwami.

²⁵ Navuzwa avandu vi Ivuyuda vita avandu vaali niviiti Amoni kandi ni vakora muyaayi weve Josia mwami mu vogono vwivwe.