2 Kyetsinyinga 11 - KITABU KITAKATIFU

Ovoporofeti vwa Shemaya

¹ Lwu mwami Rehoboamu yaduuka mu Jerusalemi, yalanga harara avasikari vi liihi avalahi ligali 180,000, kutura mu zihiiri zia Benjamini na Yuda. Yasavira kuzia kulwaana nukwilanyia uvwamihi vwivwe ku zihiiri zia Isiraeli zia Ivaale.

² Navuzwa Yahova yavolera muporofeti Shamaya

³ ahaane amakuva yaga ku mwami Rehoboamu kandi ku vandu vosi vi zihiiri zia Benjamini na Yuda:

⁴ “Mutingiliri vandu Isiraeli vache vinyu mba. Munyi mwosi muzie yengo. Aga mali kwekoleka gaveeye uvulariri vwange.” Vosi vahulira lilaga lia Yahova kandi si vazia kulwaana Jeroboamu mba.

Rehoboamu yumbaka zimbinga zia madaala manene mu Ivuyuda

⁵ Rehoboamu yamenya mu Jerusalemi, kandi yumbaka zimbinga zia madaala manene ga Yuda yaga kigira liekinga.

⁶ Yumbaka Bezelehemu, Etamu, Tekoa,

⁷ Bezizuri, Soko, Adulamu,

⁸ Gazi, Maresha, Zifu,

⁹ Adoraimu, Lakishi, Azeka,

¹⁰ Zora, Aijaloni, na Heburoni.

¹¹ Yaagumbakira zimbinga zindinyu ligali kandi natovora munene wi liihi ku vuli lidaala linene, kandi mu vuli lilala yumbaka videera vie viukulia, maguta ga muzeituni, kandi iwaini,

¹² kandi zinguva na matimu. Munzira yiyi yavika Benjamini ni Ivuyuda hasi hu vwamihi vwivwe.

Avasaalisi na va Levi Vangangira Ivuyuda.

¹³ Avasaalisi na vandu va Levi avaari mu Isiraeli mwosi vazia vuyuda na Jerusalemi.

¹⁴ Vandu va Levi valeka amadara gu vwayiru vwavo kandi ni milimi jindi ni vazia Ivuyuda kandi Jerusalemi, kigira mwami Jeroboamu na vami yavo avavugura ovogono vwivwe inyima weve si vaali vanyara kuvaleka vatumiki kuli avasaalisi va Yahova mba.

¹⁵ Jeroboamu yetovolera avasaalisi veve mwene kutumika havundu hu kusigamira kandi vanyasaye vandi kandi kusigamira mademoni nivifananyi via yalomba mu lifana lie vimoli vigiriki.

¹⁶ Avandu kutura mu zihiiri ziosi zia Isiraeli, avenya kusigamira Yahova, Nyasaye wa Isiraeli, valondelera vandu va Levi kuduuka Jerusalemi, kunangwa vave avanyala kuhaana visiuviliru viavo ku Yahova, Nyasaye wa vaguuga vaavo.

¹⁷ Yaga gadinyiriza uvwami vwi Ivuyuda, na ku mihiga 3, vuunga Rehoboamu muyaayi wa Solomoni mukono kandi nivamenya kuli vamenyaa hasi hu vwamihi vwu mwami Daudi kandi mwami Solomoni.

Avi inyumba ya Jeroboamu

¹⁸ Rehoboamu yaa leeta Mahalazi mukaana wa Jerimozi, muyaayi wa Daudi, na Abihaili mukaana wa Eliabu, mwisukulu wa Jese.

¹⁹ Vaali na vayaayi vavaga, Jeushi, Shemaria na Zahamu.

²⁰ Lwinyima Yaleeta Maaka, mukaana wa Abisolomu na vanyoola avayaayi vane: Abija, Atai, Ziza na Shelomizi.

²¹ Mu vosi, Rehoboamu yaali na vakali 18 kandi vatumikiri vakali. Yivula vayaayi 28 na avakaana 60. Ku vakali veve na vakali vaviika vosi, yayanza Maaka kuvita vosi;

²² kandi yayanzilira muyaayi weve Abija ligali ku vana veve vosi; naamutovola kuva niyie uvugura vogono vwivwe kuli mwami.

²³ Rehoboamu yahaana miyinzi no vogeri ku vana veve kandi natuma sa mulala mu vuli lidaala linene liumbakwa ni imbinga mu Ivuyuda kandi Benjamini Yavaha viukulia vinyingi kandi naavaserela avakali vanyingi ligali.