2 Avami 6 - KITABU KITAKATIFU

Elisha yakola imbaazi kwelema

¹ Lidiku lilala mulala ku muganda gwa vaporofeti gwa Elisha yalinda, vililira kuye ni vavoola, “Havundu ha komenyi haveeye hakekeeke ligali.

² Kohe munwa kuzie Jorodani na koteme misaala, kunangwa kuduuki kwumbaka havundu ha kunyala komenya.” Elisha yativura navoora, “Nivulahi.”

³ Mulala kuvo yamuniga vazie naye. Elisha yavugilira,

⁴ na vazia harara. Lwa vaduuka ha mulitu gwa Jorodani, vatanga kotema misaala.

⁵ Lwa mulala kuvo yaali naatema musaala, imbaazi yeeye yi kivia yagwa mu mazi. “Nangore ki, munene wange!”

⁶ Elisha yateeva, “Igwiliyi hayi?” Mundu oyo yamumanyia ha vundu zana. Elisha yatema kisala na kilasa mu mazi; nakora mutwi gwi imbaazi kwelema.

⁷ Elisha yamuvolera, “Gitulize ichova.” Kandi mundu oyo yinama haasi nagidoola.

Liihi lia Vasiria liguutiywi

⁸ Mwami wa Siria yalwana Avisiraeli. Yateveleriza avanene veve ma natovora ha aviikaa hokososa hehe.

⁹ Navuzwa Elisha yatuma makuva ku mwami wa Isiraeli, namwiganihiza avuli kuzia ahimbi na havundu yaho kigira Avasiria valii ni vagoneki ahene yaho.

¹⁰ Kunangwa mwami wa Isiraeli yaahenzeriza havundu hu muporofeti Elisha yaali namumanyi. Vuli ing'inga Elisha yiganihiza mwami kunangwa mwami yalange mwetegeke vuli ing'inga lwa yavitiraa havundu yaho.

¹¹ Mwami wa Siria si yayanzizwa na yaga mba; yalanga avanene veve vosi navateeva, “Nivwaha ku munyi oveeye ku lovega lwu mwami wa Isiraeli?”

¹² Mulala kuvo yativura navoora, “Siali ho nu mulala mba, Mwami wange! Muporofeti Elisha avolera mwami wa Isiraeli choosi cha ovola kali mumbisu mwe keng'oze chicho.”

¹³ Mwami yavoola, “Muzie mwenyelerizi munyore aha aveeye, na inzi ndamugumira.” Lwa yavolerwa ndi Elisha aveeye mu Dozani,

¹⁴ Yatuma yo liihi linene ligali lia magare gu vulwani ni zibarasi. Vaduuka mu lidaala yilio vudiku kandi ni valikumbiriza.

¹⁵ Mugambazuri mu mavwevwe lidiku lialonda ku, mutumikiri wa Elisha yavuka, natura ichova wi inyumba, kandi yalora amahi ga Vasiria, ni zibarasi ziavo kandi na magare gu vulwani gaavo nigakumbirizi lidaala. Yirana ku Elisha vwangu, navoora, “Kuudivi, munene wange! Na kokole ki?”

¹⁶ Elisha yativura navoora, “Utatia mba! Koveeye na vanyingi ku lovega lwiitu kuvita yavo avaveeye ku lovega lwavo.”

¹⁷ Hene yaho Elisha yasaala, “O, Yahova, yigula zimoni ziu muyaayi uyu na oleke alole!” Yahova yativura lisaala lilie, kandi mutumikiri wa Elisha yahenza igulu, nalora vigulu ni vizuyi zibarasi na magare gu vulwani gu muliru goosi nigakumbirizi Elisha.

¹⁸ Lwa Vasiria vavingilira, Elisha yasaala, “O, Yahova, vakuliza avasaza yava!” Yahova yamutivulira lisaala lilie kandi yakuya avasaza yavo ni livakula.

¹⁹ Maku Elisha yazia kuvo navoora, “O, mwaali kogota inzira; yili siliveeye lidaala lia mwenya mba. Nondi, na ndamwimilira kuduuka ku mundu wa mwenya.” Kandi yaavimilira kuduuka Samaria.

²⁰ Nonoho lwa vaali ni vakingira mu lidaala llinene lia Samaria, Elisha yasaala, “O, Yahova, kunuura zimoni zia vandu yava vaduuki kolola” Yahova yativura lisaala lilie; yavilanyira lilola liavo, na valora ndi vaveeye mu Samaria.

²¹ Lwu mwami wa Isiraeli yalora Vasiria yava, yateeva Elisha, “Nzite avandu yava, mwami wange? Mbiiti?”

²² Elisha yativulanavoola, “Awa. Utaviita mba. Wenyaa kwiita yavo ava wavugula avahambe kutura mu vulwani ni kivavi chicho kandi nu vuta vuvwo? Vahe kindu cha valia ni chu kunwa, na uvaleke viirane ku mwami wavo.”

²³ Kunangwa mwami wa Isiraeli yavalombera lilia linene; na inyima wa vaali ni vakalia nu kunwa, yavatuma viirane ku mwami wa Siria. Kutura ing'inga yeyo, kuzia imbiri, Vasiria valekera lingilira nu kulwaana kivala cha Isiraeli.

Liihi lia Siria likumbiriza Samaria

²⁴ Lwinyima, Benihadadi mwami wa Siria yimilira liihi lilie liosi kuzia kulwaana Isiraeli, kandi nakumbiriza lidaala linene lia Samaria.

²⁵ Kuli mativuli gi likumbiriza yilio, ovogeheru vwi viukulia mu lidaala linene yilio vwali vunyingi ligali, kali mutwi gwi ibunda gwagulika vidonye samanini viefeza, na iziguramu miambili zia masilingoko ga makuulu gagulika vidonye vitano viefeza.

²⁶ Mwami wa Isiraeli yaali nagenda igulu ku lidigi lie lidaala linene lwu mukali mulala yahanzuka, “Ngonya mwami wange.”

²⁷ Yativura navoora, “Niiva Yahova sianyala kumukoonya, ni vokonyi ki vwa inzi mbana? Inzi ngaveeye ku niinganu kinga iwaini?

²⁸ Uvudinyu vuvwo voveeye ki?” Yativura navoora, “Lidiku lindi kwaali ni inzara enene, maku mukali uyu, yaleeta iganagani ndi kulie mwana wange, ma kandi kulie mwana weve lidiku lilonda ku.

²⁹ Kunangwa kwadeeka mwana muyaayi wange ni kumulia. Lidiku lialonda ku, ndamuvolera ndi kuduuka kulie muyaayi weve, navuzwa yaali namuvisi.”

³⁰ Lwu mwami yahulira makuva yaga, mwami yatandula zinguvu zizie mu vovereri. Na vandu vaali ahimbi ku lidigi, vaali vanyara kolola ndi yaali ni yiviiki ligunia isi wi zinguvu zizie.

³¹ Yisuha, “Nyasaye anguyi nguzi niiva Elisha sialakalagwa mutwi lidiku linu ni likikiri kumalirika!”

³² Na yatuma mutumwa kuzia koleta Elisha. Ku ing'inga yene yeyo, Elisha yaali yengo na vakulundu valala avaari ni vazi kumuluuta. Mutumikiri wu mwami nakikiri kuduuka, Elisha yavolera avakulundu zana, “Mulumindi ula atumaa mundu kuuza kunzita. Lero, lwaduuka hano, muhaane kiliango na mutaleki yingiri mba. Mwami mwene alava na mulonda vuzwa inyima weve.”

³³ Yaali nakikiri kumala livoora yaga lwu mwami yaduuka navoora, “Ni Yahova umali kokora vudinyu yivu vwosi vuuzi ku kunyi! Kigira ki ni ndiliri kuduuka lwa Yahova akola kindu kokokonya?”