2 Avami 23 - KITABU KITAKATIFU

Josia alombaa lilaga vuhia

¹ Mwami Josia yalanga harara aviimiliri vosi vi Ivuyuda kandi ava Jerusalemi, vaze kuye.

² Na vosi harara vazia mu Litembeli, ni vaveeye harara na vasaalisi, avaporofeti kandi na vandu vandi vosi, avatugi na vadaka vaali keleng'ani. Mwami yavasomera vudinyu kitabu choosi chi Lilagana ichaali ni kinyoleki mu Litembeli.

³ Na mwami yasingira ahimbi nitiru yu vwami, nalomba lilagana ku Yahova kumuhulira nu kulinda malago geege goosi, nu mwoyo gwigwe gwosi kandi ni liiva lilie liosi, kandi kuviika mu vikolwa lienya liosi lilondekana ni lilagana, kuli gang'odwa mu kitabu yicho. Na vandu vosi valaga kugumira malago.

⁴ Hene yaho, mwami Josia yavolera Hilicha, musaalisi munene, avasaalisi valondi veve, na vasikari vu kulinda avaari ku miyinzi ha vwingiliru vwi Litembeli valeete ichova wi Litembeli iviju viosi iviatumikaa mu lisigamira lia Baali, viu munyasaye wi kikali Ashera, kandi zing'ereng'ani. Mwami yasambira iviju yivi viosi ichova wi lidaala linene lia Jerusalemi ahimbi ni Livona lia Keduroni, na yaahira lligoke liavio Bezeli

⁵ Yaatuliza ho avasaalisi vosi va vami vosi vi Ivuyuda vaali ni vaviika, kuhaana visiuviliru ku vwali vwa vandu vatamanyi Yahova Nyasaye mu madaala manene gi Ivuyuda kandi muvivala iviali himbi na Jerusalemi - avasaalisi vosi avahaana visiuviliru ku Baali, ku liuva, mweli, kandi zing'ereng'ani kandi ku vindi viosi viu muvwerefu.

⁶ Yaatuliza mu Litembeli kifananyi chu munyasaye wi kikali Ashera, nakituliza ichova wi lidaala linene kuduuka mu livona lia Keduroni, naakisaamba, naduya ligoke liacho kuduuka ni kigwa uluguchi; kandi na kisalanyia hoosi mu mulimi gwi vilindwa.

⁷ Yasambula zinyumba zia malaya masaaza gu mu Litembeli gamenyaa kandi ha vakali vanaviraa zinguvu ziukutumikira mu lisigamira liu munyasaye wi kikali Ashera.

⁸ Josia yaleeta mu Jerusalemi avasaalisi vosi kutura mu madaala manene goosi gi Ivuyuda kandi ni yononyia uvwali vwavo vwosi, kutura Geba kuduuka Beerisheba; kandi yasambulanyia hukusigamira haali mu vilivwa aha avasaalisi yavo vaali ni vasambira kimuli. Yasambula uvwali vwa mademoni gi imburi vwali himbi nu vwingiliru vwingira kuduuka ku kirivwa chumbakwa na Joshua waali mwami wi lidaala linene liali ku mukono mumosi gwi kirivwa kinene nu wingiraa mulidaala.

⁹ Vasaalisi yavo sivavugilirwa kutumika mu Litembeli lia Yahova mba, navuzwa vaali vanyara kulia ku migadi gitali na mamera jaleetelwa avasaalisi vache vaavo.

¹⁰ Mwami Josia kandi yononyia Tofezi, havundu hu kusigamira ha vandu vatamanyi Nyasaye, mu Livona lia Hinomu, kunangwa avuli kuva ho nu mundu uhaana mwana muyaayi weve anoho mukaana kuli kisiuviriru chu kusambwa ku munyasaye Moleki.

¹¹ Yaatuliza ho zibarasi zia vami vi Ivuyuda vaali ni vaviika ku makono zive zindakatifu ku lisigamira munyasaye wi liuva, kandi yasamba magare gatumikirwa mu lisigamira yili. Yivi viavikwa mu mugizi gwi Litembeli ahimbi ni kirivwa kandi ahimbi ni zinyumba zio komenya mu ziu munene walangwa Nazani-Meleki,

¹² Mwami Josia yasambula uvwali vwosi vwa vami vi Ivuyuda vaali ni vumbaka ku kesegese chinyumba yu vwami ahimbi no vomenyo vwu mwami Ahazi, kandi yasambula uvwali vwa Manase yaali Ni yumbaka mu migizi givili ji Litembeli lia Yahova. Yasambula uvwali nukuvwatanyia mu vijonjo kandi navisiuva mu livona lia Keduroni.

¹³ Mwami yononyia uvwali vwosi vwa Solomoni yaali ni yumbaka ivugwi wa Jerusalemi, isavaalu wi kiguru cha Muzeituni, kigira lisigamira lie misambwa ju kuvihiliriza, Asitarite munyasaye wikikali wa Sidoni, Kemoshi munyasaye wa Moabu, kandi Moleki, munyasaye wa Amoni.

¹⁴ Mwami Josia yatanyia zitiru zia magina, mu vidonye, natemanyia vifananyi viu munyasaye wi kikali Ashera, kandi nafuma havundu ha vasingira ni vigumba via vandu vakuza.

¹⁵ Josia yasambula kandi havundu hu kusigamira mu Bezeli, ahaali ni huumbakwa na Jeroboamu muyaayi wa Nebati, wimilira Isiraeli kuduuka mu likora uvwoni. Josia yasambula uvwali, ni yatanyia magina gavwo mu vidonye kandi naviduya kuduuka ni vigwa luguki. Yasamba kandi vifananyi via Ashera.

¹⁶ Maku Josia yikivuka nalora vilindwa vilala iviali ku kiguru, yavavolera vatulizi mu vigumba nu kuvisambira ku vwali. Munzira yiyi, yononyia uvwali, nakora agu muporofeti yaali ni yaporofeta kale ing'inga yi lisavo lwu mwami Jeroboamu yaali nasingiyi himbi nu vwali. Mwami Josia yahenza nalora kilindwa chu muporofeti wavoola makuva gi liporofeta yili.

¹⁷ Mwami yateeva, “Ni kilindwa cha vwaha yicho?” Avandu va Bezeli vativura, “Keveeye kilindwa chu muporofeti watula Ivuyuda kandi naporofeta inguuva yiyi ya umali kokora ku vwali yivu.”

¹⁸ Josia yavavolera, “Mukeleke kuli keveeye ndio. Vigumba vivie vitatulizwa mba.” Kunangwa vigumba vivie siviatulizwa mu kilindwa mba, kinga yivio via vaporofeti avaari ni vatura Samaria.

¹⁹ Mu vuli lidaala linene lia Isiraeli, mwami Josia yasambula havundu hu kusigamira vanyasaye ha vandu vavura kumanya Nyasaye vumbaka. Vami va Isiraeli vavukiza uvutima vwa Yahova. Josia yakola ku vwali yivwo goosi aga yaali naakori mu Bezeli.

²⁰ Yitira ku vwali yivu avasaalisi vosi vavura kumanya Nyasaye kandi nasambira ku vuli vwali ivigumba via vandu, ma ni yirana Jerusalemi.

Josia alombaa Lilia lie Lisavo

²¹ Mwami Josia yavolera avandu kolomba Lilia lie Lisavo kuhaana uluyali ku Yahova, Nyasaye wavo, kuli gang'odwa mu kitabu chi Lilaga.

²² Si liali ho ni Lilia lie Lisavo kuli yili ilialombwa kuliivwa nu mwami wa Isiraeli anoho Ivuyuda, kutura ing'inga ya Vakalagi vamiiha ihiiri yoosi.

²³ Navuzwa mu muhiga gwa komi na nane gwi liamiiha liu mwami Josia, Lilia lie Lisavo lialomberwa Yahova mu Jerusalemi.

Josia yalomba ligirung'ana lindi

²⁴ Kuhaana zinguru nu kudinyiriza Lilaga liang'odwa mu kitabu chu Musaalisi Munene Hilikia yaali nanyooye mu Litembeli, mwami Josia yaatuliza mu Jerusalemi harara ne Ivuyuda yoosi avasigitiri, avakumu, avanyasaye vu muzinyumba, vifananyi, harara ne viju viosi viukusigamira misambwa.

²⁵ Sihaaliho nu mwami wundi kuli Josia ku maziambiri, watumikira Yahova nu mwoyo gwigwe gwosi, ni zing'anagani zizie ziosi, kandi ni zinguru zizie ziosi, kandi kuhulira Lilaga liosi lia Musa; sihaava ho nu mwami kuli uyu maziambiri mba.

²⁶ Navuzwa uvululu vwu vutima vwa Yahova vwali ni vuvukiziywi ku vandu vi Ivuyuda kigira agu mwami Manase yaali naakori, na kali kuduuka na kalunu uvutima vwa Yahova vwali ni vukikiri kohomata.

²⁷ Yahova yavoola, “Ndakora ku vandu vi Ivuyuda aga mali kokora ku vandu va Isiraeli: Ndatuliza avandu vi Ivuyuda imbiri wange, na ndasuura Jerusalemi, lidaala linene lia ndatovora, kandi Litembeli lia ndavoora lilava havundu ha sigamirwa.”

Keheri che liamiiha lia Josia

²⁸ Vindu vindi viosi viu mwami Josia yakola, viang'odwa mu vitabu via makuva ga kale ga avami vi Ivuyuda.

²⁹ Lwa Josia yaali mwami, mwami Neko wa Egebeti yimilira liihi kuduuka ku mugera gwa Efurate kuzia kokoonya mwami wa Asiria kulwaana. Lwu mwami Josia yageriza kwigalira liihe lia vandu va Egebeti ha Megido, yamanya ni yitirwa mu vulwani.

³⁰ Vanene veve vaviika muviri gwigwe ku ligare liu vulwani ma ni vagwilanyia mu Jerusalemi, nivamuyavira mu vilindwa via vami. Vandu vi Ivuyuda vatovora muyaayi wa Josia walangwa Joahazi nivamuvaka amaguta kuli mwami wi Ivuyuda.

Mwami Joahazi wi Ivuyuda

³¹ Joahazi yaali ni mihiga sirini na tatu lwa yaatanga kwamiiha kuli mwami wi Ivuyuda, na yamiha mu Jerusalemi ku mieli givaga. Lieta lia mama weve liali Hamutali, mukaana wa Jeremia kutura mu lidaala linene lia Libuna.

³² Joahazi yakola uvwoni mu zimoni zia Yahova, kuli vwa vaguuga veve vaali ni vaakora.

³³ Liamiiha lilie liahera lwu mwami Neko wa Egebeti yamuvugula kandi umuhambe ha Ribula, mu kivala cha Hamazi, ma nakora avandu vi Ivuyuda kutunga uvusuuru vwi zikilo 3,400 zie ifeza na zikilo 34 zie zahabu.

³⁴ Mwami Neko yakola Eliakimu muyaayi wa Josia mwami mu vogono vwa Josia, baba weve, ma nagirung'anyia lieta lilie kuva Jehoyakimu. Mwami Neko yaahira Joahazi mu Egebeti, wa yakuzira.

Mwami Jehoyakimu wi Ivuyuda

³⁵ Mwami Jehoyakimu yasolola uvusuuru kutura ku vandu vi Ivuyuda kolondekana nu vutugi vwavo. Yakola ndio ku aduuki konyoora kedonye chu vusuuru chenyekanaa kutungwa ku mwami wa Egebeti.

³⁶ Jehoyakimu yaali ni mihiga sirini na tano lwa yagwa mwami wi Ivuyuda, na yamiha mu Jerusalemi ku mihiga komi na moja. Mama weve yaali Zebida, mukaana wa Pedaya kutura mu lidaala lia Ruma.

³⁷ Jehoyakimu yakola uvwoni imbiri wa Yahova nalondaa liiva lia vaguuga veve.