2 Avami 2 - KITABU KITAKATIFU

Yahova yaahira Elija Mwigulu

¹ Ing'inga yaduuka lwa Yahova yaahira Elija mwigulu ni kihuzuzi. Elija na Elisha vatanga logendo kutura Giligali.

² Nivaveeye kologendo, Elija yavolera Elisha, “Yaanza utigale hano; Yahova umali kundanga nzie kuduuka Bezeli.” Navuzwa Elisha yativura navoora, “Nzisuha ku Yahova oveeye mwoyo, kandi ku ivi ndi, sindakoleka kali hakuzu mba.” Kunangwa vazizagilira kuzia Bezeli.

³ Muganda gwa vaporofeti avamenyaa ha Bezeli vazia ku Elisha, ni vamuteeva, “Ukamanyi ku Yahova azizaa kuvugura munene woovo kutura ku ivi lidiku lia lero?” Elisha yativura, “Yee, inzi manyi vulahi. Navuzwa leki kuvuli komoloma amakuva yago kalunu.”

⁴ Maku Elija yavolera Elisha, “Kalunu yikala hano, Yahova umali kundaga nzie Jeriko.” Navuzwa Elisha yativura, “Inzi nzisuha ku Yahova oveeye mwoyo kandi ku ivi ndi sindakoleka mba.” Kunangwa vazizagilira kuzia kuduuka Jeriko.

⁵ Muganda gwa vaporofeti avamenyaa yo vazia ku Elisha ni vamuteeva, “Ukamanyi ku Yahova azizaa kuvugura munene woovo kutura ku ivi kalunu?”

⁶ Maku Elija yavolera Elisha, “Lero yikala utigale hano; Yahova umali kundaga inzi nzie ku mugera gwa Jorodani.” Navuzwa Elisha yativura, “Inzi nzisuha ku Yahova oveeye mwoyo, kandi ku ivi ndi inzi sindakoleka kali hakuzu mba.” Kunangwa vazizagilira,

⁷ na avaporofeti amusini vavalonda kuduuka ku mugera gwa Jorodani. Elija na Elisha vasingira ku mugera, na avoporofeti amusini yavo vasingira hahale ku kutura kuvo.

⁸ Maku Elija yaatuliza inguvu yu vusaalisi yeye nagilinga harara kandi nagikuya ku mazi, amazi gavukana na Elija na Elisha vaambuka kuzia ku luginga Lundi ku marova amuumu.

⁹ Wene yeyo Elija yavolera Elisha, “Mbolera cha wenya ngokolere ni ngikiri kutulizwa ku ivi.” Elisha yavoola, “Leka nyoore kidieli chi zinguru zizio kinyala kongola mbuguli vogono vuvwo.”

¹⁰ Elija yativura navoora, “Uteevi kindu kidinyu. Navuzwa niiva ulandola lwa inzi mba nimbugulwa kutura ku ivi, ulakenyoola; navuzwa niiva siulandola, siulakenyoola mba.”

¹¹ Vazizagilira komoloma ni vagenda; maku nonoho ligare liu muliru ni lihilwaa ni zibarasi ziu muliru liaza hagati haavo ni livavukanyia. Elija yahilwa igulu kuduuka mwigulu ni kihuzuzi.

¹² Na Elisha yalilola ma yalilira Elija, “Baba wange, baba wange! Mukingi wi zinguru zia Isiraeli! Ligali uziiyi!” Kandi siyalola Elija kandi mba. Mu vovereri vonene ligali, Elisha yatandula inguvu yeye yu vusaalisi mu zimbala ziviri.

¹³ Maku yadoola inguvu yo vusaalisi ya Elija iyaali nitonyi kutura kuye, ni yirana kandi nasingira ku luginga lwu mugera gwa Jorodani.

¹⁴ Yakuya amazi ni inguvu ya Elija, navoora, “Yahova, Nyasaye wa Elija uveeye haliha?” Yakuya amazi kandi nago gavukana yiyi ni yiyi, kandi naye yambuka.

¹⁵ Vaporofeti amusini avaari ha Jeriko valora Elisha, vavoola, “Roho wa Elija aveeye ku Elisha.” Vazia kumwaganira, ni vinama haasi imbiri weve,

¹⁶ ni vavoola, “Koveeye hano avasaza vi zinguru amusini. Leka kuzie kukwenyera munene woovo. Hawundi Roho wa Yahova umugingi nu kumusigisa ku kiguru kilala anoho mu livona lilala.” Elisha yativura “Awa, mutazia mba.”

¹⁷ Navuzwa vamugonyereriza kuduuka naluha navavugilira kandi navaleka vazie. Amusini kuvo vazia ni vahenza igulu ku vigulu nu mumavona ku madiku gavaga, navuzwa si vamunyoola mba.

¹⁸ Maku virana ku Elisha, uwaali navalindiliraa ha Jeriko, kandi navavoolera, “Sindamuvolera muvuli kuzia?”

Vilolekizu via Elisha

¹⁹ Vasaza valala kutura Jeriko vazia ku Elisha ni vamuvolera, “Kuli ivi umanyi, lidaala yili ni lilahi, navuzwa amazi gaveeye amadamanu kandi gakoraa avakali kutura avana.”

²⁰ Elisha yavavolera, “Viika munyu ku luju luhia, na mundeetere.” Vamuleetera,

²¹ ma nazia ha kidaho, kandi naazuka munyu mu mazi navoora, “Yaga nigo ga Yahova avoora, ‘Ngolaa amazi yaga kuva malahi na malengeru, kandi sigalaleeta likuza kinga lihuusa kandi mba!’ ”

²² Na amazi yago gaveeye malahi kutura lwene yilwo, kuli Elisha yaali navooye.

²³ Elisha yatura Jeriko juzia Bezeli, na lwa yaali kunzira nazizaa, avayaayi valala vatura mu lidaala, ni vamukolera kehenyahenye.

²⁴ Vahaanzuka ni vavoola, “Tula hano vwangu, ivi wu gwavuusu! Tula hano ivi wu gwavuusu!” Elisha yagirungana navuumika kandi navalaama mu lieta lia Yahova. Ahene na hene yaho, ziduba zingali ziviri ziatula mu mulitu ni zitandulanyia avayaayi arubaini na mbiri kuvo mu vidonye.

²⁵ Elisha yaazizagilira kuzia ku kiguru cha Karimeli, na lwi nyima yirana Samaria.