2 Avami 18 - KITABU KITAKATIFU

Mwami Hezekia wi Ivuyuda

¹ Mu muhiga gwa kavaga gwi liamiiha lia Hoshea muyaayi wa Ela kuli mwami wa Isiraeli, Hezekia muyaayi wa Ahazi yagwa mwami wi Ivuyuda.

² Yaali ni mihiga sirini na tano lwa yaatanga kwamiiha, na yamiha mu Jerusalemi ku mihiga sirini na tisa. Lieta lia mama weve liali Abija mukaana wa Zakaria.

³ Yakola agaali malungi mu zimoni zia Yahova kuli Daudi guuga weve yakola.

⁴ Yononyia havundu hoosi hu kusigamira misambwa navunanyia minaara ja magina, kandi natemanyia vifananyi viu munyasaye wi kikali Ashera. Yadonyanyia kandi enzoka yu mugasa ya Musa yaali ni yalomba, iyalangwa “Nehushetani”. Kuduuka ing'inga yene yeyo, avandu va Isiraeli vaali ni vakisamba vimuli mu ligiha uluyali.

⁵ Hezekia yasuuvira Yahova, Nyasaye wa Isiraeli; kunangwa sihaali ho nu mwami wundi mu Ivuyuda kuli oyo, inyima weve anoho yavo avaari imbiri weve ing'inga yeeye.

⁶ Yaali musuuvirifu ligali ku Yahova kandi siyamutinguha ku kali hakuzu mba, navuzwa yalonda vulahi amalago ga Yahova yaali ni yaaha Musa.

⁷ Na Yahova yaali harara naye. Hoosi ha yazizaa, yagasizwaa. Yibaala ku mwami wa Asiria kandi nasuura ukwamiifwa naye.

⁸ Yaguuta nu kwiita Vafilisitia, kandi ni yingilira havundu hoosi aha vamenya kutura ku tudaala tokekeeke ligali kuduuka ku madaala manene gi zimbinga, komeeda ku Gaza na vivala vialio ivialikumbiriza.

⁹ Mu muhiga gwa kane gwi liamiiha lia Hezekia, gwali muhiga gwa saba gwi liamiiha liu mwami Hoshea wa Isiraeli, mwami Shalimanaseri wa Asiria yingilira kulwaana Isiraeli kandi nakumbiriza Samaria.

¹⁰ Mu muhiga gwa kavaga gwi likumbiriza yilio, yagumira Samaria. Yigu gwaali muhiga gwa sita gwi liamiiha lia Hezekia, kandi muhiga gwa tisa gwi liamiiha lia Hoshea.

¹¹ Mwami wa Asiria yaahira Visiraeli Asiria kuli avahambe, na valala kuvo vahevwa komenya mu lidaala linene lia Ala, avalala ahimbi nu mugera gwa Habori mu kivala cha Gozani, na vandi mu madaala manene ga Media.

¹² Samaria liaguutwa kandi ni ligumirwa kigira vandu va Isiraeli sivahulira Yahova Nyasaye wavo mba; navuzwa vavunanyia lilagana lia Yahova yaali ni yalomba navo; kandi ni vavura kuhulira malago goosi agahaanwa na Musa, mutumikiri wa Yahova. Sivali vanyara kuhuliriza kinga kuhulira.

Vandu va Siria vatihiza Jerusalemi

¹³ Mu muhiga gwa komi na ine gwi liamiiha liu mwami Hezekia, Senakeribu, mwami wa Asiria yingilira madaala manene gi Ivuyuda gi zimbinga kandi nagaguuta.

¹⁴ Hezekia yatuma amakuva ku Senakeribu, uwaali naveeye mu lidaala linene lia Lakishi, “Mali kogosa, yaanza lekera lingilira litulira liilio, na inzi ndatunga choosi cha wenya kuzingulu.” Litivuli liu mwami Senakeribu liali ndi kuduuka Hezekia amutumili zikilo zielefu likomi zie ifeza kandi zikilo elefu ndala zie zahabu.

¹⁵ Hezekia yamutumira ifeza yoosi iyaali mu Litembeli kandi mu livikiru lie inyumba yu vwami.

¹⁶ Yaatuliza izahabu kutura ku miliango je Litembeli kandi izahabu ya oyo mwene yaali ni yafumira amaliva gi miliango ji Litembeli, na yagihaana ku Senakeribu mwami wa Asiria.

¹⁷ Mwami wa Asiria yatuma liihi linene ligali kutura Lakishi, kwingilira Hezekia ha Jerusalemi. Liihe yili liimilirwa na vanene veve kuvita vosi vavaga. Lwa vaduuka ha Jerusalemi, vavugura inzira iyazizaa aha vayinziri vo kolomba zinguvu vayinzilira ahimbi nu mutaro goletaa amazi kutura mu lidavalia lie iluhia.

¹⁸ Maku valanga mwami Hezekia, yaze na vavaga ku vanene veve vazia kuvaaganira. Eliakimu muyaayi wa Hilikia, uwasingilira inyumba yu vwami; Shebina, mung'odi wi kiyaalo; na Joa muyaayi wa Asafu, wasingilira vitabu vie zing'inga.

¹⁹ Mulala ku vanene va Asiria yayavavoolera ndi mwami wavo yenya kumanya ekelombaa mwami Hezekia ukwisuuvira mwene.

²⁰ Yamuteeva, “Usuviraa amakuva ameere ganyala kuvugura vwiyangu vwo vogeri ni zinguru ziu vulwani? Ivwaha wa usuviraa alakokoonya kwibaala kutura ku kivala cha Asiria?

²¹ Usuviraa Egebeti valaza kokohonyia, navuzwa galava kuli kutumikira kidundu kuli imbimbu yokogendela. Lwivunika ilakotoza mu mukono gugwo. Nindio kuli mwami wa Egebeti aveeye lwu mundu woosi amusuuvira nu kwiidila kuye.”

²² Munene wa Asiria, yaazizagilira navoora, “Anoho, munyala kumbolera ndi munyi musuuviraa mu Yahova Nyasaye winyu? Haali hu kusigamira hatakatifu kandi uvwali vwa Hezekia yononyia, lwa yavolera avandu vi Ivuyuda na Jerusalemi vasigamiri vuzwa ha vwali voveeye mu Jerusalemi heng'ine.

²³ Ndalomba lilagana na munyi mu lieta liu munene wange, mwami wa Asiria. Ndamuha zibarasi zielefu ziviri niiva munyala konyoora avandu vanyingi kuli ndio kuniina kuzio!

²⁴ Kali simunyala kuduukira ku avanene vi ikika cha haasi ligali cha vandu va Siria, na munyi mulindiliraa Vaegebeti vamutumiri vandu vu kunina ku zibarasi kandi magare gu vulwani!

²⁵ Muganaganaa ndi mali kwingilira kivala chienyu kandi kukidiviza vugira vokonyi vwa Yahova? Yahova mwene yambolera nyingiliri kandi ngidivizi.”

²⁶ Maku Eliakimu, Shebina na Joa vaavoolera munene wa Senakeribu, “Moloma na kunyi mu lulimi lwa Vamaleki mwaza, kigira kunyi kulumanyi; utamoloma mu Luheburaina mba; avandu vosi avaveeye ku lidigi vahuliriza.”

²⁷ Navuzwa munene wi liihi Rabishake yavavolera, “Muganaganaa ni munyi nu mwami winyu veng'ine vu mwami wange yandumi kumuvolera vindu yivi viosi? Awa, molomaa kandi ku vandu viikaye ku lidigi, avamanya valie amavi gaavo nu kunwa aminyali gaavo, kuli munyi kandi na mukore.”

²⁸ Maku munene wi liihi lia Asiria yasingira nahanzuka mu Luheburaina, “Hulirizi agu mwami wa Asiria amuvoleraa!

²⁹ Amwiganihizaa muvuli koleka Hezekia amugaade. Hezekia sianyala kohonyia munyi mba.

³⁰ Kandi mutaleka amugoonye munyi musuuviri ku Yahova mba. Mutaganagana hawundi Yahova alamuhonyia, kandi aligalira liihi lia Asiria kuvula kugumira lidaala linene lienyu.

³¹ Mutahulirizi ku Hezekia mba. Mwami wa Asiria amulanga muturi mu lidaala linene lienyu na mwihaane kuye aveene. Mwosi mulavugilirwa ukulia makuyu kutura ku mizabibu jenyu aveene, kandi makuyu kutura ku misaala jenyu aveene, nu kunwa amazi kutura mu vidaho vienyu aveene,

³² kuduuka lwu mwami yirana kumukola mu menye mu kivala ekeveeye kuli ichiinyu aveene, haveeye ni vizabibu ukuhaana iwaini, kandi haveeye nu vuswage vwo kolomba migadi. Keveeye kivala chi mizeituni, maguta ga muzeituni kandi uvwuki. Niiva mulakola aga amulagaa, simulakuza mba, navuzwa mulava mwoyo. Mutaleka Hezekia amusiruharize mu liganangana ndi Yahova alamuhonyia.

³³ Ni vanyasaye ki vi zihiiri zindi avahonyia ku vivala viavo kutura ku mwami wa Asiria?

³⁴ Vaveeye haliha kalunu, avanyasaye va Hamazi kandi Aripadi? Vanyasaye va Sefarivaimu, Hena kandi Ava vaveeye haliha? Haveeye ho nu mundu wahonyia Samaria?

³⁵ Ni ng'inga ki ya vanyasaye vi vivala yivi viosi avahonyia ku vivala viavo kutura kuzinguru zia Asiria? Kunangwa niki kimulombaa kuganangana ndi Yahova anyala kohonyia Jerusalemi?”

³⁶ Navuzwa avandu vosi vakiring'ana zizizi kuli mwami Hezekia yaali navavooleye vakole; sivativula ku likuva kali lilala mba.

³⁷ Maku Eliakimu, Shebina, na Joa vatandula zinguvu ziavo mu vovereri vonene, ni vazia kovoolera mwami Hezekia amakuva gu Musiria yaali navooye.