2 Avami 11 - KITABU KITAKATIFU

Mwami wi kikali Azalia wi Ivuyuda

¹ Nonoho, lwa Azalia, mama wu mwami Ahazia yamanya ndi muyaayi weve ukuzi, yahaana malago ndi avinyumba yu vwami vosi kuduuka viitwi.

² Navuzwa Jehosheba, mukaana wu mwami Joramu, mbozo Ahazia, yavugula Joashi muyaayi wa Ahazia, namwiiva kutura ku vayaayi vu mwami avaari himbi kwitwa. Yavugula oyo harara nu muleri weve, navaviika mu keng'oze mu litembeli. Nandio, yamuvisa kutura ku Azalia kunangwa avuli kwitwa.

³ Jehosheba yaleeta nu kuvisa Joashi ku mihiga sita mu Litembeli lia Yahova, lwa Azalia yamiha kuli mwami wikikali.

⁴ Navuzwa mu muhiga gwa saba, Jehoyada musaalisi yalanga avanene vu muganda gwa avasikari valinda uvwami, kandi avalindaa inyumba yu vwami navavoolera vaze kuye mu Litembeli; yavavolera vavugiliri ni liesuuha ku aga yalohizaa kokora. Yavamanyia muyaayi wu mwami Ahazia, Joashi

⁵ kandi navaha malago yaga navoora, “Lwa muzaa ku miyinzi mu ing'inga yinyu ku Lisabato, kidieli kilala ku vivaga ku munyi mulaliinda inyumba yu vwami.

⁶ Kidieli kilala ku vivaga kindi ku munyi valasingira kulinda ha kirivwa cha Suri, na kidieli cha kavaga kindi valasingira ha kirivwa inyima wa avalindi vandi.

⁷ Viduma viviri ku munyi avava ni vaturaa ku miyinzi ku lidiku lie Lisabato valasingira kulinda ha Litembeli okosoola mwami.

⁸ Kuduuka mukumbirize mwami Joashi, sa mulala ni viuma vivie mu mukono, na muve naye hoosi aha ava nazia. Mundu ku vosi wisunda ahimbi ku munyi kuduuka yiitwi.”

⁹ Vanene va avasikari vaakora kuli Jehoyada musaalisi yavalaga; na sa mulala yaleeta avandu vasaza veve avenyekaa vave ni vaturaa ku miyinzi mu Lisabato, kandi yavo avenyekaa vaze ku miyinzi, ku Jehoyada musaalisi.

¹⁰ Yaaha avanene zana amatimu zikuuti ziali ziu mwami Daudi na ziali ni ziavikwa mu Litembeli;

¹¹ na avasikari valindi vasingira, sa mulala ni viuma viu vulwani vivie mu mukono gwigwe, kutura ku lovega lwi Isavaalu wi Litembeli kuduuka ivaale wi Litembeli, kukumbiriza uvwali, kandi ku kinga mwami.

¹² Hene yaho, Jehoyada yaleeta Joashi ichova, ma naviika itaji ku mutwi gwigwe, kandi naamuha malago gamiihaa uvwami. Maku Joashi yavakwa maguta kandi nalandizwa kuva mwami wi Ivuyuda; na vakuba makono gaavo ni vavoola, “Mwami ahindiri!”

¹³ Lwu mwami wi kikali Azalia yahulira liyoga lialombwa na vasikari vu kulinda kandi na avandu, yanyagula vwangu mu Litembeli, umwi kiduma chaali ni kivungi.

¹⁴ Mwene yimwo, yalora mwami muhia nasingiyi ahimbi ni itiru ha vwingiliru he Litembeli kuli gwaali umwima. Yakumbirizwa na vanene va vasikari kandi na vakubi vi visiliva, na avandu vosi vaali ni vahanzuka nu vusangali kandi ni vakuba visiliva. Hene yaho Azalia yatandula zinguvu zizie mu vovereri, nahanzuka; “Gaveeye vwibaali, uvwibaali!”

¹⁵ Musaalisi Jehoyada siyenya Azalia yitirwi mu Litembeli mba. Kunangwa yalaga avanene vi liihi navoora, “Mutulizi hagati hi zimbaso zia vasikari vu kulinda kandi mwiti mundu ku vosi ogeriza kumusoola.”

¹⁶ Vamugumira ni vamuhira munyumba yu vwami na uwene yeyo ha kirivwa chi zibarasi, vamwita.

Ligirung'ana lialombwa na Jehoyada

¹⁷ Jehoyada musaalisi yalomba mwami Joashi harara na vandu va Isiraeli ukwingira mu lilagana hagati haavo na Yahova ndi valava avandu va Yahova. Yalomba lilagana hagati hu mwami na vandu.

¹⁸ Hene yaho avandu va Isiraeli vazia mu litembeli lia Baali ni vasambula liosi, uvwali vwivwe vwosi, ni vifananyi vivie viosi viatanywa, kandi ni viitira Matani, musaalisi wa Baali, imbiri wu vwali. Maku Jehoyada musaalisi yavika avasikari vukulinda valindi ha Litembeli lia Yahova.

¹⁹ Yavugula avanene va vasikari, na vasikari vu kulinda uvwami, na avasikari vu kulinda inyumba yu vwami, vaheleka mwami kutura mu Litembeli ni vazia munyumba yu vwami, ni vingilira mu kirivwa cha vasikari vu kulinda, ma navugura ovogono vwivwe ku endeve yu vwami.

²⁰ Avandu vosi vaali nu vuyanzi ligali, kandi lidaala linene liosi liakiring'ana kigira Azalia yitirwa ha inyumba yu vwami.

²¹ Joashi yaali ni mihiga saba lwa yaatanga kwamiiha kuli mwami wi Ivuyuda.