1 Vakorintho 10 - KITABU KITAKATIFU

¹ Avaamitu vange, nyenya mwizurizi ikindu chekoleka ku vaguuga viitu vosi avavohololwa kutura mu kivala cha Egebeti. Vosi vaali hasi hi likingwa lie lilesi yilio kandi vosi vaambuka vulahi kuvitira munyanza Inzakanyu.

² Vosi vabatizwa nivava valondi va Musa mu lilesi yilio, kandi munyanza yiyi.

³ Vosi valia chukulia kilala chere cha roho,

⁴ kandi vosi vanwa chukunwa kilala chere cha roho. Vanwa ku lwanda lwa roho lwazia harara navo; ulwanda yilwo lwali Kristo mwene.

⁵ Kali ndio avanyingi kuvo sivayaanziza Nyasaye, na miviri jaavo mikuzu jasalanywa mwigendanyama.

⁶ Yaga goosi gaveeye ekelolero ku kunyi kukwiganihiza kunangwa kuvuli kwegomba kokora uvudamanu kuli yavo vaakora,

⁷ kinga kusigamira vifananyi kuli valala kuvo vaali. Kuli Mang'oda Matakatifu gavoora, “Avandu viikara ku lilia kandi iliinwa, liamanya niligirung'ana kuva ilisavo liu kusigamira vifananyi.”

⁸ Kutakola voheyi kuli valala kuvo vaakora, ma nivakuza ku lidiku lilala vandu izielefu sirini na tatu mba.

⁹ Kutageriza Mwami kuli valala kuvo vamugeliza ma niviitwa ni zinzoka mba.

¹⁰ Mutamoonya kuli valala kuvo vamoonya ma nivadivizwa ne Engelosi wi Likuza mba.

¹¹ Kunangwa vindu yivi viosi viekoleka kuvo niviva kuli chukwiganihiza ku kunyi. Kunyi komenyi mu ing'inga lwi keheri keveeye ahimbi kuduuka.

¹² Woosi wiganagana asingiyi vudinyu vwakaveeye vulahi yeehenze, gase alagwa!

¹³ Magerizu ga mwanyoola gaveeye ga kazozo ku vandu. Navuzwa Nyasaye aveeye umusuuvirifu kulinda lisuuviriza lilie, naye sialamuleka mugerizwe kuvita zinguru zie liekuzira lienyu mba; ing'inga ya magerizu, alamuha vunyali vwu kwikuzira kugo, kandi inzira yukwilukira mu.

¹⁴ Kunangwa avalina vayanze vange, mwerehe ku lisigamira vifananyi.

¹⁵ Inzi molomaa ku munyi kuli mbolera avandu vaveeye no vogeri; mwikalagiri aveene ku gamboolaa.

¹⁶ Ekekombe chakutumikiraa mu Lisavo liu Mwami, nicho kandi cha kuhaaniraa ku lizominya ku Nyasaye: Lwa kunwera mu kekombe yiki, kusangaa mu masahi ga Kristo. Umugadi gwa komegaa: lwa kugulizaa, kusangaa mu muviri gwa Kristo.

¹⁷ Kigira goveeye umugadi mulala, kunyi avakoveeye vanyingi, koveeye umuviri mulala kigira kwosi kusangaa umugadi mulala mwere yigu.

¹⁸ Ganagana ku vandu va Isiraeli; yavo avalizaa kihaanaa kuva kisiuviriru vasanga mu miyinzi ju vwali vwa Nyasaye.

¹⁹ Maku nyara kuva nimbora ndi, kifananyi kinyala kuva Nyasaye wa giligali? Anoho chukulia kihanwa ku kifananyi kinyala kuva kisiuviriru cha giligali?

²⁰ Awa! Agamboolaa gaveeye ndi: kuhaana kisiuviriru ku vwali vwa vandu vatamanyi Nyasaye, kihanwa ku mademoni, na sigaveeye ku Nyasaye mba. Sinyenyaa munyi muve ni lisanga harara na mademoni mba.

²¹ Simunyala kunwera mu kekombe chu Mwami kandi munwere mu kekombe cha mademoni mba; simunyala kusanga iliilia komesa yu Mwami kandi komesa ya mademoni mba.

²² Anoho ilienya lietu liveeye ndi kokole mwami akendeke, kunyi si koveeye ni zinguru kumuvita mba.

Vovoholore ku vandu vasuuvira

²³ “Kuvugilirwaa kokora vindu viosi,” yago gaveeye agiligali. Navuzwa siviveeye ni viosi viveeye novokoonyi mba. “Kuvugilirwa kokora vindu viosi,” navuzwa siviveeye ni viosi vikwumbaka mba.

²⁴ Mundu ateyenyera uvugasu vwivwe mwene, navuzwa uvugasu vwu wundi.

²⁵ Mulie choosi kigulizwa mu chiitu chi zinyama vugira koteveleriza amateeva kigira zing'anagani zie mioyo jinyu.

²⁶ Kuli Mang'oda Matakatifu gavoora, “Lirova kandi viosi iviveeye mulio viveeye viu Mwami Nyasaye.”

²⁷ Mundu utaveeye musangi, namugenihiza mu lilia na muvugiliri kuzia, mulie viosi vivikiywi imbiri winyu vugira koteveleriza amateeva kigira zing'anagani zie mioyo jinyu.

²⁸ Navuzwa niiva mundu amuvoleraa, “Chukulia yiki kihaaniywi ku kifananyi,” ahene yaho mutalia ichukulia yicho mba, kigira umundu oyo umuvooleeye ndio; kandi kigira zing'anagani zie mioyo jinyu,

²⁹ sigaveeye kigira zing'anagani ziu mwoyo gugwo, navuzwa zio mundu wundi. “Kali ndio, ni vulahi,” umundu wundi ateevaa, “ Kigira ki ovovoholore vwange vunyala kwigalirwa ni zing'anagani ziu mundu wundi?

³⁰ Niiva inzi sandizaa Nyasaye ku chukulia change, mundu atandula kigira chukulia chamali kuhaana lisandiza kucho mba.”

³¹ Kunangwa, ni muva ni mulia, anoho nimunwa anoho choosi cha mukora, mukore vindu yivi viosi ku likuminya Nyasaye.

³² Mu liiva lienyu liosi, mutikigitalizi mundu woosi mba. Kali vave Avayuda anoho vandu vizihiiri anoho vaveeye mu likanisa lia Nyasaye.

³³ Mukore kuli inzi ngolaa. Ngerizaa kuyaanziza avandu vosi mu vindu viosi vaangora vugira kweyenyera lizominywa, navuzwa lizominya lia vosi, kunangwa vosi vanyoore ovohonyi kuli inzi.