1 Samweli 29 - KITABU KITAKATIFU

Avandu va Filisitia vasuura Daudi

¹ Avandu va Filisitia valeta amahi gaavo goosi harara ha Afeki; na avandu va Isiraeli navo vasingiriza hokososa haavo ha kidaho mu livona lia Jezireeli.

² Avami va 5 va vandu va Filisitia vavita mu miganda jaavo ji imia na elefu; Daudi na vandu veve vaali inyima kuvita harara nu mwami Akishi.

³ Avanene va mahi ga vandu va Filisitia vaavalola kandi vateva, “Avaheburaina yava vakora ki hano?” Akishi yativura, “Uyu ni Daudi, mulala ku avanene vu mwami munene Saolo wa Isiraeli. Yakava niinzi ku ing'inga indambi kalunu. Akikiri kokora cha inzi nyara konyoora uvudamanu vwosi muye kutura lidiku lia yaza ku inzi mba.”

⁴ Navuzwa vanene va mahi ga vandu va Filisitia vavihilirwa Akishi ligali nivamuvoolera, “Yiranyia mundu ula mu lidaala lia wamuha. Utaleka azie mu liihi nikunyi mba; anyala kukwikivuka ing'inga yu vulwani. Ni inzira ki ya oyo anyala konyoora livugilirwa nu mwami weve kuvita likuza lia avandu viitu?

⁵ Kali ndio, uyu siaveeye Daudi, uwa avakali viimba amakuva geege, nivavina kovora, ‘Saolo yiiti zielefu, navuzwa Daudi yiiti amakomi zielefu?’ ”

⁶ Akishi yalanga Daudi namuvolera, “Nzisuha ku Nyasaye oveeye mwoyo wa Isiraeli ndi ku ing'inga yiyi yoosi ivi oveeye musuuvirifu ku inzi; na ndakayanzi koleka ivi uzie na inzi kulwaanira mu liihi yili. Ngikiri konyoora ku uvudamanu vwosi mu ivi kutura lidiku lia waza ku inzi mba. Navuzwa avami vandi sivavugilira ivi mba.

⁷ Kunangwa yirana yengo mu mirembe, kandi utakola kindu choosi kinyala kuvavihiliriza mba.”

⁸ Daudi yativura, “Ngoli vudamanu ki mwami? Niiva kuli ovola ukikiri konyoora uvudamanu vwosi mu inzi kutura lidiku lia ndatanga kukutumikira, kigira ki mburi kuzia niivi, munene kandi mwami wange, ukulwaana avasigu vovo?”

⁹ Akishi yavoola, “Mbugilira. Nguganaganaa kuva musuuvirifu kuli engelosi wa Nyasaye. Navuzwa vami vandi vamali kovora ndi siunyala kuzia mu vulwani ni kunyi mba.

¹⁰ Kunangwa, Daudi, mugambazuri, munyi mwosi avamwaleka Saolo nu kuuza ku inzi kuduuka muvuki mumavwevwe kandi muturi muzie lwa isi ilava.”

¹¹ Kunangwa Daudi harara na vandu veve vaatura mumavwevwe lidiku lialonda ku ukwirana mu kivala cha Filisitia, na avafilisitia vazizagilira kuzia Jezireeli.