1 Kyetsinyinga 16 - KITABU KITAKATIFU

¹ Vaavugura Lisandugu lie Lilagana lia Nyasaye ni valivika hagati hi Lihema lia Daudi yaali nalilombeeye maku vahaana visiuviliru kandi ni vihaanwa vie mirembe ku Nyasaye.

² Lwa Daudi yaali niyakamara kuhaana visiuviliru, yagasiza avandu mu lieta lia Yahova.

³ Maku yahaana viukulia ku vandu vosi va Isiraeli. Yaaha musaza kandi mukali sa mulala imango yu mugadi, inyama isambe na mazabibu guminywa.

⁴ Daudi yatovola valala ku vandu va Levi kwimilira lisigamira lia Yahova, Nyasaye wa Isiraeli, imbiri wi Lisandugu lie Lilagana lia Nyasaye, ku liemba nu mu kwizominya Yahova.

⁵ Asafu yatovolwa kuva mwimiliri, harara na Zakaria kuli mulondi weve. Jeyeli, Shemiri Amozi, Jehieli, Matizia, Eliabu, Benaya, Obedi Edomu, na Jeyeli vakuba uvukana. Asafu yakuba ivikuli viukulangilira,

⁶ na avasaalisi vaviri - Benaia na Jahazieli, vakuba visiliva vuli kazozo imbiri wi Lisandugu lie Lilagana lia Nyasaye.

Lwimbu lwa Daudi lwu kwizominya

⁷ Liali lidiku yili lwa Daudi yaatanga kotovola Asafu na vandu va Levi vache veve kuva vu vunyali vwu kwimba zinyimbu nu kwizominya Yahova.

⁸ O, haana lisandiza ku Yahova, landiza lieta lilie linene; vooleli zihiiri ziosi goosi agaamali kokora.

⁹ Mwimbi lizominywa ku Yahova; Vooli vindu vio kogenya viamali kokora.

¹⁰ Mwikuminyiri lieta lilie litakatifu; Vandu vosi vasangale mu Yahova!

¹¹ Mwenye Yahova ni zinguru zizie, mu mwenye kazozo.

¹² Mwizurizi miyinzi jo kogenya jamali kokora, vio kogenya vivie ni likalaga lia amali kovora.

¹³ O, mwinye visukululwi via Aburahamu mutumikiri weve, O, munyi visukululwi va Isiraeli avatovole va Nyasaye.

¹⁴ Aveeye Yahova Nyasaye witu; Likalaga lilie liveeye mu lirova liosi.

¹⁵ Mwizurizi lilagana lilie mihiga ni mihiga, likuva lia yalaga ku visukululwi elefu ndala,

¹⁶ lilagana lia yalomba na Aburahamu kandi lilagana lia yisuhira Isaka.

¹⁷ Yahova yalomba lilagana na Yakobo, ililihindira mihiga ni mihiga.

¹⁸ Yavoola, “Ndakuha kivala cha Kanaani, kilakave miandu jinyu aveene.”

¹⁹ Avandu va Nyasaye vaali vakekeeke mu livalizwa, kandi avageni mu kivala cha Kanaani.

²⁰ Vagenda genda kutura mu kivala kuzia mu kindi, kutura mu mwami kuzia mu vwami vundi.

²¹ Navuzwa Nyasaye si yaleka mundu kali mulala kuvandambiza; yiganihiza avami nu kukinga vandu veve.

²² Yavoola, “Mutakubiza avatovole vange kivi, kandi mutadiira, mutasaaliriza vaporofeti vange mba.”

²³ Mwimbiri Yahova munyi lirova liosi! Mulandizi makuva go vohonyi vwivwe ing'inga yoosi.

²⁴ Mulandizi uvukumi vwa Nyasaye ku zihiiri ziosi. Muvoore vikolwa vivie viokogenyia ku avandu vosi.

²⁵ Yahova aveeye munene, kandi yizominywe ligali. Ahevwe luyali ligali kuvita avanyasaye vandi vosi.

²⁶ Kigira avanyasaye vandi vi zihiiri ziosi, vaveeye vifananyi vuzwa; navuzwa Yahova yalomba ligulu.

²⁷ Uvukumi nu luyali lonene vimukumbirizaa, zinguru nu vusangali vizuyi mu Litembeli lilie.

²⁸ Mwizominye Yahova, avandu vosi ku lirova, mwizominye vukumi vwi zinguru zizie.

²⁹ Mwizominye Lieta lia Yahova lio vukumi; muleete vihaanwa kandi muuzi mu Litembeli lilie. Musigamiri Yahova nu vukumi vwu vutakatifu vwivwe.

³⁰ Mudegere imbiri wa Yahova, lirova liosi! Lirova liasingirizwa vudinyu na si linyala kusundwa mba.

³¹ Ligulu lisangale, ni lirova liyaanza! Muvoolere zihiiri ziosi ndi Yahova aveeye mwami.

³² Inyanza ni vindu viosi viveeye mu, vifuumi; milimi na viosi viveeye mu, visangale!

³³ Misaala giveeye mu militu girasangala imbiri wa Yahova, lwa Yahova yaazaa kukalagira avilirova.

³⁴ O, Sandizi Yahova, kigira aveeye mulahi; Vuyanzi vwivwe nu vwi mihiga ni mihiga!

³⁵ Mu muvoolere, “Okohonyie, O, Nyasaye muhonyi witu; ukuvungize harara, ma okohonyie kutura ku zihiiri ziosi, kunangwa kuduuki kusandiza nu kwizominya lieta liilio litakatifu.”

³⁶ Mwizominye Yahova, Nyasaye wa Isiraeli! Mwizominye Yahova lero kandi mihiga ni mihiga! Maku avandu vosi vizominya Yahova, vavoola, “Amini” nivizominya Yahova.

Lisigamira Yahova ha Jerusalemi na Gibeoni

³⁷ Mwami Daudi yavika Asafu na vandu vi hiiri ya Levi vache kusingilira havundu hu kusigamira, hi Lisandugu lie Lilagana lia Nyasaye liavikwa. Venyeka kokora miyinzi jaavo hene yaho zing'inga ziosi.

³⁸ Obedi Edomu muyaayi wa Jeduzuni harara na avasaza 68 vi kiliango chiche, venyekana vavakonye. Obedi Edomu na Hosa vaali mu vulindi vwi virivwa.

³⁹ Musaalisi Zadoku harara na vasaalisi vache veve, vasingilira lisigamira Yahova havundu hu kusigamira mu Gibeoni.

⁴⁰ Vuli mugambazuri na hamugorova vasamba visiuviliru vigima ku vwali kolondekana na agang'odwa mu Lilaga lia Yahova yahaana ku Isiraeli.

⁴¹ Hene yaho harara navo, vaali Hemani, Jeduzuni na avandi avatovolwa nikivuni chu kwimba kwizoninya Yahova kigira vuyanzi vwivwe vwi mihiga ni mihiga.

⁴² Hemani na Jeduzuni vasingilira likuba visiliva ni vikuli, kandi ni viju vindi viosi viakubwa lwa viimba zinyimbu ziu kwizominya Yahova. Avandu vi kiliango cha Jeduzuni valinda virivwa.

⁴³ Maku vuli mundu yatura nazia yengo weve, na Daudi yirana yengo weve kugasiza avinyumba yeeye.