1 Kyetsinyinga 11 - KITABU KITAKATIFU

Daudi yagwa Mwami wa Isiraeli

¹ Kunangwa avandu vosi va Isiraeli vazia harara ku Daudi ha Heburoni nivamuvoolera, “Kunyi niivi koveeye avandu vi inyama indala na masahi

² Ku madiku gaavita, lwa Saolo yaali nakikiri mwami witu, ivi wimilira avandu va Isiraeli mu vulwani, na Yahova Nyasaye woovo yakusuuviriza ndi ulimilira avandu veve kandi ove Mwami wavo.”

³ Kunangwa aviimiliri vosi va Isiraeli vaza ku mwami Daudi ha Heburoni; yalomba lilagana navo imbiri wa Yahova, na vaamuvaka amaguta naagwa Mwami wa Isiraeli, kuli Yahova yaali niyamusuuviriza kuvitira ku Samweli.

⁴ Maku mwami Daudi na avandu vosi va Isiraeli vazia kwingilira lidaala linene lia Jerusalemi liali ni liamanyikana kuli Jebusi, na Vajebusi, avukutanga komenya mu kivala yicho vaali nivakemenyi mu.

⁵ Vajebusi vaavoolera Daudi sianyala kwingira mu lidaala linene kali hakuzu, navuzwa Daudi yavugula imbinga yaavo ya Ziyoni, kandi liaza kumanyikana kuli Lidaala linene lia Daudi.

⁶ Daudi yavoola, “Musaza wu kutanga ukwita Mujebusi alakolwa munene wi liihe!” Maku Joabu, uwa mama weve yaali Zeruya, yimilira lingilira Avajebusi ma naagwa munene wa vanene vi liihe.

⁷ Na kigira Daudi yazia komenya mu imbinga ya Ziyoni, lidaala yilio liaza kumanyikana kuli “Lidaala linene lia Daudi.”

⁸ Yirana kwumbaka vuhia lidaala linene yilio, kutangira aha malova gizulizwa ku lovega lwi ivugwi lwi kiguru, na Joabu yadigulula ahasasuguka hi lidigi liatigala lie lidaala.

⁹ Daudi yameda kuva ni zinguru ligali kigira Yahova Wuvunyali Vwosi yaali harara naye.

Avasikari va Daudi valuviliri avamanyikana

¹⁰ Yaga nigo mita ga vasikari vizingulu vamanyikana va Daudi. Harara na avandu vandi va Isiraeli vosi vamukoonya kugwa mwami, kuli Yahova yaali niyamusuuviriza, kandi vakora uvwami vwivwe ni vuva vwi zinguru.

¹¹ Wu kutanga yaali Jashobeni wi ihiiri ya Hakimoni, mwimiliri wa vanene “Vavaga”. Yalwana ni litimu lilie hagati ha vasaza mia tatu kandi naviita vosi mu liihe lilala.

¹² Wa kaviri kuye hagati ha vasaza vi zinguru ligali yaali Elieza muyaayi wa Dodo, wi kiliango cha Ahohi.

¹³ Yalwana Vafilisitia naveeye ku lovega lwa Daudi mu vulwani vwali ha Pasidamimu. Yaali mu mulimi gwi shairi lwa Visiraeli vatanga kwiruka.

¹⁴ Kunangwa oyo na vasaza va yaali navo vasingira vudinyu nokogosoola ligali ma nivaguuta Vafilisitia. Yahova yahaana uvuguuti vonene lidiku yilio.

¹⁵ Lidiku lilala, vavaga ku vanene va vasikari vi zinguru ligali salasini, vazia kulwanda uwa Daudi yaali namenyi ahimbi nu luhangaywa lwa Adulamu, lwu muganda gwa Vafilisitia gwaali nigolombi hokososa haavo mu livona lia Refaimu.

¹⁶ Ku ing'inga yeyo, Daudi yaali ku kiguru cha kumbirizwa nizimbinga, nu muganda gwa Vafilisitia gwaali niguvuguyi Bezelehemu.

¹⁷ Daudi yaali na mahooru yengo, ma navoora, “Ndakayanzi mbula mulala yandetera amazi kutura mu kidaho keveeye ha kirivwa mu Bezelehemu ndanwa!”

¹⁸ Vasikari vi zinguru vi limanyikana vavaga vavitira hagati hokososa hi liihi lia Vafilisitia kuzinguru ni vadaha amazi kutura mu kidaho yicho ma ni vagaleeta ku Daudi. Navuzwa si yaganwa mba. Nitali, yagasundula ichova gave kihanwa ku Yahova,

¹⁹ navoora, “Si ndakanweeye amazi yaga! Gaveeye kuli linwa amasahi ga vasaza yava, avaviiki livamwoyo liavo mu vuhimwa!” Kunangwa yasura kuganwa. Yivi viali vikolwa viu vuluviliri via avasikari vavaga vaali ni vamanyikana.

²⁰ Abishai amwavo Joabu yaali mwimiliri wa vamanyikana “Salasini ”. Yalwana na vasaza mia tatu ni litimu lilie, nu kwiita vosi, kandi yamanyikana ku vaali salasini vilizominywa.

²¹ Yamanyikana ligali kuvita “Salasini zana yavo,” kandi yamanya naagwa mwimiliri wavo, navuzwa si yamanyikana kuli “Vavaga zana yavo mba”.

²² Benaya, muyaayi wa Jehoyada kutura Kabuzeeli yaali musikari wamanyikana ligali. Yakola vikolwa vinyingi viu vuluviliri harara nukwita avasaza avanene vaviri vu vulwani va Vamoabu ing'inga yindi yingira mu luhangaywa mu ing'inga yi likonza ligwizaa linyingi, ma niyiita isimba.

²³ Yita kandi Muegebeti, mundu munene ligali uwaali mutambi kuvita zimita ziviri, uwaali ni litimu linene ligali. Benaya yamwingilira ni kigurumi, ni yikuba ku litimu kutura mu mukono gwu Muegebeti, kandi namwiita nalio.

²⁴ Yivio viali vikolwa viu vuluviliri via Benaya, uwaali mulala ku zana.

²⁵ Yaali mulala ku vahivilira “Salasini” navuzwa si yaali wi zinguru kuli “Vavaga.” Daudi yamuvika kuva musingiliri wa avasikari veve vamulinda.

²⁶ Vasaza vandi avaari avanene vu vulwani vaali: Asaheli, amwavo wa Joabu, Elihanani muyaayi wa Dodo kutura Bezelehemu,

²⁷ Shamozi kutura Harodi,

²⁸ Helezi kutura Peleti, Ira muyaayi wa Ikeshi kutura Tekoa,

²⁹ Abiezeri kutura Anazozi, Sibekai kutura Husha, Ilai kutura Ahohi,

³⁰ Maharai kutura Netofa, Heledi muyaayi wa Baana kutura Netofa,

³¹ Izai muyaayi wa Ribai kutura Gibea kutura Benjamini, Benaya kutura Pirazoni,

³² Hurai kutura mu mavoona himbi na Gaashi, Abieli kutura Ariba,

³³ Azimavezi kutura Baharumi, Eliahiba kutura Shaaliboni,

³⁴ Hashemi kutura Gizoni, Jonazani muyaayi wa Shagee kutura Harari,

³⁵ Ahiamu muyaayi wa Sakari kutura Harari, Elifali muyaayi wa Uru,

³⁶ Heferi kutura Mmekerahi, Ahija kutura Peloni,

³⁷ Hezoroni kutura Karimeli, Naarai muyaayi wa Ezibai,

³⁸ Joeli amwavo Nazani,

³⁹ Mibihari muyaayi wa Hagiri, Zeleki kutura Amoni, Naharai kutura Beerozi, muginji wi viuma viu vulwani vwa Joabu muyaayi wa Zeruya,

⁴⁰ Ira na, Garebu kutura Yatiri,

⁴¹ Uria kutura Hiti, Zabadi muyaayi wa Ahilai,

⁴² Adina muyaayi wa Shiza wi ihiiri ya Rubeni nu muganda gwigwe, salasini harara naye,

⁴³ Hana muyaayi wa Maaka, na Joshafati kutura Zini,

⁴⁴ Uzia kutura Ashiteraha, Shama na Jeyeli ayaayi va Hozamu kutura Aroeri

⁴⁵ Jediaeli Joha avayaayi va Shimiri kutura Tizi,

⁴⁶ Elieli Muhavaha, na Jeribai na Joshavia, vayaayi va Elinaamu, na Izima kutura Moabu,

⁴⁷ Elieli, Obedi, na Jasieli kutura Zoba.