1 Avami 5 - KITABU KITAKATIFU

Solomoni yetegekaa ukwumbaka Litembeli

¹ Mwami Huramu wa Tiro yalange mulina wa Daudi kazozo, kandi lwa yahulira ndi Solomoni uvuguyi vogono vwa baba weve Daudi kuli mwami, yatuma vatumikiri veve kuye.

² Solomoni yiranyia makuva yaga ku Huramu:

³ “Ivi umanya vulahi ndi vulwani vwa baba wange Daudi yaali navwo kutura ku zimbega ziosi, siyaali anyala kwumbakira Yahova Nyasaye weve Litembeli kuduuka lwa Yahova yamukolaa aguuti vasigu veve vosi.

⁴ Navuzwa kalunu Yahova Nyasaye wange umali koleta mirembe ku zinzako ziange ziosi. Simbeeye na vasigu, kandi sihaveeye ho nuvuhimwa vwu kwingilirwa mba.

⁵ Yahova yasuuviriza baba wange Daudi ndi, ‘Muyaayi woovo, wa ndikola mwami inyima woovo, alakanyumbakiri Litembeli!’ Kunangwa mali (koto-vola) kwumbako Litembeli yilio liu kusiganiraumu Yahova Nyasaye wange

⁶ Kunangwa tuma avasaza vovo vazie Lebanoni vaandemere midaragwa. Avasaza vange valayinzira navo, na ndatunga vasaza vovo choosi chu ukalaga. Kuli ivi umanyi vulahi, vasaza vange sivamanyi kotema misaala vulahi kuli vovo vamanya mba.”

⁷ Huramu yaali nuvuyanzi ligali lwa yanyoora makuva ga Solomoni, na yavoola, “Yahova yizominywi ku liiha Daudi muyaayi mugeri kuli uyu kuvugura vwiyangu vwivwe kuli mwami wi hiiri enene yeyo!”

⁸ Hene yaho Huramu yatumira Solomoni makuva yaga: “Mali konyoora makuva ga waandumira na nzetegeki kokora choosi cho teeva. Ndetegekiza midaragwa kandi misaala ja makaratasi.

⁹ Avandu vange valaginga nukusulungutiza vikongo zana kutura Lebanoni kuduuka kuinyaanza na valajivoha harara nukujeleminya kuli vielemelo giduuki havundu ha otovola. Hene yaho vandu vange valagivoholola, na vandu vovo valajilinda. Kolovega lulwo, ndakayanzi uhaane chukulia ku vandu vange.”

¹⁰ Kunangwa Huramu yaaha Solomoni midaragwa kandi vikongo vie misaala gindi josi ja yenya,

¹¹ na Solomoni naye yaaha Huramu magunia 20,000 ge nganu kandi zilita 20,000 zia maguta malahi ga muzeituni vuli muhiga kulihiza avandu veve.

¹² Yahova yahaana, vogeriku ku Solomoni kuli yamusuuviriza. Haali ho ni mirembe hagati ha Huramu na Solomoni, kandi vombi valomba lihambana lie mirembe.

¹³ Mwami Solomoni yatovola avasaza 30,000 kuli vimiyinzi jukunigwa kutura mu Isiraeli mwosi,

¹⁴ kandi naviika Adoniramu kuvasingilira. Yaavagavulanyia mu miganda givaga ja vasaza 10,000, na vuli muganda gwamenya mweli mulala mu kivala cha Lebanoni na mieli giviri hango.

¹⁵ Solomoni naye kandi yaali na vasaza 80,000 mu kivala chi vigulu nivaduyaa magina, harara na vasaza 70,000 vukuginga magina,

¹⁶ kandi yavika avasingiliri 3,300

¹⁷ Ku lilaga liu mwami Solomoni vavaaza magina manene malahi gu musingi gwi Litembeli.

¹⁸ Avayinziri va Solomoni na Huramu kandi vasaza kutura mu lidaala linene lia Geberi vetegekiza amagina ni zimbaho ziukwumbaka Litembeli.